Ũrĩa Arĩa Meheretio Kĩũngano-inĩ Mangĩteithio

1-2. (a) Jehova onaga atĩa mehia ma rũtũrĩko? (b) Jehova endaga andũ arĩa mehĩtie meke atĩa?

JEHOVA nĩ athũire mehia, na kwoguo kũrĩ mĩtugo atetĩkagĩria. (Thab. 5:4-6) Erĩgagĩrĩra tũrũmie ithimi ciake cia ũthingu iria aandĩkithirie thĩinĩ wa Bibilia. O na kũrĩ ũguo, Jehova nĩ oĩ atĩ tũtirĩ akinyanĩru, na kwoguo nderĩgagĩrĩra tũmwathĩkĩre na njĩra nginyanĩru. (Thab. 130:​3, 4) Ĩndĩ ndegũtũũra akirĩrĩirie “andũ matetigĩrĩte Ngai arĩa magarũraga ũtugi wake mũnene ũgatuĩka kĩĩgwatio gĩa gwĩka mĩtugo ya rũtũrĩko.” (Jud. 4) Nĩkĩo Bibilia yaragia ũhoro wa “kũniinwo kwa andũ arĩa matetigĩrĩte Ngai” hĩndĩ ya mbaara ya Hari–Magedoni.—2 Pet. 3:7; Kũg. 16:16.

² O na kũrĩ ũguo, Jehova ndendaga mũndũ o na ũmwe akaaniinwo. O ta ũrĩa tuoonire icunjĩ-inĩ iria hĩtũku cia wĩruti, Bibilia nĩ yonanagia wega atĩ “endaga othe merire.” (2 Pet. 3:9) Athuri a kĩũngano nĩ megerekanagia na Jehova na njĩra ya gũteithia mũndũ wĩhĩtie marĩ na wetereri, nĩguo acenjie mĩthiĩre yake na etĩkĩrĩke rĩngĩ harĩ Jehova. No ti andũ othe meriraga. (Isa. 6:9) Amwe nĩ mathiaga o na mbere gwĩka mehia o na thutha wa athuri a kĩũngano kũgeria kũmateithia rĩngĩ na rĩngĩ nĩguo makinyĩrĩre kwĩrira. Hihi athuri a kĩũngano magĩrĩirũo gwĩka atĩa hĩndĩ ta ĩyo?

‘EHERIAI MŨNDŨ ŨRĨA MWAGANU’

3. (a) Bibilia yugaga atĩa igũrũ rĩgiĩ mũndũ ũregete kwĩrira? (b) Nĩ kĩĩ kĩngĩtũma tuuge atĩ nĩ ta mũndũ ũcio akoragwo ethuurĩire kweherio kĩũngano-inĩ?

³ Rĩrĩa mũndũ wĩhĩtie aga kwĩrira, no mũhaka athuri a kĩũngano marũmĩrĩre ũtongoria ũyũ ũrĩ thĩinĩ wa 1 Akorintho 5:13: “Eheriai mũndũ ũcio mwaganu gatagatĩ-inĩ kanyu.” Na njĩra ĩngĩ, nĩ ta mũndũ ũcio akoragwo ethuurĩire maumĩrĩro macio, na kwoguo akoragwo akĩgetha kĩrĩa ahandĩte. (Gal. 6:7) Tũngiuga ũguo nĩkĩ? Tondũ athuri a kĩũngano nĩ mageretie kũmũteithia maita maigana ũna nĩgetha erire, nowe akarega gwĩka ũguo. (2 Ath. 17:​12-15) Ciĩko ciake nĩ ironania atĩ nĩ athuurĩte kwaga gwathĩkĩra ithimi cia Jehova.—Gũcok. 30:​19, 20.

4. Nĩ kĩĩ gĩtũmaga gũthomwo kĩmenyithia rĩrĩa mũndũ ũregete kwĩrira eherio kĩũngano-inĩ?

⁴ Rĩrĩa mũndũ ũregete kwĩrira eherio kĩũngano-inĩ, kĩũngano nĩ gĩthomagĩrũo kĩmenyithia kĩrauga atĩ mũndũ ũcio rĩu ti Mũira wa Jehova. Kĩmenyithia kĩu ti gĩa gũconorithia mũndũ ũcio wĩhĩtie. Muoroto wakĩo nĩ gũteithia andũ arĩa angĩ kĩũngano-inĩ marũmĩrĩre ũtongoria wa Kĩĩmaandĩko wĩgiĩ ‘gũtiga gũthiaga thiritũ’ na mũndũ ũcio, “o na kũrĩanĩra” nake. (1 Kor. 5:​9-11) Jehova nĩ onanĩtie gĩtũmi gĩa kũheana ũtongoria ũcio. Mũtũmwo Paulo aaugire: “Gatawa kanini ga kũimbia kagagatagia kĩmere gĩothe.” (1 Kor. 5:6) Kwoguo mũndũ ũregete kwĩrira angĩaga kweherio kĩũngano-inĩ, no atũme andũ arĩa angĩ maregerie itua rĩao rĩa gũtũũra kũringana na ithimi cia Jehova.—Thim. 13:20; 1 Kor. 15:33.

5. Twagĩrĩirũo gũkorũo na mawoni marĩkũ kwerekera mũndũ weheretio kĩũngano-inĩ, na nĩkĩ?

⁵ Gũkĩrĩ ũguo-rĩ, twagĩrĩirũo gũkorũo na mawoni marĩkũ kwerekera Mũkristiano weheretio kĩũngano-inĩ? O na gũtuĩka tũtinyitanagĩra nake, tũbatiĩ kũmuona atariĩ ta ngʼondu yũrĩte, no ti ta mũndũ ũtarĩ na mwĩhoko. Nĩ tũĩ atĩ ngʼondu yũrĩte no ĩcoke rũũru-inĩ. Ningĩ nĩ wega kũririkana atĩ mũndũ ũcio nĩ eeyamũrĩire Jehova, no kwa ihinda rĩrĩ ndaratũũra kũringana na wĩyamũrĩri wake, ũndũ ũrĩa ũngĩtũma orũo nĩ mweke wa gũgaatũũra tene na tene. (Ezek. 18:31) O na kũrĩ ũguo, tondũ ihinda rĩa gũcokerera Jehova rĩrĩ o ho, no twĩrĩgĩrĩre atĩ mũndũ ũcio nĩ arĩmũcokerera. Kwoguo-rĩ, athuri a kĩũngano mangĩonania mwerekera ta ũcio atĩa rĩrĩa mararũmbũyania na mũndũ weheretio kĩũngano-inĩ?

ŨRĨA ATHURI MATEITHAGIA ARĨA MEHERETIO KĨŨNGANO-INĨ

6. Nĩ makinya marĩkũ athuri a kĩũngano magĩrĩirũo kuoya nĩguo mateithie mũndũ weheretio kĩũngano-inĩ?

⁶ Hihi mũndũ weheretio kĩũngano-inĩ akoragwo atiganĩirio atarĩ na ũteithio wa ũrĩa angĩcokerera Jehova? Aca. Rĩrĩa kamĩtĩ ya athuri ĩrera mũndũ atĩ nĩ ekweherio kĩũngano-inĩ, athuri acio mabatiĩ kũmwĩra nginya makinya marĩa arabatara kuoya nĩgetha acokio kĩũngano-inĩ. No nĩ harĩ ũndũ ũngĩ marĩkaga. Kaingĩ nĩ marĩraga mũndũ ũcio atĩ no mende gũcemania nake rĩngĩ thutha wa mĩeri ĩigana ũna, nĩguo mone kana ngoro yake nĩ ĩcenjetie. Mũndũ ũcio angĩtĩkĩra gũcemania nao, athuri acio maikara thĩ nake rĩngĩ nĩ marĩmwĩkĩraga ngoro erire mehia make nĩguo acokio kĩũngano-inĩ. O na ihinda-inĩ rĩu mangĩona atĩ ngoro yake ndĩrĩ ĩracenjia, no marĩbangaga kũmũceerera rĩngĩ na rĩngĩ.

7. Athuri a kĩũngano megerekanagia atĩa na Jehova harĩ kuonania ũcayanĩri makĩrũmbũyania na mũndũ weheretio kĩũngano-inĩ? (Jeremia 3:12)

⁷ Athuri a kĩũngano nĩ merutanagĩria kwĩgerekania na Jehova harĩ kuonania ũcayanĩri makĩrũmbũyania na mũndũ weheretio kĩũngano-inĩ. Kwa ngerekano, Jehova ndaaikaraga etereire Aisiraeli nginya rĩrĩa marĩtua itua rĩa kũmũcokerera. Handũ ha ũguo, ooyaga ikinya rĩa mbere rĩa kũmateithia o na matonanĩtie atĩ nĩ merirĩte. O ta ũrĩa gĩcunjĩ gĩa kerĩ kĩa wĩruti ngathĩti-inĩ ĩno kĩoonanirie, Jehova nĩ aahũthĩrire ngerekano ya kuonania ũcayanĩri wake, rĩrĩa eerire mũnabii Hosea macokanwo na mũtumia wake o na atatigĩte kwĩhia. (Hos. 3:1; Mal. 3:7) O ta Jehova, athuri a kĩũngano nĩ mendaga mũno mũndũ wĩhĩtie erire na acoke kĩũngano-inĩ, na kwoguo matiritũhagia maũndũ ũndũ ekũremwo nĩ gwĩka ũguo.—Thoma Jeremia 3:12.

8. Ngerekano ya mwanake ũrĩa worĩte ĩtũteithagia atĩa gũtaũkĩrũo makĩria nĩ ũcayanĩri na tha cia Jehova? (Luka 15:7)

⁸ Gĩcunjĩ-inĩ gĩa kerĩ kĩa wĩruti ngathĩti-inĩ ĩno, nĩ twaarĩrĩirie ngerekano ya Jesu ĩgiĩ mwanake ũrĩa worĩte. Nĩ tuoonire atĩ rĩrĩa ithe aamuonire agĩcoka mũciĩ, “[aahanyũkire] akĩmũhĩmbĩria na akĩmũmumunya na wendo muororo.” (Luk. 15:20) Rora wone atĩ ithe ndeetereire mũrũwe amũhoe mũhera. Handũ ha ũguo, ooire ikinya rĩa mbere akĩmũtũnga, tondũ nĩ aamwendete. Athuri a kĩũngano nĩ merutanagĩria gũkorũo na mwerekera ta ũcio kwerekera arĩa meheretio kĩũngano-inĩ. Nĩ mendaga mũno andũ acio macokerere Jehova. (Luk. 15:22-24, 32) Na rĩrĩa mũndũ acoka kĩũngano-inĩ, nĩ kũgĩaga gĩkeno kĩnene kũrĩa igũrũ o na gũkũ thĩ.—Thoma Luka 15:7.

9. Jehova ekĩraga ngoro mũndũ wĩhĩtie eke atĩa?

⁹ Kũringana na maũndũ marĩa twarĩrĩirie gũkinyĩria hau, tũreruta atĩ Jehova ndetĩkagĩria mũndũ ũregete kwĩrira athiĩ na mbere gũikara kĩũngano-inĩ. O na kũrĩ ũguo, nĩ ageragia gũteithia mũndũ ta ũcio nĩguo amũcokerere. Hosea 14:4 nĩ yonanagia ũrĩa Jehova aiguaga rĩrĩa andũ arĩa mehĩtie merira. Yugaga ũũ: “Nĩ ngaamahonia na matigaacoka gũkorũo matarĩ ehokeku rĩngĩ. Nĩ ngaamenda ndĩyendeire, tondũ marakara makwa nĩ [meherete].” Na githĩ ũndũ ũcio ndũrekĩra athuri a kĩũngano ngoro kũroraga ũndũ o wothe ũronania atĩ mũndũ nĩ ambĩtie kwĩrira? Ningĩ nĩ ũrekĩra ngoro mũndũ ũtigĩte Jehova amũcokerere atekũmaĩrĩria.

10-11. Athuri a kĩũngano mangĩteithia atĩa andũ arĩa meeheririo kĩũngano-inĩ tene?

¹⁰ Ĩ nao andũ arĩa meeheririo kĩũngano-inĩ tene, hihi o na mĩaka mĩingĩ mĩhĩtũku? Andũ ta acio o na no gũkorũo nĩ maatiganire na mehia marĩa maatũmire meherio kĩũngano-inĩ. Amwe o na no kũhoteke matiririkanaga kĩrĩa gĩatũmire meherio kĩũngano-inĩ. O ũrĩa kũngĩkorũo kũrĩ, athuri a kĩũngano nĩ magĩrĩirũo kwĩrutanĩria gũcaria andũ ta acio na kũmaceerera. Rĩrĩa mamaceerera, no mahoe hamwe nao na mamekĩre ngoro macoke kĩũngano-inĩ. Ma nĩ atĩ, mũndũ angĩkorũo aikarĩte nja wa kĩũngano ihinda rĩa mĩaka mĩingĩ, akoragwo atarĩ na hinya kĩĩroho. Kwoguo mũndũ ta ũcio angĩonania atĩ nĩ arenda gũcoka kĩũngano-inĩ, athuri no mabange mũhunjia ũmwe kĩũngano-inĩ erute Bibilia nake o na atacoketio kĩũngano-inĩ. Rĩrĩa rĩothe mũbango ta ũcio wabatarania, athuri a kĩũngano nĩo marĩbangaga mũndũ ũcio arutwo Bibilia.

¹¹ Athuri a kĩũngano mabatiĩ kwĩgerekania na Jehova harĩ kuonania tha, na njĩra ya gũteithia andũ aingĩ o ũrĩa kwahoteka mamenye atĩ nĩ maranyitwo ũgeni macoke thĩinĩ wa kĩũngano. Rĩrĩa mwĩhia onania atĩ nĩ erirĩte na agatigana na mĩthiĩre yake mĩũru, agĩrĩire gũcokio kĩũngano-inĩ o na ihenya.—2 Kor. 2:6-8.

12. (a) Nĩ hĩndĩ ta ĩrĩkũ athuri a kĩũngano mangĩbatara kũrora maũndũ na njĩra ndikandikĩru? (b) Nĩkĩ tũtibatiĩ kuona ta harĩ mwĩhia ũtangĩoherũo nĩ Jehova? (Ningĩ rora kohoro ka magũrũ-inĩ.)

¹² Kũrĩ hĩndĩ athuri a kĩũngano mangĩbatara kũrora maũndũ na njĩra ndikandikĩru matanacokia mũndũ kĩũngano-inĩ. Kwa ngerekano, angĩkorũo mũndũ aarĩ na mahĩtia ma gwĩka mwana maũndũ moru kana ũregenyũki kana akahũthĩra wara nĩguo aniine kĩhiko gĩake, athuri no mabatare gũkorũo na ma biũ atĩ nĩ erirĩte kuuma ngoro. (Mal. 2:14; 2 Tim. 3:6) No mũhaka magitĩre rũũru rwa Ngai. O na kũrĩ ũguo, nĩ wega kũririkanaga atĩ Jehova nĩ amũkagĩra mũndũ o wothe wĩrirĩte kuuma ngoro na agatigana na mĩthiĩre yake mĩũru. Kwoguo o na gũtuĩka athuri a kĩũngano nĩ mabataraga gũtigĩrĩra biũ atĩ mũndũ warĩ na mĩthiĩre ta ĩyo nĩ erirĩte kuuma ngoro, matibatiĩ kuona ta harĩ mwĩhia ũtangĩoherũo nĩ Jehova.a—1 Pet. 2:10.

ŨRĨA KĨŨNGANO KĨNGĨKA

13. Nĩ ngũrani ĩrĩkũ ĩkoragwo ho gatagatĩ-inĩ ka ũrĩa tũrũmbũyanagia na mũndũ ũheetwo mũkaana nĩ athuri a kĩũngano na mũndũ weheretio kĩũngano-inĩ?

¹³ O ta ũrĩa twerutire gĩcunjĩ-inĩ kĩhĩtũku, rĩmwe nĩ tũthomagĩrũo kĩmenyithia kĩrauga atĩ mũrũ kana mwarĩ wa Ithe witũ nĩ aheo mũkaana. Hĩndĩ ta ĩyo, nĩ tũthiaga na mbere kũnyitanĩra na Mũkristiano ũcio tondũ nĩ tũramenya atĩ nĩ erirĩte na agatigana na mĩthiĩre yake mĩũru. (1 Tim. 5:20) Athiaga o na mbere gũkorũo kĩũngano-inĩ, na nĩ abataraga gwĩkĩrũo ngoro nĩ aarĩ na ariũ a Ithe witũ. (Ahib. 10:​24, 25) No maũndũ makoragwo marĩ ngũrani rĩrĩa mũndũ eherio kĩũngano-inĩ. Nĩ ‘tũtigaga gũthiaga thiritũ’ na mũndũ ũcio, ‘o na tũgatiga kũrĩanĩra nake.’—1 Kor. 5:11.

14. Mũkristiano angĩhũthĩra atĩa thamiri yake ĩmenyeretio nĩ Bibilia akĩrũmbũyania na mũndũ weheretio kĩũngano-inĩ? (Ningĩ rora mbica.)

¹⁴ Hihi ũndũ ũrĩa twarĩrĩria ũronania atĩ tũtibatiĩ kwaranĩria o na hanini na mũndũ weheretio kĩũngano-inĩ? Aca. Ũrĩa kũrĩ nĩ atĩ, tũtibatiĩ kũnyitanĩra nake. Ĩndĩ Mũkristiano no ahũthĩre thamiri yake ĩmenyeretio nĩ Bibilia gũtua kana nĩ ekũnyita ũgeni mũndũ weheretio kĩũngano-inĩ oke mĩcemanio ya kĩũngano, hihi ta mũndũ wao wa famĩlĩ kana mũndũ warĩ mũrata wake wa hakuhĩ. Ĩ rĩrĩa oka mũcemanio? Tene tũtirageithagia andũ arĩa meheretio kĩũngano-inĩ. No rĩu Mũkristiano we mwene no ahũthĩre thamiri yake ĩmenyeretio nĩ Bibilia gũtua kana nĩ ekũgeithia mũndũ weheretio kĩũngano-inĩ kana kũmũnyita ũgeni angĩũka mũcemanio. No tũtibatiĩ kũgĩa na ndeereti ndaihu na mũndũ ta ũcio kana kũnyitanĩra nake maũndũ-inĩ.

15. Nĩ ehia a mũthemba ũrĩkũ marĩrĩirio thĩinĩ wa 2 Johana 9-11? (Ningĩ rora gathandũkũ, “Hihi Johana na Paulo Maaragĩrĩria Mehia Mahaanaine?”)

¹⁵ No andũ amwe no meyũrie, ‘Githĩ Bibilia ndiugaga atĩ Mũkristiano angĩgeithia mũndũ ta ũcio angĩkorũo akĩnyitanĩra nake ciĩko-inĩ ciake cia waganu?’ (Thoma 2 Johana 9-11.) Ũhoro ũrĩa ũthiũrũrũkĩirie mĩhari ĩyo ũronania atĩ ũtongoria ũcio waragia ũhoro wĩgiĩ aregenyũki na andũ angĩ arĩa magaathagĩrĩria mĩtugo ĩtagĩrĩire. (Kũg. 2:20) Kwoguo, angĩkorũo mũndũ weheretio kĩũngano-inĩ nĩ oĩkaine atĩ nĩ mũregenyũki kana nĩ mũndũ ũgaathagĩrĩria mĩtugo ĩtarĩ mĩega, athuri a kĩũngano matingĩmũceerera. Nĩ ma no twĩrĩgĩrĩre atĩ mũndũ ta ũcio no acenjie, no ihinda-inĩ rĩrĩ atacenjetie, tũtiagĩrĩirũo kũmũgeithia kana kũmũnyita ũgeni oke mũcemanio wa kĩũngano.

WĨGEREKANAGIE NA ŨCAYANĨRI NA THA CIA JEHOVA

16-17. (a) Jehova endaga andũ arĩa mehĩtie meke atĩa? (Ezekieli 18:32) (b) Athuri a kĩũngano mangĩrutithania wĩra atĩa na Jehova?

¹⁶ Tweruta atĩa ngathĩti-inĩ ĩno? Jehova ndendaga mũndũ o na ũmwe akaaniinwo. (Thoma Ezekieli 18:32.) Endaga andũ arĩa mehĩtie maiguithanio nake. (2 Kor. 5:20) Nĩkĩo kuuma o tene, Jehova akoretwo akĩra andũ ake rĩngĩ na rĩngĩ merire na mamũcokerere. Athuri a kĩũngano nĩ makoragwo na mweke wa kũrutithania wĩra na Jehova rĩrĩa marerutanĩria gũteithia mũndũ wĩhĩtie nĩguo akinyĩrĩre kwĩrira.—Rom. 2:4; 1 Kor. 3:9.

¹⁷ Ta wĩcirie gĩkeno kĩrĩa gĩkoragwo kũrĩa igũrũ rĩrĩa ehia merira! Ithe witũ wa igũrũ, Jehova, nĩ akenaga mũno rĩrĩa rĩothe ngʼondu yake yacoka kĩũngano-inĩ. Wendo witũ harĩ Jehova nĩ wongererekaga o na makĩria rĩrĩa twecũrania ũhoro wĩgiĩ ũcayanĩri wake, tha ciake, na ũtugi wake mũnene.—Luk. 1:78.