Ũhoro Muongerere

Ũhoro Kũrĩ Aciari Akristiano:

Ũrĩ mũciari, wendi waku nĩ gũteithia ciana ciaku ciende Jehova na imwĩyamũrĩre. Ũngĩciteithia atĩa nĩguo ciĩhaarĩrie kũbatithio? Nĩ rĩ ingĩkorũo ciĩhaarĩirie kuoya ikinya rĩu rĩa bata?

Jesu eerire arũmĩrĩri ake ũũ: “Thiĩi mũgatue andũ arutwo kuuma ndũrĩrĩ-inĩ ciothe, mũkĩmabatithagia.” (Mat. 28:19) Kũringana na rĩandĩko rĩu, ũndũ ũrĩa mũnene ũbataranagia nĩguo mũndũ abatithio, nĩ gũkorũo arĩ mũrutwo. Ũguo nĩ kuuga nĩ ataũkagĩrũo nĩ morutani ma Kristo, akametĩkia, na akamarũmĩrĩra na kinyi. O na ciana no ihote gwĩka ũguo.

Igĩra ciana ciaku kĩonereria kĩega, na ũcirute ũhoro wa Jehova. (Gũcok. 6:6-9) Gwĩka ũguo nĩ hamwe na kũhũthĩra ũhoro ũrĩa ũrĩ ibuku-inĩ rĩa Kenera Ũtũũro Tene na Tene! nĩguo ũcirute morutani ma mũthingi ma Bibilia na ũciteithie kũhũthagĩra motaaro ma Bibilia ũtũũro-inĩ wacio. Teithia ciana ciaku ũrĩa ingĩtaarĩria maũndũ marĩa ciĩtĩkĩtie ikĩhũthĩra ciugo ciacio. (1 Pet. 3:15) Kũgĩa na ũmenyo na gwĩkĩrũo ngoro nĩwe ũrĩ mũciari, na kuumana na wĩruti wacio, ũthathaiya wa famĩlĩ, mĩcemanio ya kĩũngano, na arata a cio ega nĩ gũgũciteithia gũkinyĩrĩra kũbatithio na gũkũra kĩĩroho. Teithia ciana ciaku kwĩigĩra mĩoroto ya kĩĩroho.

Thimo 20:11 yugaga ũũ: “O na mwana nĩ amenyekaga kũgerera ciĩko ciake, akamenyeka kana mĩtugo yake nĩ mĩtheru na kana nĩ mĩagĩrĩru.” Nĩ maũndũ marĩkũ mamwe mangĩonania atĩ mwana nĩ atuĩkĩte mũrutwo wa Jesu Kristo na nĩ ehaarĩirie kũbatithio?

Mwana ũrerutanĩria nĩguo abatithio agĩrĩire gwathĩkagĩra aciari ake. (Atũm. 5:29; Kol. 3:20) Bibilia yugaga ũũ ĩkĩaria ũhoro wa Jesu rĩrĩa aarĩ na mĩaka 12: ‘Agĩthiĩ na mbere gwathĩkĩra aciari ake.’ (Luk. 2:51) Ũguo ti kuuga atĩ wĩrĩgĩrĩre mwana waku akorũo arĩ mũkinyanĩru. Ĩndĩ mwana ũrenda kũbatithio nĩ erutanagĩria kũrũmĩrĩra kĩonereria kĩa Jesu na nĩ oĩkaine atĩ nĩ athĩkagĩra aciari ake.

Ningĩ nĩ arĩonanagia wendi wa kwĩruta ma cia Bibilia. (Luk. 2:46) Hihi mwana waku nĩ endete gũthiĩ na kũnyitanĩra mĩcemanio-inĩ? (Thab. 122:1) Hihi nĩ akoragwo na wendi wa gũthoma Bibilia na gũkoragwo na wĩruti wake ategũtĩrĩria?​—Mat. 4:4.

Mwana ũrenda kũbatithio nĩ erutanagĩria kũiga maũndũ ma Ũthamaki mbere. (Mat. 6:33) Nĩ ataũkagĩrũo nĩ itemi rĩake rĩa kũhunjĩria arĩa angĩ ũhoro wĩgiĩ wĩtĩkio wake. Nĩ anyitaga mbaru njĩra itiganĩte cia ũtungata na ndaconokaga kwĩmenyithania kũrĩ arutani na arĩa mathomaga nao atĩ nĩ Mũira wa Jehova. Nĩ oyaga na ũritũ tũcunjĩ tũrĩa aheagwo Mũcemanio-inĩ wa Ũtũũro na Ũtungata.

Ningĩ nĩ arĩĩrutanagĩria gũkoragwo na mĩthiĩre mĩega na njĩra ya gwĩthema thiritũ njũru. (Thim. 13:20; 1 Kor. 15:33) Ũndũ ũcio nĩ ũrĩonekaga kũgerera maũndũ marĩa endete ta nyĩmbo, thenema, tabarĩra cia TV, mĩthaako ya video, na ũrĩa ahũthagĩra Intaneti.

Ciana nyingĩ nĩ ciĩtĩkĩrĩte ũteithio wa aciari a cio, igathuura kũrũmĩrĩra ũhoro wa ma, na ikagĩrĩra kũbatithio irĩ nini. Jehova aromũrathima mũgĩthiĩ na mbere gũteithia ciana cianyu ikinyĩrĩre itua rĩu rĩa bata mũno harĩ ũrata wacio na Jehova.

Ũhoro Kũrĩ Mũhunjia Ũtarĩ Mũbatithie:

Nĩ mweke wa mwanya gũtungata hamwe na kĩũngano ũrĩ mũhunjia ũtarĩ mũbatithie. Nĩ wĩkĩte wega nĩ ũndũ wa ũrĩa ũthiĩte na mbere kĩĩroho. Nĩ ũmenyete Ngai kũgerera kwĩruta Kiugo gĩake na nĩ wonanĩtie wĩtĩkio harĩ ciĩranĩro cia Ngai.​—Joh. 17:3; Ahib. 11:6.

No gũkorũo ũtanambĩrĩria kwĩruta Bibilia na Aira a Jehova nĩ wanyitanagĩra na ndini ĩngĩ, kana akorũo gũtirĩ wanyitanagĩra nayo. No kũhoteke nĩ wekaga maũndũ mangĩ mataringaine na motaaro ma Bibilia. No rĩu nĩ wonanĩtie wĩtĩkio waku na njĩra ya kwĩrira, ũguo nĩ kuuga kũigua ũũru mũno nĩ mahĩtia marĩa waneka hau kabere, na ũkagarũrũka, ũguo nĩ kuuga gũtigana na mĩthiĩre mĩũru na gũtua itua rĩa gwĩka ũrĩa kwagĩrĩire maitho-inĩ ma Ngai.​—Atũm. 3:19.

Kana hihi wamenyire maandĩko marĩa matheru “kuuma ũrĩ o gakenge.” Kwoguo nĩ ũgitĩrĩtwo ndũkeingĩrie mĩtugo-inĩ ĩtarĩ ya Gĩkristiano na mehia maritũ. (2 Tim. 3:15) Nĩ wĩrutĩte gwĩtiiria hatĩka cia riika na magerio mangĩ ma kwĩingĩria maũndũ-inĩ marĩa Jehova onaga marĩ moru. Nĩ wonanĩtie wĩtĩkio na njĩra ya kũrũmia ũthathaiya wa ma na kwĩra arĩa angĩ maũndũ marĩa wĩtĩkĩtie. Nĩ ũmenyeretio wĩra-inĩ wa kũhunjia. Rĩu nĩ ũtuĩte itua rĩa gũtungatĩra Jehova ũrĩ mũhunjia ũtarĩ mũbatithie.

O na angĩkorũo warutirũo njĩra cia Jehova kuuma ũrĩ mwana kana ũramenyire Jehova ũrĩ mũndũ mũgima, no kũhoteke rĩu nĩ ũreciria ũhoro wa makinya mangĩ merĩ harĩ ũthii waku wa na mbere kĩĩroho​—kwĩyamũrĩra Ngai na kũbatithio. Mũndũ eyamũragĩra Jehova na njĩra ya mahoya, akamwĩra itua rĩake rĩa kũmũhe wĩrutĩri wa ngoro yothe ũtũũro-inĩ wake wothe. (Mat. 16:24) Agacoka akonania wĩyamũrĩri ũcio na njĩra ya kũbatithio na maĩ. (Mat. 28:19, 20) Thutha wa kwĩyamũrĩra Jehova na kũbatithio, agatuĩka ndungata yamũrĩtwo ya Jehova Ngai. Ũcio nĩ mweke wa mwanya!

O ta ũrĩa wĩrutĩte Bibilia-inĩ, no ũcemanie na moritũ matiganĩte. Ririkana atĩ ihinda inini thutha wa Jesu kũbatithio, ‘nĩ aatongoririo nĩ roho nginya werũ-inĩ akagerio nĩ Mũcukani.’ (Mat. 4:1) Kwoguo no wĩrĩgĩrĩre kũgerio o na makĩria thutha wa kũbatithio ũgatuĩka mũrutwo wa Kristo. (Joh. 15:20) Ũkũgerio na njĩra itiganĩte. Wahota gũkarario nĩ andũ a famĩlĩ. (Mat. 10:36) No ũnyũrũrio nĩ arĩa mũthomaga nao, arĩa mũrutaga wĩra nao, na arata a hau kabere. Hingo ciothe ririkanaga ciugo ici cia Jesu iria irĩ thĩinĩ wa Mariko 10:29, 30: “Ngũmwĩra atĩrĩ na ma, gũtirĩ mũndũ ũtigĩte nyũmba kana ariũ a nyina kana aarĩ a nyina kana nyina kana ithe kana ciana kana mĩgũnda nĩ ũndũ wakwa na nĩ ũndũ wa ũhoro ũrĩa mwega ũtekwamũkĩra maita 100 makĩria, ihinda-inĩ rĩrĩ​—nyũmba, ariũ a nyina, aarĩ a nyina, nyina, ciana, na mĩgũnda, hamwe na mĩnyamaro​—na mũtabarĩre-inĩ wa maũndũ ũrĩa ũroka, aheo muoyo wa tene na tene.” Kwoguo thiĩ na mbere kwĩrutanĩria gũikara hakuhĩ na Jehova na gũtũũra kũringana na ithimi ciake cia ũthingu.

Ũngĩenda kũbatithio, ĩra mũtabarĩri wa kĩama gĩa athuri gĩa kĩũngano kĩanyu. Ciũria iria irũmĩrĩire ũhoro ũyũ nĩcio mũthingi wa maũndũ marĩa mũkaarĩrĩria na athuri nĩgetha mamenye kana nĩ ũragĩrĩra kũbatithio. No wambĩrĩrie kũhaarĩria ciũria icio ũrĩ wiki hĩndĩ ya wĩruti waku.

Ũkĩhaarĩria ciũria icio, thoma na wĩcũranie Maandĩko mothe marĩa monanĩtio. No wandĩke ibuku-inĩ rĩrĩ kana handũ hangĩ maũndũ marĩa manene. No ũhũthĩre maũndũ macio, na ũkorũo na ibuku rĩrĩ mũkĩarĩrĩria ciũria icio hamwe na athuri. Ũngĩaga gũtaũkĩrũo nĩ kĩũria o gĩothe, ndũgetigĩre kũhoya ũteithio kũrĩ ũrĩa mũreruta Bibilia nake kana kũrĩ athuri.

Mũkĩaria na athuri, to mũhaka ũcokie ciũria icio na njĩra ndaihu. Kaingĩ icokio ikuhĩ, rĩa ĩmwe kwa ĩmwe ũkĩhũthĩra ciugo ciaku mwene nĩ rĩiganu. Ciũria-inĩ nyingĩ iria ciũrĩtio, nĩ wega kũgweta rĩandĩko rĩmwe kana merĩ marĩa maranyita mbaru icokio rĩaku.

Angĩkorũo ndũrĩ ũragĩa na ũmenyo mũiganu wa morutani ma mũthingi ma Bibilia, athuri nĩ mekũbanga ũrĩa ũgũteithio nĩgetha ũhote gũtaarĩria Maandĩko wega na ciugo ciaku na wagĩrĩre kũbatithio ihinda rĩũkĩte.

[Ũhoro kũrĩ athuri a kĩũngano: Maũndũ marĩa magĩrĩire kũrũmĩrĩrũo mũkĩarĩrĩria ciũria na mũndũ ũrenda kũbatithio marĩ karatathi-inĩ ka 208-212.]