Ndeereti ya Kũrĩkĩrĩria na Mũndũ Ũrĩa Ũrenda Kũbatithio

Kaingĩ andũ mabatithagĩrio igomano-inĩ cia Aira a Jehova. Mĩario ya kũbatithio ĩkĩrĩkĩrĩra, mwaria nĩ oragia arĩa marenda kũbatithio marũgame macokie ciũria ici igĩrĩ na mũgambo mũnene:

1. Hihi nĩ wĩrirĩte mehia maku, ũkeyamũrĩra Jehova, na ũgetĩkĩra njĩra yake ya kũhonokania kũgerera harĩ Jesu Kristo?

2. Hihi nĩ ũramenya atĩ kũbatithio gwaku kũronania atĩ wee ũrĩ Mũira wa Jehova ũkĩnyitanĩra na ithondeka rĩa Jehova?

Rĩrĩa arĩa marenda kũbatithio metĩkania na ciũria icio, nĩ kuonania nĩ ‘moimbũra na kanua mbere ya andũ’ atĩ nĩ metĩkĩtie igongona rĩa ũkũũri rĩa Jesu na nĩ meyamũrĩire Jehova na ngoro yothe. (Rom. 10:9, 10) Arĩa marenda kũbatithio magĩrĩirũo gwĩcũrania ciũria icio kabere na njĩra ya mahoya nĩguo magĩcokia macokie marĩ na ũũma wa ũndũ ũcio.

Hihi nĩ wĩyamũrĩire Jehova kũgerera mahoya, ũkamwĩra atĩ ũrĩmũthathayagia o we wiki na atĩ gwĩka wendi wake nĩguo ũrĩkoragwo ũrĩ ũndũ ũrĩa wa bata makĩria ũtũũro-inĩ waku?

Hihi ũrĩ na ma biũ atĩ nĩ wagĩrĩirũo kũbatithio kĩgomano-inĩ kĩrĩa gĩũkĩte?

Mũndũ agĩrĩirũo kwĩhumba atĩa akĩbatithio? (1 Tim. 2:9, 10; Joh. 15:19; Afil. 1:10)

Twagĩrĩirũo kwĩhumba ‘tũtegũkĩria njano, na tũrĩ na meciria mega’ nĩguo tuonanie atĩ nĩ ‘twĩyamũrĩire Ngai.’ Kwoguo arĩa marabatithio matiagĩrĩirũo kwĩhumba nguo ironania mwĩrĩ ta cia gũtubĩra kana nguo nyandĩke kana irĩ na mbica. Magĩrĩire kwĩhumba nguo njega, theru, na ciagĩrĩire ihinda-inĩ rĩu.

Mũndũ agĩrĩire gũkorũo na mĩthiĩre ĩrĩkũ hĩndĩ ya kũbatithio? (Luk. 3:21, 22)

Kũbatithio kwa Jesu nĩ kĩonereria harĩ ũrĩa Akristiano mabatithagio. Nĩ aataũkagĩrũo atĩ kũbatithio nĩ ũndũ wagĩrĩire kuoywo na ũritũ, na akĩonania ũguo kũgerera mwerekera wake na ciĩko ciake. Kwoguo, andũ matiagĩrĩirũo kũrehe itherũ rĩtagĩrĩire, gũthaaka, gũtubĩra harĩa harabatithanĩrio, kana gũkorũo na mĩthiĩre ĩngĩ ĩronania atĩ mũndũ ndaroya na ũritũ ũhoro wa kũbatithio. Ningĩ mũndũ ũrĩa wabatithio ndagĩrĩirũo gũkorũo na ciĩko ironania ta arĩ ũhootani mũnene agĩa naguo. O na gũtuĩka kũbatithio nĩ ihinda rĩa gĩkeno, gĩkeno kĩu kĩagĩrĩire kuonanio na njĩra ya gĩtĩo.

Gũthiaga mĩcemanio ũtegũtĩrĩria na kũnyitanĩra na kĩũngano kũrĩgũteithagia atĩa kũrũmia wĩyamũrĩri waku harĩ Jehova?

Nĩkĩ nĩ harĩ bata gũthiĩ na mbere gũkorũo na mũtaratara mwega wa kwĩruta Bibilia na kĩyo na kũhunjagia kaingĩ o na thutha wa kũbatithio?

MAŨNDŨ MA KŨRŨMĨRĨRŨO NĨ ATHURI A KĨŨNGANO

Rĩrĩa mũhunjia ũtarĩ mũbatithie amenyithia athuri wendi wake wa kũbatithio, magĩrĩirũo kũmwĩkĩra ngoro athome na kinyi gacunjĩ ga “Ciũria Kũrĩ Arĩa Marenda Kũbatithio” karatathi-inĩ ka 185-207. Agĩrĩire kwĩrũo arore gacunjĩ ka “Ũhoro Kũrĩ Mũhunjia Ũtarĩ Mũbatithie,” kwambĩrĩria karatathi ka 182, karĩa gataarĩirie ũrĩa angĩĩhaarĩria nĩ ũndũ wa ndeereti hamwe na athuri. O ta ũrĩa honanĩtio gacunjĩ-inĩ kau, mũndũ ũrĩa ũrenda kũbatithio no ahũthĩre maũndũ marĩa andĩkĩte na no akorũo na ibuku rĩrĩ hĩndĩ ya ndeereti yake hamwe na athuri. O na kũrĩ ũguo, hatirĩ bata wa mũndũ ũngĩ kwarĩrĩria ciũria icio nake mbere ya gũcemania na athuri.

Mũndũ o wothe ũrerirĩria kũbatithio agĩrĩire kũmenyithia mũtabarĩri wa kĩama gĩa athuri atĩ nĩ arenda kũbatithio. Ũrĩa ũrenda kũbatithio aarĩkia gũthoma gacunjĩ ga “Ciũria Kũrĩ Arĩa Marenda Kũbatithio,” mũtabarĩri wa kĩama gĩa athuri nĩ agĩrĩirũo kũmũũria kana nĩ eyamũrĩire Jehova kũgerera mahoya akamwĩra atĩ nĩ arĩkaga wendi Wake. Angĩkorũo nĩ eyamũrĩire Jehova, mũtabarĩri wa kĩama gĩa athuri nĩ ekũbanga athuri erĩ marĩrĩrie hamwe nake “Ciũria Kũrĩ Arĩa Marenda Kũbatithio.” O gĩcunjĩ kĩagĩrĩire kwarĩrĩrio na mũthuri ngũrani. To mũhaka mweterere nginya rĩrĩa kĩgomano gĩkaanĩrĩrũo nĩguo mwambĩrĩrie kwarĩrĩria ciũria icio.

Icunjĩ icio igĩrĩ no ciarĩrĩrio o gĩcunjĩ ihinda rĩakĩo, kĩmwe gĩkĩhũthĩra ta ithaa rĩmwe, o na gũtuĩka no mũhũthĩre ihinda makĩria kũngĩbatarania. O gĩcunjĩ kĩagĩrĩire kũhingũrũo na kũhingwo na mahoya. Athuri na ũrĩa ũrenda kũbatithio magĩrĩirũo gũkorũo na mahinda ma kũigana nĩguo marĩrĩrie ciũria icio na njĩra njega. Athuri arĩa maheetwo wĩra wa kwarĩrĩria ciũria icio magĩrĩirũo kũiga ũndũ ũcio ũrĩ wa bata harĩ maũndũ marĩa mabangĩte gwĩka.

Nĩ wega kwarĩrĩria ciũria icio na o mũndũ arĩ wiki handũ ha marĩ gĩkundi. Rĩrĩa mũndũ acokia ciũria icio ciothe, athuri nĩ mekũhota kũmenya ũtaũku wake wĩgiĩ ma cia Bibilia, na nĩ ũndũ ũcio mamenye kana nĩ agĩrĩire kũbatithio. Makĩria ma ũguo, ũrĩa ũrenda kũbatithio no ahote kwĩyaria wega makĩria arĩ wiki gũkĩra rĩrĩa marĩ gĩkundi. Mũthuri na mũtumia wake no morio ciũria icio marĩ hamwe.

Angĩkorũo ũrĩa ũrenda kũbatithio nĩ mwarĩ wa Ithe witũ, magĩrĩirũo kwarĩrĩria ciũria icio marĩ handũ maronwo wega nĩ andũ arĩa angĩ ĩndĩ matekũiguĩka. Hangĩbatarania gũkorũo na mũndũ ũngĩ, mũndũ ũcio agĩrĩirũo gũkorũo arĩ mũthuri wa kĩũngano kana ndungata ya kĩũngano gũkĩringana na gĩcunjĩ kĩrĩa maraarĩrĩria, o ta ũrĩa kĩbungo gĩkĩ kĩrũmĩrĩire kĩronania.

Ciũngano-inĩ iria gũtarĩ na athuri aingĩ, ndungata cia kĩũngano iria ciagĩrĩire na cionanĩtie atĩ irĩ na ũtaũku, no ihũthĩrũo kwarĩrĩria ciũria iria irĩ thĩinĩ wa “Gĩcunjĩ kĩa 1: Maũndũ Marĩa Akristiano Metĩkĩtie,” na mũndũ ũrĩa ũrenda kũbatithio. Athuri no o tu magĩrĩirũo kwarĩrĩria na mũndũ “Gĩcunjĩ gĩa 2: Ũtũũro wa Gĩkristiano.” Angĩkorũo kĩũngano gĩtirĩ na ariũ a Ithe witũ arĩa magĩrĩire a kũigana, mũrori wa mũthiũrũrũko no erũo nĩguo one kana ciũngano iria irĩ hakuhĩ no iteithĩrĩrie.

Angĩkorũo mũndũ ũrĩa ũrenda kũbatithio nĩ mwana mũnini, aciari ake nĩ magĩrĩirũo gũkorũo ho akĩũrio ciũria, angĩkorũo nĩ Aira a Jehova. Angĩkorũo gũtingĩhoteka aciari ake makorũo ho, athuri erĩ a kĩũngano (kana mũthuri wa kĩũngano hamwe na ndungata ya kĩũngano, gũkĩringana na gĩcunjĩ kĩrĩa kĩrarĩrĩrio) nĩo magĩrĩirũo kwarĩrĩria nake o gĩcunjĩ.

Athuri magĩrĩirũo gũtigĩrĩra atĩ mũndũ ũrĩa ũrenda kũbatithio arĩ na ũtaũku wa morutani ma mũthingi ma Bibilia na gĩkĩro kĩna. Ningĩ nĩ magĩrĩirũo gũtigĩrĩra atĩ nĩ mamenya kana nĩ atĩĩte ma cia Bibilia biũ na nĩ onanagia atĩ nĩ atĩĩte ithondeka rĩa Jehova. Angĩkorũo ndataũkĩirũo nĩ morutani ma mũthingi ma Bibilia, athuri nĩ mekũbanga ũrĩa angĩteithĩrĩrio nĩguo agĩrĩre kũbatithio hĩndĩ ĩngĩ. Angĩ no mabatare kũheo ihinda nĩguo monanie atĩ nĩ mataũkĩirũo nĩ bata wa wĩra wa kũhunjia kana wa kũrũmĩrĩra mĩbango ya ithondeka. Athuri nĩ magĩrĩirũo kũhũthĩra ũtaũku harĩ kũgayania ithaa rĩu kana ihinda rĩrĩa mekũhũthĩra harĩ o gĩcunjĩ nĩguo mamenye biũ kana mũndũ ũcio nĩ agĩrĩire kũbatithio. O na gũtuĩka ciũria imwe no cioe ihinda inene gũkĩra iria ingĩ, ciũria ciothe nĩ ciagĩrĩire kwarĩrĩrio.

Athuri arĩa maheetwo wĩra wa kwarĩrĩria ciũria icio nĩ megũcemania thutha wa kwarĩrĩria gĩcunjĩ gĩa kerĩ nĩguo matue kana mũndũ ũcio nĩ agĩrĩire kũbatithio kana ndagĩrĩire. Nĩ megwĩciria ũhoro wa ũhoti, mũrerere, na maũndũ mangĩ megiĩ mũndũ ũrĩa ũrenda kũbatithio. Ũndũ ũrĩa wa bata mũno nĩ kũmenya kana mũndũ ũcio nĩ endete Jehova na ngoro yake yothe na agataũkĩrũo nĩ ma cia mũthingi cia Bibilia. Mũndũ ũrenda kũbatithio no akorũo ehaarĩirie kũhingia wĩra ũrĩa wa bata mũno arĩ mũhunjia wa ũhoro ũrĩa mwega angĩteithĩrĩrio na njĩra ya wendo.

Thutha-inĩ, mũthuri ũmwe kana athuri eerĩ arĩa mararĩrĩirie ciũria icio na mũndũ ũcio ũrenda kũbatithio nĩ megũcemania nake nĩguo mamũmenyithie kana nĩ agĩrĩire kũbatithio kana ndagĩrĩire. Angĩkorũo nĩ agĩrĩire kũbatithio, athuri magĩrĩirũo kwarĩrĩria nake gĩcunjĩ kĩa “Ndeereti ya Kũrĩkĩrĩria na Mũndũ Ũrĩa Ũrenda Kũbatithio,” kĩrĩa kĩrĩ karatathi-inĩ ka 206-207. Angĩkorũo ũrĩa ũrenda kũbatithio ndarĩkĩtie kwĩruta ibuku rĩa Kenera Ũtũũro Tene na Tene!, athuri magĩrĩirũo kũmwĩkĩra ngoro arĩkie kwĩruta ibuku rĩu thutha wa kũbatithio. Mũmenyithiei atĩ tarĩki ĩrĩa akaabatithio nĩ ĩkaandĩkwo kandi-inĩ yake ya Rekodi ya Kutaniko ya Mhubiri. Mũririkaniei atĩ athuri moragia mũhunjia ũhoro ũcio nĩguo ithondeka rĩhote kũrũmbũiya maũndũ ma kĩĩndini ma Aira a Jehova thĩinĩ wa thĩ yothe na nĩguo mũhunjia ũcio ahote kũnyitanĩra maũndũ-inĩ ma kĩĩroho na kũheo ũteithio wa kĩĩroho. Makĩria ma ũguo, athuri no maririkanie ahunjia erũ atĩ ũhoro o wothe wao ene ũrĩigagwo kũringana na mawatho megiĩ kũgitĩra ũhoro wa mũndũ (Global Data Protection Policy of Jehovah’s Witnesses) marĩa makoragwo thĩinĩ wa jw.org. Ndeereti ĩyo yagĩrĩirũo kuoya ndagĩka ikũmi kana nini.

Mwaka ũmwe thutha wa mũhunjia kũbatithio, athuri erĩ nĩ magĩrĩirũo gũcemania nake nĩguo mamwĩkĩre ngoro na mamũhe motaaro angĩhũthĩra. Mũthuri ũmwe wa acio agĩrĩirũo gũkorũo arĩ mũrori wa gĩkundi gĩa kũhunjia kĩa mũndũ ũcio. Angĩkorũo ũcio ũbatithĩtio nĩ mwana mũnini, aciari ake nĩ magĩrĩirũo gũkorũo ho angĩkorũo nĩ Aira a Jehova. Ndeereti ĩyo yagĩrĩirũo gũkorũo ĩrĩ ya gwĩkĩra ngoro. Athuri magĩrĩirũo kwarĩrĩria ũrĩa akũrĩte kĩĩroho na mamũhe motaaro mangĩmũteithia megiĩ gũthiĩ na mbere kũrũmĩrĩra mũtaratara mwega wa wĩruti wake kĩũmbe na gũthoma Bibilia o mũthenya, ũthathaiya wa famĩlĩ wa o kiumia, gũthiaga na kũnyitanĩra mĩcemanio-inĩ, o hamwe na kũhunjagia o kiumia. (Ef. 5:15, 16) Angĩkorũo ndarĩkĩtie kwĩruta ibuku rĩa Kenera Ũtũũro Tene na Tene! athuri nĩ magĩrĩirũo kũbanga hagĩe na mũndũ wa kũmũteithĩrĩria gwĩka ũguo. Nĩ magĩrĩirũo kũmũgaathĩrĩria nĩ ũndũ wa maũndũ mega marĩa ekĩte. Kaingĩ, ũtaaro wĩgiĩ kaũndũ kamwe kana twĩrĩ ũkoragwo ũrĩ mũiganu.