Ithandũkũ rĩa Kĩũria

◼ Mũhunjia agĩrĩire gũkorũo agĩthiĩ mĩcemanio na kũhunjia ihinda rĩigana atĩa atanabatithio?

Itua rĩrĩa rĩa bata mũno mũndũ ekaga nĩ kũbatithio. Kwoguo, mũndũ atanabatithio, no mũhaka akorũo na mũigana mũna wa ũmenyo wa maũndũ marĩa Ngai endaga eke. Ningĩ no mũhaka akorũo akĩonania atĩ nĩ arenda gũtũũra kũringana na ithimi cia Ngai.

Tondũ Akristiano mathĩtwo mathiĩ na mbere kũũngana hamwe, mũhunjia ũtarĩ mũbatithie agĩrĩirũo gũkorũo akĩonania kĩyo gĩa gũthiĩ mĩcemanio ya kĩũngano. (Ahib. 10:24, 25) Ningĩ nĩ wega akorũo nĩ arutaga macokio thĩinĩ wa mĩcemanio. No akorũo eyandĩkithĩtie thĩinĩ wa Cukuru ya Ũtungata wa Gĩtheokrasi, o na gũtuĩka to mũhaka.

Kuongerera ũguo, tondũ Akristiano mahetwo wĩra wa kũhunjia ũhoro ũrĩa mwega na kũruta andũ, mũhunjia ũcio atanabatithio agĩrĩire gũkorũo akĩhunjia kaingĩ. (Mat. 24:14; 28:19, 20) Hihi agĩrĩirũo gũkorũo arĩ mũhunjia mĩeri ĩigana atanabatithio? Nĩ agĩrĩirũo kũheo ihinda rĩa kũigana nĩguo onanie atĩ nĩ ehotorete gũkindĩria wĩra-inĩ wa kũhunjia ategũtigithĩria o na thutha ũcio. (Thab. 78:37) O na kũrĩ ũguo, ti wega kũreka mĩeri mĩingĩ ĩhĩtũke kuuma atuĩka mũhunjia nginya rĩrĩa akabatithio. Agĩrĩirũo gũkorũo akĩhunjia mathaa maigana o mweri? Gũtirĩ watho ũndũ-inĩ ũcio. Athuri magĩrĩirũo gwĩciria ũhoro wa o mũhunjia na maũndũ marĩa ahiũranagia namo na makorũo na ũigananĩru.—Luk. 21:1-4.

Rĩrĩa athuri (kana ateithia a ũtungata ciũngano-inĩ iria itarĩ na athuri aingĩ) macemania na mũhunjia nĩguo mamũrie ciũria cia kũbatithio, magĩrĩire kũririkana atĩ arĩa marenda kũbatithio matihanaine na magĩrĩire kũhũthĩra ũtaũku magĩtua kana mũndũ ũcio nĩ agĩrĩire kũbatithio. Magĩrĩire kũrora kana arĩ na wendi wa ma wa gũtuĩka Mũira wa Jehova na kana nĩ arerahĩra kũnyitanĩra na ithondeka rĩa Jehova na kũhunjia. Athuri magĩrĩirũo kũririkana atĩ mũhunjia ũcio ndarĩ arakũra kĩĩroho na ndagĩte na ũmenyo wa maũndũ ta wa ahunjia abatithie arĩa marĩ na ũmenyeru. Mangĩona atĩ ndangĩbatithio hĩndĩ ĩyo, magĩrĩire kũmũhe itũmi cia Kĩĩmandĩko ciĩgiĩ itua rĩao na njĩra ya gĩtĩo na mabange nĩguo athiĩ na mbere gũteithio kĩĩroho.