Ndungata cia Ũhoro Ũrĩa Mwega

JEHOVA nĩ aatũheire kĩonereria kĩrĩa kĩega biũ gĩa kũrũmĩrĩra, kĩa Mũriũ wake Jesu Kristo. (1 Pet. 2:21) Rĩrĩa mũndũ atuĩka mũrũmĩrĩri wa Jesu, nĩ ahunjagia ũhoro ũrĩa mwega arĩ ndungata ya Ngai. Jesu akĩonania atĩ ũndũ ũcio ũngĩgaakorũo ũrĩ wa gũcanjamũra na njĩra ya kĩĩroho, ooigire ũũ: “Ũkai kũrĩ niĩ, inyuothe arĩa mũnogete na mũtitikĩte mĩrigo, na nĩ ngũmũcanjamũra. Oyai icoki rĩakwa mwĩigĩrĩre na mwĩrute kuuma kũrĩ niĩ, nĩ ũndũ niĩ ndĩ mũhooreri na mwĩnyihia ngoro-inĩ, na nĩ mũgũcanjamũrũo.” (Mat. 11:28, 29) Mũndũ wothe wĩtĩkĩrĩte rĩĩtana rĩu nĩ onete atĩ ũndũ ũcio Jesu eeranĩire nĩ wa ma.

² Jesu, arĩ Ndungata Ĩrĩa Nene ya Ngai, nĩ eetire andũ amwe matuĩke arũmĩrĩri ake. (Mat. 9:9; Joh. 1:43) Aamamenyeririe ũhoro-inĩ wĩgiĩ ũtungata na akĩmatũma makarute wĩra ũrĩa aarutaga. (Mat. 10:1–11:1; 20:28; Luk. 4:43) Thutha ũcio, agĩtũma angĩ 70 makahunjie ũhoro ũrĩa mwega wa Ũthamaki wa Ngai. (Luk. 10:1, 8-11) Rĩrĩa Jesu aatũmire arutwo acio aameerire ũũ: “Mũndũ o wothe ũmũthikagĩrĩria inyuĩ, nĩ niĩ athikagĩrĩria. Na mũndũ o wothe ũmũregaga inyuĩ, o na niĩ nĩ andegaga. Makĩria ma ũguo, mũndũ o wothe ũndegaga aregaga nginya Ũrĩa wandũmire.” (Luk. 10:16) Na njĩra ĩyo Jesu akĩonania ũrĩa wĩra ũcio waheetwo arutwo wabatiĩ kuoywo na ũritũ. Maarũgamagĩrĩra Jesu na Ngai Ũrĩa ũrĩ Igũrũ Mũno. Ũguo noguo kũrĩ mahinda-inĩ maya harĩ arĩa othe metĩkagĩra rĩĩtana rĩrĩ rĩa Jesu: ‘Ũka ũtuĩke mũrũmĩrĩri wakwa.’ (Luk. 18:22; 2 Kor. 2:17) Arĩa othe metĩkagĩra rĩĩtana rĩu nĩ maheagwo wĩra nĩ Ngai wa kũhunjia ũhoro ũrĩa mwega wa Ũthamaki na gũtua andũ arutwo.​—Mat. 24:14; 28:19, 20.

³ Nĩ ũndũ wa gwĩtĩkĩra rĩĩtana rĩu rĩa kũrũmĩrĩra Jesu, nĩ tũgĩte na kĩrathimo gĩa ‘kũmenya’ Jehova Ngai na Jesu Kristo. (Joh. 17:3) Nĩ tũrutĩtwo njĩra cia Jehova. Nĩ atũteithĩtie kũgarũrĩra meciria maitũ, kwĩhumba ũmũndũ mwerũ, na gũkorũo na mĩthiĩre ĩratwarana na ithimi ciake cia ũthingu. (Rom. 12:1, 2; Ef. 4:22-24; Kol. 3:9, 10) Nĩ ũndũ wa maũndũ macio atwĩkĩire, nĩ twĩyamũrĩire Jehova na tũkonania wĩyamũrĩri witũ kũgerera kũbatithio. Rĩrĩa twabatithio tũtuĩkaga ndungata ciake.

⁴ Hĩndĩ ciothe ririkanaga atĩ twagĩrĩirũo gũtungatĩra Ngai tũrĩ na moko matarĩ na mahĩtia na tũrĩ na ngoro theru. (Thab. 24:3, 4; Isa. 52:11; 2 Kor. 6:14–7:1) Nĩ tũgĩĩte na thamiri theru nĩ ũndũ wa gũkorũo na wĩtĩkio harĩ Jesu Kristo. (Ahib. 10:19-23, 35, 36; Kũg. 7:9, 10, 14) Mũtũmwo Paulo eerire Akristiano magoocithagie Ngai maũndũ-inĩ mothe marĩa mekaga nĩguo matikahĩngage arĩa angĩ. Mũtũmwo Petero nĩ oonanirie atĩ mĩthiĩre mĩega no ĩgucĩrĩrie arĩa matetĩkĩtie ũhoro-inĩ wa ma. (1 Kor. 10:31, 33; 1 Pet. 3:1) Ũngĩteithia mũndũ atĩa nĩguo agĩrĩre gũkorũo arĩ ndungata ya ũhoro ũrĩa mwega?

AHUNJIA ERŨ

⁵ Wambĩrĩria kwĩruta Bibilia na mũndũ ũrakenio nĩ ũhoro, mwĩkĩre ngoro erage arĩa angĩ maũndũ marĩa areruta. No arie na andũ ao a famĩlĩ, arata, arĩa marutaga wĩra nao, kana andũ angĩ rĩrĩa arĩ maũndũ-inĩ make ma o mũthenya. Ũndũ ũcio nĩ wa bata harĩ kũruta arĩa erũ gũtuĩka arũmĩrĩri a Jesu Kristo marĩ ndungata cia ũhoro ũrĩa mwega. (Mat. 9:9; Luk. 6:40) Hatarĩ nganja o ũrĩa mũrutwo mwerũ egũthiĩ na mbere gũkũra kĩĩroho na kũgĩa na ũmenyeru wa kũhunjia arĩ maũndũ-inĩ make ma o mũthenya, noguo egũkorũo na wendi wa gũthiĩ ũtungata-inĩ.

KŨHINGIA MAŨNDŨ MARĨA MENDEKANAGA

⁶ Mbere ya gũthiĩ na mũrutwo mwerũ ũtungata-inĩ wa nyũmba kwa nyũmba riita rĩa mbere, wagĩrĩire gũtigĩrĩra atĩ nĩ ahingĩtie maũndũ marĩa mendekaga. Mũndũ ũrahunjia hamwe na ithuĩ onanagia atĩ anyitanagĩra na Aira a Jehova. Ũguo nĩ kuuga atĩ nĩ agĩrĩirũo gũkorũo agarũrĩire ũtũũro wake ũgatwarana na ithimi cia Jehova cia ũthingu na no atuĩke mũhunjia ũtarĩ mũbatithie.

⁷ Rĩrĩa ũreruta na mũndũ na ũkaarĩrĩria motaaro ma Bibilia hamwe nake, no kũhoteke nĩ harĩ maũndũ make ũmenyete. No ũkorũo wonete atĩ nĩ aratũũra kũringana na maũndũ marĩa erutĩte. No nĩ harĩ maũndũ mamwe megiĩ ũtũũro wa mũrutwo ũcio athuri mangĩenda kwarĩrĩria hamwe na inyuĩ inyuerĩ.

⁸ Mũtabarĩri wa kĩama gĩa athuri nĩ ekũbanga athuri erĩ a kĩũngano (ũmwe wao arĩ wa kamĩtĩ ya ũtungata) marĩrĩrie maũndũ macio nawe mũrĩ na mũrutwo ũcio wa Bibilia. Thĩinĩ wa ciũngano iria itakoragwo na athuri aingĩ, mũthuri ũmwe wa kĩũngano na ndungata ya kĩũngano yagĩrĩire no meke ũguo. Ariũ a Ithe witũ arĩa megũthuurũo kwarĩrĩria ũndũ ũcio magĩrĩirũo gwĩka ũguo o na ihenya. Mangĩmenya ũhoro wĩgiĩ wendi wa mũrutwo ũcio wa gũtuĩka mũhunjia kũrĩ mũthenya wa mũcemanio, ariũ a Ithe witũ acio no marie nawe na mũrutwo waku thutha wa mũcemanio ũcio. Ndeereti ĩyo yagĩrĩirũo gwĩkwo na njĩra ya ũrata. Nĩguo mũrutwo etĩkĩrio gũtuĩka mũhunjia ũtarĩ mũbatithie, agĩrĩire gũkorũo ahingĩtie maũndũ maya:

1. (1) Akorũo etĩkĩtie atĩ Bibilia nĩ Kiugo kĩa Ngai gĩtongoretio nĩ roho.​—2 Tim. 3:16.

2. (2) Akorũo amenyete na agetĩkia morutani ma mũthingi ma Bibilia nĩguo angĩũrio kĩũria agacokagia kũringana na Bibilia, no ti kũringana na ũrutani wa ndini cia maheeni kana meciria make.​—Mat. 7:21-23; 2 Tim. 2:15.

3. (3) Akorũo nĩ athĩkagĩra watho wa Bibilia wa kũnyitanĩra na andũ a Jehova mĩcemanio-inĩ ya kĩũngano angĩkorũo no ahote gwĩka ũguo.​—Thab. 122:1; Ahib. 10:24, 25.

4. (4) Akorũo oĩ ũrĩa Bibilia ĩrutanaga igũrũ rĩgiĩ ngomanio itagĩrĩire, o hamwe na ũtharia, kũhikania na makĩria ma mũndũ ũmwe, ngomanio cia arũme kwa arũme na atumia gwa atumia, na nĩ atũũraga kũringana na morutani macio. Angĩkorũo nĩ maraikarania na mũndũ marĩ ta mũthuri na mũtumia, magĩrĩire gũkorũo mahikanĩtie kĩĩwatho.​—Mat. 19:9; 1 Kor. 6:9, 10; 1 Tim. 3:2, 12; Ahib. 13:4.

5. (5) Akorũo nĩ athĩkagĩra watho wa Bibilia wĩgiĩ ũrĩĩu na ndahũthagĩra ndawa cia kũrebia kana indo ingĩ ingĩthũkia mwĩcirĩrie wake.​—2 Kor. 7:1; Ef. 5:18; 1 Pet. 4:3, 4.

6. (6) Akorũo nĩ onaga bata wa gwĩthema thiritũ njũru.​—1 Kor. 15:33.

7. (7) Akorũo atiganĩte na ndini ciothe cia maheeni iria angĩkorũo ananyitanĩra nacio. Akorũo atigĩte biũ gũthiaga na kũnyitanĩra nacio kana gũciteithĩrĩria maũndũ-inĩ ma cio.​—2 Kor. 6:14-18; Kũg. 18:4.

8. (8) Akorũo nĩ atigĩte kũnyitanĩra na maũndũ mothe ma gĩũteti.​—Joh. 6:15; 15:19; Jak. 1:27.

9. (9) Akorũo etĩkĩtie na nĩ atũũraga kũringana na ũrĩa Isaia 2:4 yugĩte ũhoro-inĩ wĩgiĩ mbaara cia ndũrĩrĩ.

10. (10) Akorũo nĩ arenda biũ gũtuĩka Mũira wa Jehova.​—Thab. 110:3.

⁹ Angĩkorũo athuri matirĩ na ma na mawoni ma mũrutwo megiĩ ũndũ o wothe harĩ maũndũ macio, nĩ magĩrĩirũo kũmũũria, hihi makĩhũthĩra maandĩko macio monanĩtio hau marĩ mũthingi wa ndeereti yao. Nĩ ũndũ wa bata amenye atĩ no mũhaka arĩa manyitanagĩra na Aira a Jehova wĩra-inĩ wa kũhunjia matũũre kũringana na ithimi icio cia Kĩĩmaandĩko. Maũndũ marĩa ekuuga nĩ megũteithia athuri kuona kana nĩ aramenya maũndũ marĩa arerĩgĩrĩrũo gũkorũo ahingĩtie na kana nĩ amahingĩtie na gĩkĩro kĩrĩa kĩagĩrĩire nĩguo ambĩrĩrie kũhunjia.

¹⁰ Athuri nĩ magĩrĩirũo kũmenyithia mũrutwo o na ihenya kana nĩ aragĩrĩra. Kaingĩ athuri no mahote gwĩka ũguo thutha wa ndeereti ĩyo. Angĩkorũo nĩ aragĩrĩra, athuri no mamũnyite ũgeni atungate arĩ mũhunjia. (Rom. 15:7) Agĩrĩire gwĩkĩrũo ngoro kwambĩrĩria kũnyitanĩra wĩra-inĩ wa kũhunjia na ihenya o ũrĩa kũngĩhoteka na aneane riboti yake ya ũtungata mũico-inĩ wa mweri. Athuri no mamũtaarĩrie atĩ rĩrĩa mũrutwo wa Bibilia agĩrĩra gũtuĩka mũhunjia ũtarĩ mũbatithie na aruta riboti yake ya mbere ya ũtungata, nĩ ahingũragĩrũo kandi ĩrĩ na rĩĩtwa rĩake ya Rekodi ya Kutaniko ya Mhubiri na ĩkaigwo failo-inĩ ya kĩũngano. Athuri moragia mũhunjia we mwene ũhoro ũcio nĩguo ithondeka rĩhote kũrũmbũiya maũndũ ma kĩĩndini ma Aira a Jehova thĩinĩ wa thĩ yothe na nĩguo mũhunjia ũcio ahote kũnyitanĩra maũndũ-inĩ ma kĩĩroho na kũheo ũteithio wa kĩĩroho. Makĩria ma ũguo, athuri no maririkanie ahunjia erũ atĩ ũhoro o wothe wao ene ũrĩigagwo kũringana na mawatho megiĩ kũgitĩra ũhoro wa mũndũ (Global Data Protection Policy of Jehovah’s Witnesses) marĩa makoragwo thĩinĩ wa jw.org.

¹¹ Kũmenyana wega na mũhunjia ũcio mwerũ na kũmuonia atĩ nĩ tũrakenio nĩ maũndũ marĩa ahingĩtie, no gũkorũo na moimĩrĩro mega harĩ we. Ũndũ ũcio no ũmũtindĩke arutage riboti o mweri na ekĩre kĩyo makĩria harĩ gũtungatĩra Jehova.​—Afil. 2:4; Ahib. 13:2.

¹² Athuri mangĩona atĩ mũrutwo ũcio wa Bibilia nĩ agĩrĩire kwambĩrĩria kũhunjia, no aheo ibuku rĩa Ithondeka Rĩrĩa Rĩkaga Wendi wa Jehova. Aruta riboti yake ya mbere, kĩũngano nĩ kĩmenyithagio na njĩra nguhĩ atĩ nĩ atuĩkĩte mũhunjia ũtarĩ mũbatithie.

GŨTEITHIA ANDŨ ETHĨ

¹³ Ciana nini o nacio no ciagĩrĩre gũtuĩka ahunjia a ũhoro ũrĩa mwega. Jesu nĩ aanyitaga ũgeni ciana nini na agacirathima. (Mat. 19:13-15; 21:15, 16) O na gũtuĩka aciari nĩo maheetwo wĩra wa gũteithia ciana ciao, arĩa angĩ thĩinĩ wa kĩũngano no mateithĩrĩrie ciana iria irenda kuuma ngoro kũnyitanĩra harĩ wĩra wa kũhunjia ũhoro wa Ũthamaki. Angĩkorũo ũrĩ mũciari, kĩonereria gĩaku kĩega ũtungata-inĩ no gĩkĩre ngoro ciana ciaku gũkorũo irĩ na kĩyo ũtungata-inĩ wa Ngai. Angĩkorũo mwana nĩ arĩ mĩthiĩre mĩega na nĩ arenda kuuma ngoro kwĩraga andũ arĩa angĩ ũhoro wa maũndũ marĩa etĩkĩtie-rĩ, angĩteithĩrĩrio atĩa?

¹⁴ No ũkorũo ũrĩ ũndũ mwega harĩ mũciari gũthiĩ harĩ mũthuri ũmwe wa Kamĩtĩ ya Ũtungata ya Kĩũngano nĩguo marĩrĩrie kana mwana ũcio nĩ aragĩrĩra gũtuĩka mũhunjia. Mũtabarĩri wa kĩama gĩa athuri nĩ ekũbanga athuri erĩ (ũmwe wao arĩ wa kamĩtĩ ya ũtungata) macemanie na mwana ũcio hamwe na mũciari (aciari) kana ũrĩa maikaraga nake angĩkorũo nĩ Mũira wa Jehova. Mwana ũcio angĩkorũo na ũmenyo wa mũthingi wĩgiĩ ma cia Bibilia na onanie nĩ arenda kũnyitanĩra ũtungata-inĩ, ũndũ ũcio no wonanie atĩ nĩ arakũra kĩĩroho. Thutha wa kwarĩrĩria maũndũ macio na mangĩ marĩa mahutagia andũ agima, athuri acio erĩ nĩ mekũrora mone kana mwana ũcio no atuĩke mũhunjia ũtarĩ mũbatithie. (Luk. 6:45; Rom. 10:10) Rĩrĩa athuri mararia na mwana, hatingĩkorũo bata wa kwarĩrĩria maũndũ mamwe marĩa maragĩrĩrio na andũ agima no matihutĩtie mwana.

¹⁵ Athuri makĩaria na mwana ũcio, magĩrĩire kũmũgaathĩrĩria tondũ wa ũrĩa arakũra kĩĩroho na mamwĩkĩre ngoro eigĩre muoroto wa kũbatithio. Tondũ aciari nĩ merutanĩirie gũteithia mwana wao kũmenya ũhoro wa ma, o nao nĩ magĩrĩire kũgaathĩrĩrio. Nĩguo aciari mahote gũteithia mwana wao makĩria, athuri magĩrĩirũo kũmeera mathome gĩcunjĩ kĩa “Ũhoro Kũrĩ Aciari Akristiano,” kĩrĩa kĩrĩ karatathi-inĩ ka 179-181.

KWĨYAMŨRĨRA NGAI NA KŨBATITHIO

¹⁶ Angĩkorũo nĩ ũmenyete Jehova na ũkamwenda na njĩra ya gũtũũra kũringana na ithimi ciake na kũnyitanĩra ũtungata-inĩ, nĩ wagĩrĩirũo gwĩkĩra hinya o na makĩria ũrata waku nake. Na njĩra ĩrĩkũ? Na njĩra ya kũmwĩyamũrĩra na kuonania ũndũ ũcio kũgerera kũbatithio.​—Mat. 28:19, 20.

¹⁷ Kwamũra kuonanagia atĩ kĩndũ nĩ kĩigĩtwo mwanya nĩ ũndũ wa wĩra mũtheru. Kwĩyamũrĩra Ngai nĩ kuuga kwaria nake na njĩra ya mahoya ũkamwĩra atĩ ũrĩhũthagĩra ũtũũro waku ũtungata-inĩ wake na ũkarũmĩrĩra njĩra ciake. Nĩ kuuga atĩ nĩ ũrĩmũheaga wĩrutĩri wa ngoro yothe tene na tene. (Gũcok. 5:9) Ũcio nĩ ũndũ mũndũ ekaga arĩ wiki. Gũtirĩ mũndũ ũngĩgwĩkĩra ũndũ ũcio.

¹⁸ No makĩria ma kwĩra Jehova ũrĩ wiki atĩ nĩ ũrenda gũtuĩka wake, nĩ harĩ ũndũ ũngĩ ũbatiĩ gwĩka. Nĩ ũrabatara kuonia andũ arĩa angĩ atĩ nĩ wĩyamũrĩire Jehova. Ũkũmonia na njĩra ya kũbatithio na maĩ ta ũrĩa Jesu aabatithirio. (1 Pet. 2:21; 3:21) Angĩkorũo nĩ ũtuĩte itua rĩa gũtungatĩra Jehova na nĩ ũrenda kũbatithio-rĩ, wagĩrĩirũo gwĩka atĩa? Wagĩrĩire kwĩra mũtabarĩri wa kĩama gĩa athuri. Nĩ ekũbanga athuri maigana ũna marie nawe nĩguo matigĩrĩre atĩ nĩ ũhingĩtie ithimi cia Kĩĩmandĩko iria ibataranagia nĩguo mũndũ abatithio. Nĩguo wone ũhoro makĩria, rora gĩcunjĩ kĩa “Ũhoro Kũrĩ Mũhunjia Ũtarĩ Mũbatithie,” karatathi-inĩ ka 182-184 na “Ciũria Kũrĩ Arĩa Marenda Kũbatithio” karatathi-inĩ ka 185-207 thĩinĩ wa ibuku rĩrĩ.

KŨRUTA RIBOTI YA ŨTUNGATA

¹⁹ Kwa ihinda rĩa mĩaka mĩingĩ, riboti ciĩgiĩ gũtherema kwa ũthathaiya wa ma thĩinĩ wa thĩ nĩ ikoretwo igĩkĩra andũ a Jehova ngoro. Kuuma rĩrĩa Jesu Kristo eerire arutwo ake riita rĩa mbere atĩ ũhoro ũrĩa mwega nĩ ũngĩkahunjio thĩinĩ wa thĩ yothe, Akristiano a ma nĩ makoretwo makĩenda kũmenya ũrĩa ũndũ ũcio ũkaahinga.​—Mat. 28:19, 20; Mar. 13:10; Atũm. 1:8.

²⁰ Arũmĩrĩri a tene a Jesu nĩ maakenagĩra kũigua riboti ciĩgiĩ moimĩrĩro mega ma wĩra wa kũhunjia. (Mar. 6:30) Ibuku rĩa Atũmwo rĩtwĩraga atĩ andũ ta 120 nĩo maarĩ kuo rĩrĩa arutwo maaitĩrĩirio roho mũtheru hĩndĩ ya Pentekoste ya mwaka wa 33 M.M. Kahinda kanini thutha ũcio arutwo makĩongerereka magĩkinya ta 3,000 na thutha wa ihinda magĩkinya ta 5,000. Bibilia yugaga ũũ: “Jehova agĩthiĩ na mbere kuongerera harĩ o andũ arĩa maahonokagio o mũthenya” na “kĩrĩndĩ kĩnene kĩa athĩnjĩri-Ngai gĩkĩambĩrĩria gwathĩkĩra ũhoro wa wĩtĩkio.” (Atũm. 1:15; 2:5-11, 41, 47; 4:4; 6:7) Riboti ciĩgiĩ wongerereku ũcio no mũhaka ikorũo nĩ ciekĩrire arutwo ngoro mũno. No mũhaka ikorũo nĩ ciamateithirie mũno gũthiĩ na mbere na wĩra wa kũhunjia ũrĩa maaheetwo nĩ Ngai o na gũtuĩka atongoria a ndini ya Kĩyahudi nĩ maatũmaga manyarirũo mũno.

²¹ Kĩndũ mwaka wa 60-61 M.M., mũtũmwo Paulo aandĩkire marũa-inĩ make kũrĩ Akolosai atĩ ũhoro ũrĩa mwega nĩ ‘wagĩaga na maciaro na ũkongerereka thĩinĩ wa thĩ yothe,’ na ‘wahunjĩtio kũrĩ ũũmbi wothe mũhuro wa riũa.’ (Kol. 1:5, 6, 23) Akristiano a karine ya mbere nĩ maathĩkagĩra Kiugo kĩa Ngai, na roho mũtheru nĩ wamekĩrire hinya kũhunjia na njĩra nene mũno mbere ya mũico wa mũtabarĩre wa Kĩyahudi gũkinya mwaka wa 70 M.M. Hatarĩ nganja Akristiano acio ehokeku nĩ meekagĩrũo ngoro maigua riboti icio ciĩgiĩ maũndũ marĩa maahingagio.

²² Na njĩra o ta ĩyo, ithondeka rĩa Jehova mahinda-inĩ maya nĩ rĩĩrutanagĩria biũ kũiga rekondi cia wĩra ũrĩa ũrahingia Mathayo 24:14 ĩrĩa yugĩte ũũ: “Ũhoro ũyũ mwega wa Ũthamaki nĩ ũkaahunjio thĩ yothe ĩrĩa ĩikaragwo ũtuĩke ũira kũrĩ ndũrĩrĩ ciothe, na hĩndĩ ĩyo nĩrĩo mũico ũgaakinya.” Tũrĩ ndungata ciĩyamũrĩire Ngai, tũrĩ na wĩra ũrabatara kũrutwo na ihenya. Tũrĩ mũndũ ũmwe ũmwe, no mũhaka tũkorũo na wendi wa gũtigĩrĩra atĩ ũhoro mwega nĩ wahunjio kĩhinyio mbere ya mũico gũkinya. Jehova nĩ egũtigĩrĩra atĩ wĩra ũcio nĩ warĩka, na twanyita itemi wĩra-inĩ ũcio nĩ tũgwĩtĩkĩrĩka nĩwe.​—Ezek. 3:18-21.

RIBOTI YAKU YA ŨTUNGATA

²³ Twagĩrĩirũo kũruta riboti ĩgiĩ kĩĩ? Karatathi ka Riboti ya Ũtungata karĩa karutĩtwo nĩ ithondeka rĩa Jehova nĩ gakoragwo konanĩtie maũndũ marĩa magĩrĩire kũiyũrio. O na kũrĩ ũguo, maũndũ maya marũmĩrĩire no matũteithie.

²⁴ Harĩa handĩkĩtwo “Indo Iria Ũheanĩte (Iria Icabĩtwo na cia Intaneti-inĩ),” andĩka mũigana wa mabuku, ngathĩti, broshua, trakti, video, kana indo iria ũheete kana ũgatũmĩra andũ arĩa matarĩ Aira a Jehova abatithie. Harĩa handĩkĩtwo “Maita Marĩa Wonanĩtie Video,” andĩka maita marĩa wĩkĩte ũguo.

²⁵ Ũkĩiyũria harĩa handĩkĩtwo “Maita Marĩa Ũcokerete Andũ,” tara maita marĩa ũcokerete mũndũ ũtarĩ Mũira wa Jehova mũbatithie nĩguo ũkũrie wendi ũrĩa oonanĩtie hau kabere. No ũcokere mũndũ na njĩra ya kũmũceerera, kũmwandĩkĩra marũa, kũmũhũũrĩra thimũ, kũmũtũmĩra ndũmĩrĩri na thimũ kana e-mail, kana kũmũtwarĩra mabuku. Rĩrĩa rĩothe weruta Bibilia na mũndũ nĩ ũbatiĩ gũtara atĩ nĩ wamũcokera. Mũciari no atare atĩ nĩ acokerete mũndũ riita rĩmwe o kiumia rĩrĩa atongoria ũthathaiya wa famĩlĩ kũrĩ na mwana ũtarĩ mũbatithie.

²⁶ O na gũtuĩka kaingĩ ahunjia mathomaga na mũrutwo wa Bibilia o kiumia, mũico wa mweri agĩrĩire gũtarũo arĩ mũrutwo ũmwe wa Bibilia. Ahunjia magĩrĩirũo kwandĩka mũigana wa andũ matiganĩte arĩa merutĩte Bibilia nao mweri ũcio. Arutwo a Bibilia arĩa mũndũ agĩrĩirũo gũtara nĩ nginya arĩa mateyamũrĩire Jehova na makabatithio. Ningĩ no ũtare wĩruti wa Bibilia ũngĩkorũo ũthomete na mũrũ kana mwarĩ wa Ithe witũ watigĩte kũhunjia wĩrĩtwo nĩ ũmwe wa kamĩtĩ ya ũtungata kana ũgathoma na mũndũ ũrabatithirio ica ikuhĩ no ndarĩkĩtie ibuku rĩa Kenera Ũtũũro Tene na Tene!

²⁷ Nĩ wega kũiyũria mũigana wa “Mathaa” ũrĩa wagĩrĩire. Mathaa marĩa wagĩrĩire kũiyũria nĩ marĩa ũhũthĩrĩte ũkĩhunjia nyũmba kwa nyũmba, ũgĩcokera na ũkĩĩruta Bibilia na andũ, kana ũkĩhũthĩra njĩra ingĩ cia kũhunjia ũrĩ ũtungata-inĩ kana maũndũ-inĩ ma o mũthenya ũkĩaria na andũ matarĩ Aira a Jehova abatithie. Ahunjia erĩ marĩ ũtungata-inĩ hamwe no matare mathaa marĩa mekũhũthĩra, no ũmwe wao nĩwe wagĩrĩire gũtara atĩ nĩ acokera kana eruta Bibilia na mũndũ. Aciari mangĩnyitanĩra gũthomithia ciana ciao hĩndĩ ya Ũthathaiya wa Famĩlĩ, o ũmwe wao no atare ithaa rĩmwe harĩ kiumia. Ariũ a Ithe witũ no matare ihinda rĩrĩa mekũhũthĩra makĩruta mĩario ya andũ othe. Mũndũ angĩkorũo agĩtaũra mĩario ya andũ othe, o nake no atare ihinda rĩrĩa ekũhũthĩra. Mahinda marĩa tũtagĩrĩirũo nĩ gũtara nĩ ta marĩa tũhũthagĩra tũkĩĩharĩria gũthiĩ ũtungata, tũrĩ mũcemanio-inĩ wa ũtungata, na tũgĩka maũndũ matahutanĩtie na ũtungata tũrĩ ũtungata-inĩ.

²⁸ O mũhunjia agĩrĩirũo kũhũthĩra thamiri yake ĩmenyeretio nĩ Bibilia rĩrĩa aratara mathaa marĩa ahũthĩra ũtungata-inĩ. Ahunjia amwe mahunjagia kũndũ kũrĩ na andũ aingĩ, nao angĩ mahunjagia kũndũ gũtarĩ na andũ aingĩ na kwoguo nĩ mahũthagĩra ihinda iraihu magĩthiĩ. Icigo cia kũhunjia itihaanaine na ahunjia monaga ũtungata wao na njĩra itiganĩte. Kĩama Kĩrĩa Gĩtongoragia gĩtiĩkĩragĩra ahunjia mawatho megiĩ ũrĩa megũtara mahinda marĩa mahũthĩra ũtungata-inĩ, na gũtirĩ mũndũ wamũrĩtwo atuagĩre arĩa angĩ ũndũ-inĩ ũcio.​—Mat. 6:1; 7:1; 1 Tim. 1:5.

²⁹ Mũndũ akĩiyũria ihinda rĩrĩa ahũthĩrĩte ũtungata-inĩ, agĩrĩirũo kũiyũria mathaa no ti ndagĩka. No angĩkorũo mũhunjia ndarĩ na ũhoti mũnene nĩ ũndũ wa ũkũrũ, akorũo ndangĩhota kuuma harĩa arĩ, akorũo arĩ mũciĩ-inĩ ũrĩa ũroraga andũ akũrũ na arwaru, kana ũndũ ũngĩ ta ũcio no etĩkĩrio aiyũrie ndagĩka 15, 30, kana 45. O na angĩhunjia ndagĩka 15 harĩ mweri nĩ agĩrĩirũo gũciyũria. Arĩtaragwo arĩ mũhunjia ũrutaga riboti ategũtĩrĩria. Mũbango ũcio ningĩ nĩ ũhũthĩkaga harĩ mũhunjia wagĩte hinya kwa ihinda, hihi akaremwo nĩ gũthiĩ ihinda-inĩ rĩa mweri ũmwe kana mĩeri ĩigana ũna nĩ ũndũ wa ndwari nene kana kũgurara. Mũbango ũyũ nĩ wa arĩa tu marĩ na ũhoti mũnini mũno wa kũhunjia. Kamĩtĩ ya ũtungata nĩyo ĩtuaga kana mũhunjia no ahũthĩre mũbango ũcio.

KANDI YA REKODI YA KUTANIKO YA MHUBIRI

³⁰ Ũtungata waku wa o mweri ũiyũragio thĩinĩ wa kandi ya Rekodi ya Kutaniko ya Mhubiri. Rekondi icio ikoragwo irĩ cia kĩũngano gĩa kwanyu. Angĩkorũo nĩ ũrabanga gũthamĩra kĩũngano kĩngĩ, tigĩrĩra atĩ nĩ wamenyithia athuri a kĩũngano kĩanyu. Mwandĩki wa kĩũngano nĩ egũtigĩrĩra atĩ rekondi ciaku nĩ ciatũmwo kĩũngano-inĩ kĩrĩa ũgũthamĩra. Nĩ ũndũ ũcio, athuri a kĩũngano kĩrĩa wathamĩra nĩ mekũhota gũkũnyita ũgeni na magũteithĩrĩrie kĩĩroho. Angĩkorũo ũgũkorũo kũraihu na kĩũngano kĩanyu kwa ihinda rĩtakĩrĩtie mĩeri ĩtatũ, wagĩrĩirũo gũthiĩ na mbere gũtũma riboti ciaku cia ũtungata kĩũngano-inĩ kĩanyu.

KĨRĨA GĨTŨMAGA TŨRUTE RIBOTI CIA ŨTUNGATA

³¹ Hihi nĩ kũrĩ hĩndĩ ũriganagĩrũo nĩ kũruta riboti ya ũtungata? Hatarĩ nganja, rĩmwe na rĩmwe ithuothe nĩ tũbataraga kũririkanio. No tũngĩkũria mwerekera ũrĩa wagĩrĩire wĩgiĩ kũruta riboti na tũtaũkĩrũo nĩ gĩtũmi gĩa gwĩka ũguo, no ũkorũo ũrĩ ũndũ mũhũthũ kũririkanaga kũruta riboti citũ cia ũtungata.

³² Andũ amwe moragia ũũ: “Njagĩrĩirũo kũruta riboti kĩũngano-inĩ nĩkĩ na Jehova nĩ oĩ ũtungata ũrĩa ndĩmũrutagĩra?” Nĩ ma, Jehova nĩ oĩ ũtungata ũrĩa tũmũrutagĩra na nĩ oĩ kana ũtungata witũ nĩ wa ngoro yothe kana ti wa ngoro yothe. No ririkana atĩ Jehova nĩ aandĩkithirie mũigana wa thikũ iria Nuhu aaikarire thabina-inĩ na mũigana wa mĩaka ĩrĩa Aisiraeli maarĩ werũ-inĩ. Ningĩ nĩ aandĩkithirie mũigana wa andũ arĩa maarĩ ehokeku na arĩa maagire kũmwathĩkĩra. Nĩ aandĩkithirie ũrĩa Aisiraeli maathiaga makĩĩgwatagĩra bũrũri wa Kanaani na maũndũ marĩa maahingirio nĩ atiirĩrĩri bũrũri arĩa maarĩ ehokeku a Isiraeli. Jehova nĩ aandĩkithirie maũndũ maingĩ megiĩ ũrĩa ndungata ciake ciekire. Aandĩkithirie maũndũ macio meekĩkire kũgerera roho wake nĩguo tũmenye mawoni make megiĩ kũiga rekondi itarĩ na mahĩtia.

³³ Maũndũ ma tene marĩa mandĩkĩtwo Bibilia-inĩ monanagia ũrĩa riboti na rekondi iria ciaandĩkagwo nĩ andũ a Jehova ciarĩ nũngĩrĩru. Maũndũ maingĩ marĩa mandĩkĩtwo Bibilia-inĩ matingĩtaũkĩka wega hatarĩ na mũigana mũna ũgwetetwo. Ta wĩcirie ngerekano ici: Kĩambĩrĩria 46:27; Thama 12:37; Atiirĩrĩri Bũrũri 7:7; 2 Athamaki 19:35; 2 Maũndũ ma Matukũ ma Tene 14:9-13; Johana 6:10; 21:11; Atũmwo 2:41; 19:19.

³⁴ O na gũtuĩka riboti citũ itikoragwo na maũndũ mothe marĩa twĩkaga megiĩ ũthathaiya witũ harĩ Jehova, nĩ ihingagia ũndũ wa bata ithondeka-inĩ rĩa Jehova. Karine-inĩ ya mbere, rĩrĩa atũmwo a Jesu maacokire moimĩte kũhunjia, nĩ meerire Jesu “maũndũ marĩa mothe meekĩte na makarutana.” (Mar. 6:30) Rĩmwe riboti no cionanie atĩ harĩ maũndũ mamwe megiĩ ũtungata witũ marabatara kũrorũo. No cionanie atĩ o na gũtuĩka kũrĩ na wongerereku maũndũ-inĩ mamwe, harĩ maũndũ mangĩ macokete thĩ, ta wongerereku wa ahunjia. No gũkorũo andũ nĩ marabatara gwĩkĩrũo ngoro kana harĩ mathĩna marabatara kũrũngwo. Arori arĩa magĩrĩire nĩ maroraga riboti icio na makerutanĩria gũthondeka maũndũ marĩa mangĩkorũo makĩgirĩrĩria andũ kana kĩũngano gũthiĩ na mbere.

³⁵ Riboti ningĩ nĩ iteithagia ithondeka rĩa Jehova kũmenya nĩ kũ kũrĩ na bata mũnene wa ahunjia. Nĩ icigo irĩkũ irĩ na moimĩrĩro mega makĩria? Nĩ kũ gũtarĩ na moimĩrĩro mũno? Nĩ indo irĩkũ irabatarania nĩguo andũ merute ũhoro wa ma? Riboti nĩ iteithagia ithondeka rĩa Jehova kũmenya indo iria irabatarania cia kũhunjia icigo-inĩ itiganĩte thĩinĩ wa thĩ na gũtigĩrĩra atĩ indo icio irĩ kuo.

³⁶ Aingĩ aitũ nĩ twĩkĩragwo ngoro nĩ riboti. Na githĩ tũtikenaga rĩrĩa twaigua maũndũ marĩa aarĩ na ariũ a Ithe witũ marahingia makĩhunjia ũhoro ũrĩa mwega kũndũ guothe thĩinĩ wa thĩ? Riboti ciĩgiĩ wongerereku nĩ itũmaga tũgĩe na mbica njega ya ũrĩa ithondeka rĩa Jehova rĩratherema. Maũndũ marĩa monetwo nĩ matũmaga tũkene na twĩkĩre kĩyo wĩra-inĩ wa kũhunjia. (Atũm. 15:3) Kũruta riboti nĩ kwa bata mũno na nĩ kuonanagia atĩ nĩ tũreciria aarĩ na ariũ a Ithe witũ a thĩ yothe. Rĩrĩa tweka ũguo nĩ tuonanagia atĩ nĩ twathĩkagĩra mũbango wa ithondeka rĩa Jehova.​—Luk. 16:10; Ahib. 13:17.

KWĨIGĨRA MĨOROTO

³⁷ Tũtiagĩrĩire kũringithania ũtungata witũ na wa mũndũ ũngĩ. (Gal. 5:26; 6:4) Maũndũ maitũ matikoragwo mahaanaine. Ĩndĩ no tũgunĩke mũno tũngĩigĩra mĩoroto ĩrĩa tũngĩhota gũkinyĩra nĩguo ĩtũteithie gwĩthima ũrĩa tũrathiĩ na mbere ũtungata-inĩ. Gũkinyĩra mĩoroto ĩyo no gũtũme tũigue tũiganĩire nĩ ũndũ wa maũndũ marĩa tũhingĩtie.

³⁸ Hatarĩ nganja, Jehova nĩ arahanyũkia wĩra wa gũcokanĩrĩria arĩa akaagitĩra hĩndĩ ya ‘thĩna ũrĩa mũnene.’ Tũratũũra ihinda-inĩ rĩrĩa ũrathi ũyũ wa Isaia ũrahinga: “Ũrĩa mũnini agaatuĩka andũ ngiri nake ũrĩa mũnyinyi atuĩke rũrĩrĩ rũrĩ hinya. Niĩ mwene, Jehova, nĩ ngaahĩka ũndũ ũcio ihinda-inĩ rĩaguo.” (Kũg. 7:9, 14; Isa. 60:22) Nĩ gĩtĩo kĩnene mũno gũkorũo tũrĩ ndungata cia ũhoro ũrĩa mwega matukũ-inĩ maya ma kũrigĩrĩria!​—Mat. 24:14.