Coka Harĩ “Mũrĩithi na Mũrori wa Mĩoyo Yanyu”

GĨA na ma atĩ Jehova nĩ egũkorũo hamwe nawe ũkĩoya makinya ma kũmũcokerera. Nĩ egũgũteithia kũhiũrania na mĩtangĩko, gũtooria marakara, na kũgĩa na thayũ wa ngoro na meciria ũrĩa uumanaga na gũkorũo na thamiri theru. Weka ũguo nĩ ũkũigua ũkĩenda rĩngĩ gũtungatĩra Jehova ũrĩ hamwe na ndungata ciake. Ũgũkorũo ũhaana ta Akristiano amwe a karine ya mbere arĩa mũtũmwo Petero aandĩkĩire ũũ: “Mwahanaga ta ngʼondu irora njĩra, no rĩu nĩ mũcokete harĩ mũrĩithi na mũrori wa mĩoyo yanyu.”—1 Petero 2:25.

Gũcokerera Jehova nĩguo ũndũ ũrĩa mwega mũno ũngĩĩka. Nĩkĩ? Nĩ ũgũkenia ngoro ya Jehova. (Thimo 27:11) O ta ũrĩa ũũĩ, Jehova no akenio kana arakario nĩ ciĩko citũ. Jehova ndatwĩraga tũmwende na tũmũtungatĩre kĩa hinya. (Gũcokerithia Maathani 30:19, 20) Mũndũ ũmwe ũthomeire ũhoro wa Bibilia oigire atĩ: “Gũtirĩ mũndũ ũngĩhota kũhingũra ngoro yaku, no ũmĩhingũrire arĩ we.” Tũngĩtungatĩra Jehova nĩ ũndũ wa wendo, no tũhote kũhingũra ngoro citũ. Rĩrĩa tweka ũguo, tũmũheaga kĩheo kĩa goro, nĩkĩo wĩkindĩru witũ, na tũgatũma ngoro yake ĩiyũrũo nĩ gĩkeno. Gũtirĩ ũndũ ũngĩ tũngĩringithania na gĩkeno kĩrĩa tũgĩaga nakĩo rĩrĩa tũrahe Jehova ũthathaiya ũrĩa ũmwagĩrĩire.—Atũmwo 20:35; Kũguũrĩrio 4:11.

Makĩria ma ũguo, wacokerera ũthathaiya wa Gĩkristiano, mabataro maku ma kĩĩroho nĩ mekũrũmbũiyo. (Mathayo 5:3) Na njĩra ĩrĩkũ? Andũ kũndũ guothe thĩinĩ wa thĩ nĩ meyũragia atĩrĩ, ‘Twoimire kũ?’ Nĩ mendaga mũno kuona macokio ma ciũria ciĩgiĩ muoroto wa ũtũũro. Andũ meyũragia ũguo tondũ Jehova aamombire marĩ na bata ũcio thĩinĩ wao. Aatũmbire tũiguage tũiganĩire nĩ ũndũ wa kũmũtungatĩra. Gũtirĩ gĩkeno kĩngĩ tũngĩona gũkĩra kĩrĩa kiumanaga na kũmenya atĩ tũratungatĩra Jehova nĩ ũndũ wa kũmwenda.—Thaburi 63:1-5.

Nĩ tũkwenda ũmenye atĩ Jehova nĩ arenda ũmũcokerere. Ũngĩkorũo na ma atĩa igũrũ rĩgiĩ ũndũ ũcio? Ta wĩcirie ũndũ ũyũ: Broshua ĩno yahaarĩirio thutha wa kũhoya mũno. Wamenyire ũhoro wayo hihi kũgerera mũthuri wa kĩũngano kana Mũkristiano ũngĩ. Ũkĩĩrirĩria kũmĩthoma na kũrũmĩrĩra ndũmĩrĩri ĩrĩa ĩrĩ thĩinĩ wayo. Maũndũ macio mothe maronania atĩ Jehova ndarĩ aariganĩrũo nĩ wee. Ngũrani na ũguo, arakũgucĩrĩria kũrĩ we na njĩra ya wendo.—Johana 6:44.

Nĩ tũũmagĩrĩrio twamenya atĩ Jehova ndariganagĩrũo nĩ ndungata ciake iria ciũrĩte. Mwarĩ wa Ithe witũ wĩtagwo Donna nĩ aamenyire ũndũ ũcio. Oigire ũũ: “Nĩ ndatiganĩirie ũhoro wa ma o kahora, no kaingĩ nĩ ndaririkanaga Thaburi 139:23, 24 ĩrĩa yugaga atĩrĩ: ‘Thuuthuuria, Mũrungu, ũmenye ngoro yakwa; ngeria, ũmenye maũndũ marĩa ndĩrathugunda, wone kana thĩinĩ wakwa nĩhagĩĩte na njĩra ya kwĩreherere kĩeha, ũkĩndware o na njĩra ĩrĩa ĩtarĩ gĩturi.’ Nĩ ndaamenyaga atĩ ndirĩ wa thĩ ĩno, ndĩnjagĩrĩire o na hanini, na ngamenya atĩ ndabatiĩ gũkorũo ndĩ ithondeka-inĩ rĩa Jehova. Ngĩambĩrĩria kuona atĩ Jehova aarĩ o hamwe na niĩ; ũndũ ũrĩa ndaabataraga nĩ gũcoka kũrĩ we. Na nĩ ngenaga mũno nĩ ũndũ nĩ ndekire ũguo!”

Ihoya ritũ nĩ atĩ o nawe nĩ ‘ũgũkenera Jehova’ o rĩngĩ. (Nehemia 8:10) Ndũrĩ hĩndĩ ũkerira nĩ ũndũ wa gũcokerera Jehova.