GĨCUNJĨ KĨA WĨRUTI KĨA 26
“Njokererai”
“Njokererai, na niĩ nĩ ngũmũcokerera.”—MAL. 3:7.
RWĨMBO NA. 102 ‘Teithagiai Arĩa Matarĩ Hinya’
GĨCUNJĨ-INĨ GĨKĨa
1. Jehova aiguaga atĩa rĩrĩa ndungata ĩmwe yake yambĩrĩria kũmũtungatĩra rĩngĩ?
O TA ũrĩa tuoonire gĩcunjĩ-inĩ kĩrĩa kĩhĩtũku, Jehova eringithanagia na mũrĩithi mwega ũrĩa ũrũmbũyagia o ĩmwe ya ngʼondu ciake na wendo. Ningĩ nĩ acaragia ngʼondu o yothe yũrĩte. Jehova eerire Aisiraeli arĩa maamũtigĩte ũũ: “Njokererai, na niĩ nĩ ngũmũcokerera.” Nĩ tũĩ atĩ ũguo noguo Jehova aiguaga tondũ oigĩte ũũ: “Niĩ ndigarũrũkaga.” (Mal. 3:6, 7) Jesu ooigire atĩ Jehova na araika nĩ makenaga mũno rĩrĩa ndungata ĩmwe ĩrorĩte yamũcokerera.—Luk. 15:10, 32.
2. Tũkwarĩrĩria maũndũ marĩkũ gĩcunjĩ-inĩ gĩkĩ?
2 Rekei twarĩrĩrie ngerekano ithatũ cia Jesu iria irĩ na ũrutani wa bata wĩgiĩ gũteithia andũ arĩa matigĩte gũtungatĩra Jehova. Nĩ tũkuona ngumo iria tũrabatara nĩguo tũhote gũteithia ngʼondu cia Jehova iria ciũrĩte imũcokerere. Ningĩ nĩ tũkuona nĩkĩ nĩ ũndũ wa bata gũteithia andũ arĩa matarĩ na hinya kĩĩroho.
GŨCARIA THENDI ĨRĨA YORĨTE
3-4. Nĩ kĩĩ gĩatũmire mũtumia ũrĩa ũgwetetwo thĩinĩ wa Luka 15:8-10 acarie abacĩrĩire thendi yake ya drakma ĩrĩa yorĩte?
3 Nĩ tũrabatara gwĩkĩra kĩyo gũcaria andũ arĩa marenda gũcokerera Jehova. Ngerekano-inĩ ĩrĩa ĩrĩ thĩinĩ wa Injiri ya Luka, Jesu nĩ aataarĩirie ũhoro wa mũtumia wacaririe thendi yake ya goro yorĩte ĩtagwo drakma. Ũndũ ũrĩa wa bata thĩinĩ wa ngerekano ĩyo nĩ ũrĩa aacaririe thendi ĩyo na kĩyo.—Thoma Luka 15:8-10.
4 Jesu nĩ aataarĩirie ũrĩa mũtumia ũcio aaiguire rĩrĩa oonire thendi yake ya goro ya drakma ĩrĩa yorĩte. Matukũ-inĩ ma Jesu, atumia amwe Ayahudi nĩ maaheaga mũirĩtu wao ũrĩa ũrahika thendi ikũmi cia drakma mũthenya wa ũhiki wake. No kũhoteke thendi ĩyo yorĩte yarĩ ĩmwe ya icio. Mũtumia ũcio eeciragia atĩ thendi ĩyo yagwĩte kũu thĩ. Kwoguo agĩakia tawa akĩmũrĩka no ndaamĩonire. No kũhoteke tawa wake wa maguta ndwarĩ na ũtheri wa kũigana ũngĩamũhotithirie kuona gathendi kau kanini. Mũthia-inĩ, akĩhaata nyũmba yake yothe abacĩrĩire. Arora gĩko-inĩ kĩu aahatire, akĩona thendi yake ya goro ya drakma ĩkĩhenia nĩ ũndũ wa ũtheri wa tawa. Ũndũ ũcio ũgĩtũma akene mũno. Agĩĩta arata na andũ a itũũra rĩake nĩguo amahe ũhoro ũcio mwega.
5. Nĩkĩ no ũkorũo ũrĩ ũndũ mũritũ kuona arĩa matigĩte kũnyitanĩra na kĩũngano?
5 O ta ũrĩa tũreruta na ngerekano ya Jesu, kuona kĩndũ kĩũrĩte nĩ kũbataraga kĩyo kĩingĩ. Ũndũ ũmwe na ũcio, no tũbatare gwĩkĩra kĩyo kĩingĩ nĩguo tuone andũ arĩa matigĩte kũnyitanĩra na kĩũngano. No makorũo maniinĩte mĩaka mĩingĩ kuuma matiga kũnyitanĩra na ithuĩ. O na no makorũo mathamĩire gĩcigo-inĩ kĩngĩ kũrĩa matoĩo nĩ ariũ a Ithe witũ a kũu. No tũrĩ na ma atĩ gũkinyĩria rĩu amwe ao nĩ marerirĩria gũcokerera Jehova. Nĩ mendaga gũtungatĩra Jehova rĩngĩ hamwe na aarĩ na ariũ a Ithe witũ, ĩndĩ nĩ tũrabatara kũmateithia nĩguo mahote gwĩka ũguo.
6. Andũ othe thĩinĩ wa kĩũngano mangĩkorũo na itemi atĩa harĩ gũcaria arĩa matigĩte kũnyitanĩra na kĩũngano?
6 Hihi nĩa mangĩkorũo na itemi harĩ gũcaria andũ arĩa matigĩte kũnyitanĩra na kĩũngano? Ithuothe, ũguo nĩ kuuga athuri a kĩũngano, mapainia, andũ a famĩlĩ, na ahunjia arĩa angĩ thĩinĩ wa kĩũngano no tũteithĩrĩrie kũmacaria. Hihi nĩ ũĩ mũrata kana mũndũ wa famĩlĩ ũtigĩte kũnyitanĩra na kĩũngano? Hihi wanacemania na mũndũ ũtigĩte kũnyitanĩra na kĩũngano ũkĩhunjia nyũmba kwa nyũmba kana kũndũ kwa mũingĩ? Mũndũ ũcio angĩtĩkĩra gũkũhe namba yake ya thimũ, nĩguo ũtwarĩre athuri a kĩũngano kĩanyu, no wĩke ũguo.
7. Ũreruta atĩa kuumana na ciugo cia mũthuri ũmwe wa kĩũngano wĩtagwo Thomas?
7 Nĩ maũndũ marĩkũ athuri a kĩũngano mangĩka nĩguo mahote kuona andũ arĩa marenda gũcokerera Jehova? Rora wone ciugo cia mũthuri ũmwe wa kĩũngano wĩtagwo Thomas,b ũrĩa ũikaraga bũrũri-inĩ wa Spain. Nĩ ateithĩtie makĩria ma Aira a Jehova 40 kũnyitanĩra rĩngĩ na kĩũngano. Thomas ooigire ũũ: “Wa mbere, njũragia aarĩ na ariũ a Ithe witũ kana nĩ moĩ kũrĩa andũ arĩa matigĩte kũnyitanĩra na kĩũngano maikaraga. Kana ngoria ahunjia kana nĩ moĩ mũndũ ũtakoretwo agĩũka mĩcemanio-inĩ. Andũ aingĩ thĩinĩ wa kĩũngano nĩ makenaga gũteithĩrĩria, tondũ nĩ monaga atĩ o nao marĩ na itemi harĩ gũcaria andũ acio. Thutha ũcio, rĩrĩa ndaceerera aarĩ na ariũ a Ithe witũ acio matigĩte kũnyitanĩra na kĩũngano, nĩ ndĩmoragia ũhoro wĩgiĩ ciana ciao na andũ angĩ ao a famĩlĩ. Andũ amwe arĩa matigĩte kũnyitanĩra na kĩũngano nĩ mookaga na ciana ciao mĩcemanio-inĩ, na ciana icio no kũhoteke kũrĩ hĩndĩ ciatungataga irĩ ahunjia. O nacio nĩ ciagĩrĩire gũteithio icokerere Jehova.”
GŨTEITHĨRĨRIA GŨCOKIA CIANA CIA JEHOVA IRIA CIŨRĨTE
8. Ngerekano-inĩ ya mwanake ũrĩa worĩte thĩinĩ wa Luka 15:17-24, ithe aarũmbũyanirie atĩa na mũriũ ũcio werirĩte?
8 Nĩ ngumo irĩkũ arĩ o mũhaka tũkorũo nacio nĩguo tũhote gũteithia andũ arĩa marenda gũcokerera Jehova? Rekei tuone maũndũ marĩa tũngĩĩruta kuumana na ngerekano ya Jesu ya mwanake ũrĩa worire mũciĩ. (Thoma Luka 15:17-24.) Jesu nĩ aataarĩirie ũrĩa mũthia-inĩ mwanake ũcio oonire atĩ nĩ aahĩtĩtie na agĩtua itua rĩa gũcoka mũciĩ. Ithe aatengʼerire gũthiĩ gũtũnga mũrũwe na akĩmũhĩmbĩria, kũmuonia atĩ nĩ aamwendete. Mwanake ũcio nĩ aathumbũragwo nĩ thamiri na oonaga atagĩrĩire gwĩtwo mũriũ wake. Mũriũ ũcio nĩ aaitũrũrĩire ithe maũndũ marĩa maarĩ ngoro-inĩ yake, na ithe akĩmũcaĩra. Ithe agĩcoka agĩka ũndũ watũmire mũriũ ũcio one atĩ nĩ aanyitĩtwo ũgeni mũciĩ arĩ ũmwe wa famĩlĩ ĩyo, no ti ta mũruti wĩra. Nĩguo ithe onanie atĩ nĩ eendete mũriũ na nĩ aamwamũkĩrĩte nĩ aahaarĩirie iruga na akĩhe mũriũ ũcio werirĩte nguo njega.
9. Nĩ ngumo irĩkũ arĩ o mũhaka tũkorũo nacio nĩguo tũteithie andũ arĩa matigĩte kũnyitanĩra na kĩũngano macokerere Jehova? (Rora gathandũkũ “Ũrĩa Tũngĩteithia Arĩa Marenda Gũtungatĩra Jehova Rĩngĩ.”)
9 Jehova atariĩ ta mũthuri ũcio ũgwetetwo ngerekano-inĩ ĩyo. Nĩ endete aarĩ na ariũ a Ithe witũ arĩa matigĩte kũnyitanĩra na kĩũngano na nĩ endaga mamũcokerere. Tũngĩĩgerekania na Jehova no tũmateithie mamũcokerere. Ũndũ ũcio nĩ ũbataraga tũkorũo na wetereri, ũcayanĩri, na wendo. Nĩkĩ nĩ twagĩrĩirũo kuonania ngumo icio, na tũngĩka ũguo atĩa?
10. Nĩkĩ nĩ tũrabatara gũkorũo na wetereri rĩrĩa tũrateithia mũndũ gũcokerera Jehova?
10 No tũbatare gũkorũo na wetereri tondũ mũndũ no oe ihinda inene agĩkahona kĩĩroho. Andũ aingĩ arĩa manakorũo matekũnyitanĩra na kĩũngano nĩ moigaga atĩ maambĩrĩirie rĩngĩ kũnyitanĩra na kĩũngano thutha wa gũceererũo maita maingĩ nĩ athuri na andũ angĩ kĩũngano-inĩ. Mwarĩ wa Ithe witũ ũmwe wĩtagwo Nancy kuuma Asia aandĩkire ũũ: “Mũrata ũmwe wakwa wa hakuhĩ kĩũngano-inĩ nĩ aandeithirie mũno. Aanyendete o ta ũrĩa angĩenda mwarĩ wa nyina ũrĩa mũkũrũ. Nĩ aandirikanagia maũndũ maingĩ mega twaneka nake hau kabere. Nĩ aathikagĩrĩria arĩ na wetereri rĩrĩa ndĩramũitũrũrĩra ngoro yakwa na nĩ aaheaga ũtaaro rĩrĩa ndĩrabatara. Nĩ oonanirie atĩ aarĩ mũrata wa ma, na nĩ eehaarĩirie kũndeithia hĩndĩ o yothe.”
11. Nĩkĩ nĩ tũrabatara ũcayanĩri nĩguo tũhote gũteithia mũndũ ũraigua arakarĩte?
11 Mũndũ ũrakarĩte no aringithanio na mũndũ ũgurarĩtio. Ũcayanĩri ũtariĩ ta ndawa ĩrĩ na hinya ĩngĩteithia mũndũ ũcio kũhona. Andũ amwe arĩa matigĩte kũnyitanĩra na kĩũngano no maiguaga marakarĩte nĩ ũndũ wa ũndũ meekirũo nĩ mũndũ thĩinĩ wa kĩũngano. Ũndũ ũcio nĩ ũtũmaga mage kwĩrirĩria gũcokerera Jehova. Amwe no gũkorũo monaga atĩ nĩ meekirũo ũndũ ũtarĩ wa kĩhooto. No mabatare mũndũ ũkũmathikĩrĩria na ataũkĩrũo nĩ ũrĩa maraigua. (Jak. 1:19) María ũrĩa watigĩte kũnyitanĩra na kĩũngano hĩndĩ ĩmwe ooigire ũũ: “Nĩ ndaabataraga mũndũ ũgũthikĩrĩria na anyũmĩrĩrie, na ahe ũtaaro na andeithĩrĩrie.”
12. Heana ngerekano ĩronania ũrĩa wendo wa Jehova ũgucagĩrĩria andũ arĩa matigĩte kũnyitanĩra na kĩũngano mambĩrĩrie gwĩka ũguo rĩngĩ.
12 Bibilia yonanagia atĩ wendo wa Jehova harĩ andũ ake ũtariĩ ta mũkwa kana mũhĩndo. Hihi nĩ na njĩra ĩrĩkũ wendo wa Jehova ũtariĩ ta mũkwa? Ta wĩcirie ngerekano ĩno: Ta hũũra mbica ũgwĩte iria-inĩ. Iria rĩrĩ na makũmbĩ manene na maĩ nĩ mahehu. Na nĩ wambĩrĩirie kũrikĩra. Mũndũ ũrĩ gatarũ-inĩ agagũikĩria kĩndũ ũngĩĩnyitĩrĩra nĩguo ndũkarikĩre na thĩ. Ũgakena mũno. No nĩguo ũhonoke nĩ ũrabatara ũndũ ũngĩ makĩria. Nĩ ũrabatara kuuma maĩ-inĩ macio. Andũ arĩa marĩ gatarũ-inĩ nĩ marabatara gũgũikĩria mũkwa nĩguo magũteithie ũingĩre gatarũ-inĩ. Jehova ooigire ũũ igũrũ rĩgiĩ Aisiraeli arĩa maamwehereire: “Ndaikaraga ngĩmagucagia . . . na mĩhĩndo ya wendo.” (Hos. 11:4) Ũguo noguo Ngai aiguaga mahinda-inĩ maya nĩ ũndũ wa andũ arĩa matigĩte kũmũtungatĩra, na arĩa mararikĩra nĩ ũndũ wa mathĩna na mĩtangĩko. Nĩ endaga mamenye atĩ nĩ amendete na nĩ endaga mamũcokerere. Na Jehova no akũhũthĩre, ũmateithie mone atĩ nĩ amendete.
13. Kĩonereria gĩa Pablo kĩronania atĩa atĩ wendo witũ no ũtũme andũ arĩa angĩ macokerere Jehova?
13 Nĩ ũndũ wa bata kũreka andũ arĩa matigĩte kũnyitanĩra na kĩũngano mamenye atĩ Jehova nĩ amendete na o na ithuĩ nĩ tũmendete. Pablo, ũrĩa wagwetetwo gĩcunjĩ-inĩ kĩrĩa kĩhĩtũku, aatigĩte kũnyitanĩra na kĩũngano kwa makĩria ma mĩaka 30. Ooigire ũũ: “Ngiumagara rũcinĩ rũmwe, mwarĩ wa Ithe witũ ũmwe mũkũrũ nĩ ookire na akĩnjarĩria na njĩra ya wendo. Ngĩambĩrĩria kũrĩra ta kaana. Ngĩmwĩra atĩ kũroneka nĩ Jehova ũmũtũmire oke arie na niĩ. Hĩndĩ ĩyo nĩrĩo ndatuire itua rĩa gũcokerera Jehova.”
TEITHAGĨRĨRIA ARĨA MATARĨ NA HINYA ŨRĨ NA WENDO
14. Kũringana na ngerekano ĩrĩa ĩrĩ thĩinĩ wa Luka 15:4, 5, mũrĩithi eekire atĩa thutha wa kuona ngʼondu ĩrĩa yorĩte?
14 Nĩ tũrabatara gũthiĩ na mbere gũteithia na kũũmĩrĩria arĩa matigĩte kũnyitanĩra na kĩũngano. O ta mwanake ũrĩa worĩte ngerekano-inĩ ya Jesu, no makorũo na ironda nene cia ngoro ingĩoya ihinda iraihu kũhona. Ningĩ no makorũo matarĩ na hinya kĩĩroho nĩ ũndũ wa maũndũ marĩa manacemania namo thĩinĩ wa thĩ ĩno ya Shaitani. Nĩ tũrabatara kũmateithia mekĩre wĩtĩkio wao hinya harĩ Jehova. Thĩinĩ wa ngerekano ya ngʼondu ĩrĩa yorĩte, Jesu nĩ aataarĩirie ũrĩa mũrĩithi thutha wa kuona ngʼondu ĩyo amĩigagĩrĩra ciande-inĩ ciake akamĩcokia rũũru-inĩ. Mũrĩithi ũcio nĩ ambĩte akahũthĩra mahinda na hinya wake gwetha ngʼondu ĩyo. No akamenya nĩ arabatara kũmĩkuua amĩcokie rũũru-inĩ, tondũ ndĩrĩ na hinya wa gũcoka yo nyene.—Thoma Luka 15:4, 5.
15. Tũngĩteithĩrĩria atĩa andũ arĩa matarĩ na hinya kĩĩroho arĩa marenda gũcokerera Jehova? (Rora gathandũkũ “Kĩndũ kĩa Bata Tũngĩhũthĩra Kũmateithia.”)
15 No tũbatare kũhũthĩra mahinda na hinya witũ gũteithia andũ amwe arĩa matigĩte kũnyitanĩra na kĩũngano mahote gũtooria maũndũ marĩa magiragia matungatĩre Jehova rĩngĩ. No kũgerera roho wa Jehova, Kiugo gĩake, na mabuku marĩa tũheagwo kũgerera kĩũngano, no tũhote kũmateithia makorũo na hinya rĩngĩ kĩĩroho. (Rom. 15:1) Tũngĩka ũguo atĩa? Mũthuri ũmwe wa kĩũngano ũrĩ ũmenyeru ooigire ũũ: “Andũ aingĩ arĩa matigĩte kũnyitanĩra na kĩũngano, nĩ mabataraga kũrutwo Bibilia thutha wao gũtua itua atĩ nĩ marenda gũcokerera Jehova.”c Kwoguo ũngĩĩrũo wĩrute na mũndũ ũtaranyitanagĩra na kĩũngano-rĩ, na githĩ ti wega gwĩtĩkĩra mweke ũcio? Mũthuri ũcio ningĩ ooigire ũũ: “Mũhunjia ũrĩa ũreruta na mũndũ ũcio ũratigĩte kũnyitanĩra na kĩũngano nĩ arabatara gũkorũo arĩ mũrata mwega, ũndũ mũndũ ũcio angĩmwĩhoka na amũhingũrĩre ngoro.”
GĨKENO KŨRĨA IGŨRŨ NA GŨKŨ THĨ
16. Tũmenyaga atĩa atĩ araika nĩ matũteithagia?
16 Kũrĩ na maũndũ maingĩ meyoneirũo monanagia atĩ araika nĩ marutithanagia wĩra hamwe na ithuĩ, nĩguo matũteithie kuona andũ arĩa matigĩte kũnyitanĩra na kĩũngano marerirĩria gũcokerera Jehova. (Kũg. 14:6) Kwa ngerekano, Silvio, kuuma Ecuador, aahoyaga Jehova na kĩyo amũtũmĩre mũndũ amũteithie ambĩrĩrie kũnyitanĩra na kĩũngano rĩngĩ. O agĩthiaga na mbere kũhoya, akĩigua gwake kwahũũrũo hũndi. Athiĩ kũrora, akĩona nĩ athuri erĩ a kĩũngano. Hĩndĩ ya iceera rĩu, athuri acio nĩ maakenire kwambĩrĩria kũmũhe ũteithio ũrĩa aabataraga.
17. Tũrĩiguaga atĩa nĩ ũndũ wa gũteithia andũ arĩa matarĩ na hinya kĩĩroho?
17 Nĩ tũrĩgĩaga na gĩkeno kĩnene nĩ ũndũ wa gũteithia andũ arĩa matarĩ na hinya kĩĩroho macokerere Jehova. Ta rora ũrĩa Salvador, painia wĩrutanagĩria gũteithia andũ arĩa matigĩte kũnyitanĩra na kĩũngano ooigire: “Rĩmwe nĩ nemagwo kwĩgirĩrĩria gũita maithori nĩ ũndũ wa gũkena. Nĩ ngenaga mũno ndamenya atĩ Jehova nĩ ahonokia ngʼondu yake ĩmwe endete kuuma harĩ thĩ ya Shaitani, na atĩ ndĩrarĩ na gĩtĩo gĩa kũnyitanĩra hamwe nake wĩra-inĩ ũcio.”—Atũm. 20:35.
18. Angĩkorũo ndũkoretwo ũkĩnyitanĩra na kĩũngano-rĩ, nĩ ũndũ ũrĩkũ wagĩrĩirũo gũkorũo na ma naguo?
18 Angĩkorũo nĩ ũtigĩte kũnyitanĩra na andũ a Jehova, korũo na ma atĩ Jehova no akwendete. Nĩ arenda ũmũcokerere. No ũbatare gwĩkĩra kĩyo nĩguo ũmũcokerere. Ĩndĩ o ta mũthuri ũrĩa ũgwetetwo ngerekano-inĩ ya Jesu, Jehova nĩ etereire ũmũcokerere, na nĩ egũkwamũkĩra mũciĩ arĩ na wendo.
RWĨMBO NA. 103 Arĩithi nĩ Iheo
a Jehova endaga arĩa matigĩte kũnyitanĩra na kĩũngano mamũcokerere. No tũkorũo na itemi harĩ gwĩkĩra ngoro andũ arĩa marenda kwamũkĩra rĩĩtana rĩa Jehova rĩrĩa oigĩte: “Njokererai.” Gĩcunjĩ-inĩ gĩkĩ nĩ tũkwarĩrĩria ũrĩa tũngĩmateithia kũmũcokerera.
b Marĩĩtwa mamwe nĩ macenjetio.
c Andũ amwe arĩa matigĩte kũnyitanĩra na kĩũngano no mateithĩke mangĩĩruta icunjĩ imwe cia ibuku rĩa Ũrĩa Ũngĩtũũra Wendo-inĩ wa Ngai, angĩ nao nĩ magunĩkaga maathoma icunjĩ imwe thĩinĩ wa ibuku rĩa Kuhĩrĩria Jehova. Kamĩtĩ ya Ũtungata ya Kĩũngano nĩyo yagĩrĩirũo gũtua nũũ wagĩrĩire makĩria kwĩruta na mũndũ ta ũcio.
d GŨTAARĨRIA MBICA: Ariũ a Ithe witũ atatũ magĩteithĩrĩria mũrũ wa Ithe witũ ũrenda gũcokerera Jehova. Mareka ũguo na njĩra ya gũikara makĩaranagĩria nake na thimũ, kũreka amenye atĩ no endetwo, na kũmũthikĩrĩria na kinyi.