No Wĩkĩre Ngoro Mũkristiano Ũtigĩte Kũnyitanĩra na Kĩũngano

Mũthenya wa Njumaine Ĩpuro 11, Akristiano aingĩ arĩa matigĩte kũnyitanĩra na kĩũngano nĩ magoka Kĩririkano. Nĩ maambĩrĩirie gũtengʼera ihenya rĩa gwetha muoyo no rĩu makoretwo magĩthiĩ kahora nĩ ũndũ wa itũmi itiganĩte, imwe iria cionanĩtio thĩinĩ wa broshua Cokerera Jehova. (Ahi 12:1) O na kũrĩ ũguo, Akristiano acio no a bata mũno maitho-inĩ ma Jehova, ũrĩa wamagũrire na thakame ya Mũrũwe. (Atũ 20:28; 1Pe 1:18, 19) Tũngĩmateithia atĩa macoke kĩũngano-inĩ?

Athuri a kĩũngano nĩ merutanagĩria gwetha na gũteithia Akristiano arĩa matigĩte kũnyitanĩra na kĩũngano, o ta ũrĩa mũrĩithi acaragia ngʼondu na kĩyo ĩngĩũra kuuma rũũru-inĩ. (Lu 15:4-7) Ũndũ ũcio wonanagia ũrĩa Jehova amarũmbũyagia na njĩra ya wendo. (Jer 23:3, 4) To athuri a kĩũngano tu mangĩkĩra andũ ta acio ngoro, ithuothe no twĩke ũguo. Kĩyo gitũ gĩa kuonania atĩ nĩ tũrameciria na kũmacaĩra nĩ gĩkenagia Jehova na no gĩkorũo na moimĩrĩro mega. (Thi 19:17; Atũ 20:35) Nĩ ũndũ ũcio, wĩcirie nũ ũngĩkĩra ngoro na wĩke ũguo o na ihenya!

WĨRORERE VIDEO ĨKĨRA NGORO ARĨA MATIGĨTE KŨNYITANĨRA NA KĨŨNGANO, ŨCOKE ŨCOKIE CIŨRIA ICI:

• Nĩ ikinya rĩrĩkũ Abbey oire acemania na Mũira wa Jehova atoĩ?

• Twagĩrĩirũo kwaranĩria na athuri nĩkĩ angĩkorũo nĩ tũreciria gũteithia mũndũ ũtigĩte kũnyitanĩra na kĩũngano?

• Abbey eeharĩirie atĩa nĩguo acerere Laura rita rĩa kerĩ?

• Abbey onanirie atĩa kwaga gũkua ngoro, wetereri, na wendo rĩrĩa aageragia gũteithia Laura?

• Nĩ ũndũ ũrĩkũ tũngĩĩruta kuumana na ngerekano ya Jesu ĩrĩa ĩrĩ thĩinĩ wa Luka 15:8-10?

• Nĩ irathimo irĩkũ cionekire nĩ ũndũ wa andũ kũnyitanĩra harĩ gũteithia Laura?