Ũira Mũrũmu nĩ Ũkaarutwo
1. Makĩria ma mĩario-rĩ, nĩ kĩĩ kĩngĩ kĩngĩgucĩrĩria ageni arĩa mokĩte Kĩririkano? Taarĩria.
1 Rĩ? Hwaĩ-inĩ wa Kĩririkano gĩa gĩkuũ kĩa Jesu. Wĩra mũingĩ nĩ ũrutĩtwo kũnyita andũ ũgeni magooka tũnyitanĩre hamwe mũthenya ũcio. To ũhoro ũrĩa ageni maiguaga ũmagucagĩrĩria. Thutha wa gũthiĩ Kĩririkano gĩa gĩkuũ kĩa Jesu, mũtumia ũmwe aagwetire maũndũ marĩa wee eyoneire—ũrata ũrĩa warĩ na andũ arĩa maarĩ kuo, na nyũmba thaka na theru ĩrĩa yaakĩtwo na ĩkamenyererũo nĩ andũ a kwĩrutĩra. Kwoguo-rĩ, ithuothe, to mwaria wiki, nĩ tũkoragwo na itemi rĩa kũruta ũira mũthenya ũcio wa bata makĩria harĩ mwaka.—Ef. 4:16.
2. O ũmwe witũ angĩruta ũira atĩa kũrĩ ageni?
2 Geithia Ageni Ũcanjamũkĩte: Kũgeithia ageni tũcanjamũkĩte nĩ njĩra ya kũruta ũira. (Joh. 13:35) O na ũngĩremwo kwaria na andũ othe-rĩ, no wĩmenyithanie ũcanjamũkĩte harĩ andũ arĩa marĩ hakuhĩ nawe. (Ahib. 13:1, 2) Geria gwetha ageni arĩa maroneka ta matoĩ mũndũ o na ũrĩkũ. Kwahoteka no karatathi ga kũnyita andũ ũgeni maatigĩirũo. No ũmoorie ũũ: “Rĩrĩ nĩrĩo riita rĩaku rĩa mbere gũũka gũkũ?” Mete mũikaranie, na wĩrutĩre kũmacokeria ciũria o ciothe mangĩkorũo nacio. Angĩkorũo kĩũngano kĩanyu gĩkuuma o narua nĩguo kĩũngano kĩngĩ kĩhũthĩre nyũmba ĩyo-rĩ, no ũmeere ũũ: “No nyende kũigua ũrĩa wona mũcemanio ũcio. Tũngĩonana atĩa hĩndĩ ĩngĩ?”
3. Nĩ na njĩra ĩrĩkũ tũngĩnyita ũgeni arĩa matigĩte kũhunjia?
3 Nyita Ũgeni Arĩa Matigĩte Kũhunjia: Hatarĩ nganja, nĩ gũgaakorũo na ahunjia matigĩte kũhunjagia, o hamwe na arĩa mokaga o Kĩririkano tu. Manyite ũgeni, na ũreke mone atĩ na ma nĩ wakena nĩ kũmona. (Rom. 15:7) Thutha wa kahinda kanini, athuri a kĩũngano no mamaceerere kwao mĩciĩ na mamekĩre ngoro mathiĩ na mbere kũnyitanĩra na kĩũngano. Nĩ ihoya riitũ atĩ andũ aingĩ arĩa magooka nĩ magekĩrũo hinya magooce Ngai, to ũndũ wa ũhoro ũrĩa makaigua tu, no nĩ nginya maũndũ marĩa makoona ‘nĩ ũndũ wa mawĩra maitũ mega marĩa makeeyonera.’—1 Pet. 2:12.