Manyitei Ũgeni!
1. Nĩ hĩndĩ ĩrĩkũ tũgĩaga na mweke mwega mũno wa kũruta ũira, na nĩkĩ?
1 Hĩndĩ ya Kĩririkano kĩa o mwaka nĩ tũgĩaga na mweke mwega makĩria wa kũhunjia. Ta wĩcirie ũndũ ũyũ: Mwaka ũyũ tũrerĩgĩrĩra makĩria ma ageni milioni ikũmi magoka Kĩririkano-inĩ meiguĩre ũhoro wa ciĩko igĩrĩ cia wendo iria cionanĩtio kũgerera ũkũũri. (Joh. 3:16; 15:13) Nĩ makeruta ũhoro wĩgiĩ irathimo iria irĩ mbere yao nĩ ũndũ wa kĩheo kĩu kĩa Jehova. (Isa. 65:21-23) O na kũrĩ ũguo-rĩ, ũrĩa ũkaaheana mĩario towe wiki ũkaaruta ũira hĩndĩ ya Kĩririkano. Andũ othe nĩ magaakorũo na mweke wa kũruta ũira mũnene na njĩra ya kũnyita ageni ũgeni marĩ na ũcanjamũku.—Rom. 12:13.
2. Tũngĩnyita andũ ũgeni atĩa tũrĩ na ũcanjamũku?
2 Handũ ha gũikara thĩ tu na gweterera mũcemanio ũcio wambĩrĩrie-rĩ, githĩ ti wega kuoya ikinya rĩa mbere kũmenyana na arĩa maikarĩte hakuhĩ nawe? Ageni no makorũo na guoya tondũ matiũĩ ũrĩa gũgũthiĩ na mbere. Tũngĩmageithia tũcanjamũkĩte na tũrĩ na ũrata no meigue nĩ anyite ũgeni. Nĩguo ũmenye kana mũndũ okĩte tondũ wa kũheo karatathi ga kũnyita andũ ũgeni, no ũmũũrie kana rĩu nĩrĩo riita rĩake rĩa mbere gũũka mĩcemanio-inĩ itũ na kana kũrĩ na mũndũ oĩ thĩinĩ wa kĩũngano. No ũmũũrie mũikaranie nĩgetha mũhũthĩre Bibilia na ibuku rĩaku rĩa rwĩmbo. Angĩkorũo mũrahũthĩra Nyũmba ya Ũthamaki, no ũmũcerangie hanini thĩinĩ wayo. Thutha wa mĩario, tigĩrĩra nĩ muonana nĩguo ũmũcokerie ciũria iria angĩkorũo nacio. Angĩkorũo kĩũngano kĩanyu gĩkuuma o narua nĩguo kĩhe kĩũngano kĩngĩ mweke wa gũcemania-rĩ, no ũmwĩre ũũ: “No nyende kũigua mawoni maku megiĩ mũcemanio ũcio. Hihi tũngĩonana atĩa?” Ũcoke ũbange ũrĩa mũngĩaranĩria mũthenya ũngĩ. Makĩria athuri a kĩũngano nĩ makaabatara gũtigĩrĩra nĩ mekĩra ngoro ahunjia arĩa maatigire kũhunjia arĩa magoka Kĩririkano-inĩ.
3. Nĩkĩ nĩ ũndũ wa bata tũkeerutanĩria kũnyita andũ ũgeni hĩndĩ ya Kĩririkano?
3 Harĩ ageni aingĩ, rĩgaakorũo rĩrĩ riita rĩao rĩa mbere kwĩyonera gĩkeno, thayũ, na ũrũmwe wa paradiso ya kĩĩroho ĩrĩa ithuĩ andũ a Jehova tũkenagĩra. (Thab. 29:11; Isa. 11:6-9; 65:13, 14) Hihi ageni magaathiĩ na mbica ĩrĩkũ? Ũndũ ũcio ũkaaringana na ũrĩa tũkerutanĩria kũmanyita ũgeni.