Kũgĩa Mwana Thutha wa Gweterera

Iburahimu na Sara maaikarĩte kĩhiko-inĩ mĩaka mĩingĩ. Nĩ maatigĩte mũciĩ wao mwega taũni-inĩ ya Uru na maaikaraga hema-inĩ. No Sara ndeeriraga nĩ ũndũ wa gũtiga mũciĩ wao mwega tondũ aarĩ na wĩtĩkio harĩ Jehova.

Sara nĩ eeriragĩria mũno kũgĩa mwana nginya akĩra Iburahimu ũũ: ‘Ũngĩgĩa mwana na Hagari ndungata yakwa, ingĩona mwana ũcio ta arĩ wakwa.’ Thutha wa ihinda, Hagari nĩ aagĩire na kahĩĩ getagwo Ishumaeli.

Mĩaka mĩingĩ thutha ũcio, Iburahimu arĩ na mĩaka 99 na Sara arĩ na 89, nĩ maaceereirũo nĩ ageni atatũ. Iburahimu nĩ aamanyitire ũgeni maikare rungu rwa mũtĩ nĩguo marĩanĩre. Hihi nĩ ũĩ ageni acio maarĩ a? Maarĩ araika! Meerire Iburahimu ũũ: ‘Mwaka ũyũ ũngĩ ihinda o ta rĩrĩ, mũrĩ na mũtumia waku nĩ mũgaakorũo mũgĩĩte mwana wa kahĩĩ.’ Sara aarĩ hema-inĩ, no nĩ aaiguaga ũrĩa maaugaga. Aathekire na ngoro akĩĩyũria: ‘Niĩ no ngĩe mwana o na ndĩ mũkũrũ ũũ?’

Mwaka ũrĩa warũmĩrĩire, Sara nĩ aagĩire na kahĩĩ o ta ũrĩa mũraika wa Jehova aameerĩte. Iburahimu eetire kahĩĩ kau Isaaka, rĩĩtwa rĩrĩa riugĩte “Mĩtheko.”

Isaaka arĩ na mĩaka ta ĩtano ũguo, Sara nĩ oonire atĩ Ishumaeli nĩ aanyũrũragia Isaaka. Tondũ Sara nĩ eendaga kũgitĩra Isaaka, aathiire kũrĩ Iburahimu na akĩmwĩra aingate Hagari na Ishumaeli. Kĩambĩrĩria-inĩ, Iburahimu ndeendaga kũmaingata. No Jehova aamwĩrire ũũ: ‘Thikĩrĩria ũrĩa Sara arakwĩra. Nĩ ngũmenyerera Ishumaeli, no ciĩranĩro ciakwa ngaacihingia kũgerera harĩ Isaaka.’