Jesu Gũtheria Hekarũ

Kũrĩ kĩndũ mweri wa Ĩpuro, mwaka-inĩ wa 30 Mahinda Maitũ (M.M.), Jesu nĩ aathiire Jerusalemu. Andũ aingĩ nĩ maathiĩte kuo nĩguo magakũngũĩre Pasaka. Nĩguo makũngũĩre gĩkũngũĩro kĩu, nĩ maarutaga magongona hekarũ-inĩ. Andũ amwe nĩ maathiaga na nyamũ cia kũruta magongona, nao angĩ maacigũraga o kũu Jerusalemu.

Rĩrĩa Jesu aathiire hekarũ-inĩ, aakorire andũ makĩenderia nyamũ kuo. Maahũũragĩra biacara nyũmba-inĩ ya Jehova ya ũthathaiya. Jesu eekire atĩa? Aathondekire mũcarica wa mĩkanda na akĩrutũrũra mbũri na ngʼombe iria cieendagĩrio kuo. Akĩngʼaũrania metha cia arĩa maakũũranagia mbeca, na akĩharagania mbeca ciao. Agĩcoka akĩra arĩa meendagia ndutura ũũ: ‘Eheriai indo ici gũkũ! Tigai gũtua nyũmba ya Awa nyũmba ya biacara!’

Andũ arĩa maarĩ hekarũ-inĩ nĩ maagegirio nĩ ũrĩa Jesu eekire. Arutwo ake nĩ maaririkanire ũrathi wĩgiĩ Mesia ũrĩa woigĩte ũũ: ‘Nĩ ngaakorũo na kĩyo harĩ nyũmba ya Jehova.’

Thutha ũcio, Jesu nĩ aatheririe hekarũ riita rĩa kerĩ mwaka-inĩ wa 33 M.M. Ndangĩarekire mũndũ o na ũmwe aagĩre nyũmba ya Ithe gĩtĩo.