Hihi Ũrĩ Wamenya?

Nĩ kĩĩ gĩatũmĩte gũkorũo na akũũrania a mbeca thĩinĩ wa hekarũ Jerusalemu?

▪ Kahinda kanini mbere ya gĩkuũ gĩake, Jesu nĩ oire ikinya nĩ ũndũ wa uungumania ũrĩa wathiaga na mbere hekarũ-inĩ. Bibilia yugaga ũũ: “Jesu . . . akĩrutũrũra arĩa othe maatũire mathogoranagĩra kũu hekarũ, akĩngʼaũrania metha cia arĩa maakũũranagia mbia, o na itĩ cia arĩa mendagia ndutura; agĩkĩmera, Ũhoro nĩwandĩkĩtwo, Nyũmba yakwa ĩgetagwo nyũmba ya kũhoyagĩrũo: no inyuĩ nĩmũtũmĩte ĩtuĩke ngurunga ya atunyani.”—Mathayo 21:12, 13.

Ayahudi a karine ya mbere na andũ a Ndũrĩrĩ arĩa maagarũrĩte wĩtĩkio maakoragwo moimĩte mabũrũri-inĩ na mataũni-inĩ maingĩ magĩthiĩ hekarũ-inĩ Jerusalemu. Kwoguo mookaga na mbeca cia kũrĩa mooimaga. Ĩndĩ, nĩ harĩ mbeca iria cietĩkĩrĩtio kũrĩha igoti rĩa o mwaka rĩa hekarũ, kũgũra nyamũ cia kũruta magongona, na mĩhothi ĩngĩ. Kwoguo, andũ nĩ maarĩhagio magĩkũũranĩrio mbeca iria maakoragwo moimĩte nacio kũndũ gũtiganĩte makaheo mbeca iria ciaagĩrĩire. Ciathĩ cia Ayahudi ciakuhĩrĩria, akũũrania a mbeca nĩ maathondekaga tũthũnũ hekarũ-inĩ Gĩthaku-inĩ kĩa andũ a Ndũrĩrĩ.

Tondũ Jesu oigire atĩ akũũrania acio a mbeca nĩ maatuĩte hekarũ “ngurunga ya atunyani,” ũndũ ũcio wonanagia hatarĩ nganja atĩ nĩ maahahanyaga andũ mũno.