Jesu Kũruta Arutwo ake Kũhoya

Afarisai meekaga maũndũ mothe nĩguo makenie andũ. Mangĩekĩire mũndũ ũndũ mwega, mawĩkaga nĩguo monwo nĩ andũ. Maathiaga kũhoera kũrĩa andũ marĩ, nĩguo andũ mamone. Maaigaga mahoya maraihu meciria-inĩ, magacoka magathiĩ thunagogi-inĩ na magomano-inĩ ma njĩra gũcokera mahoya macio nĩguo andũ mamaigue. Nĩ ũndũ ũcio, andũ nĩ maamakire mũno rĩrĩa Jesu aameerire ũũ: ‘Mũtikahoyage ta Afarisai. Meciragia atĩ Ngai nĩ egũkena nĩ ũndũ wao kũhũthĩra ciugo nyingĩ, no ndakenaga. Jehova nowe tu wagĩrĩirũo kũmenya mahoya manyu. Mũtigacokagĩre maũndũ o marĩa marĩa. Jehova endaga mũmwĩre ũrĩa mũraigua ngoro-inĩ.

‘Mwagĩrĩirũo kũhoyaga ũũ: “Ithe witũ ũrĩ igũrũ, rĩĩtwa rĩaku nĩ rĩtherio. Ũthamaki waku nĩ ũũke. Wendi waku nĩ wĩkwo gũkũ thĩ o ta kũu igũrũ.”’ Ningĩ Jesu aameerire atĩ nĩ maagĩrĩirũo kũhoya maheo irio cia mũthenya ũcio, moherũo mehia mao, na mahoe igũrũ rĩgiĩ maũndũ mao kĩũmbe.

Jesu aacokire akĩmeera ũũ: ‘Mũtikanatige kũhoya. Thiĩi na mbere kwĩra Ithe wanyu Jehova amũhe indo njega. Gũtirĩ mũciari ũtendete kũhe ciana ciake indo njega. Mwana waku angĩkũhoya mũgate-rĩ, hihi no ũmũhe ihiga? Na angĩkũhoya thamaki-rĩ, hihi no ũmũhe nyoka?’

Jesu nĩ aacokire agĩtaarĩria ũrĩa eendaga kũrutana. Aaugire ũũ: ‘Angĩkorũo inyuĩ nĩ mũũĩ kũhe ciana cianyu iheo njega-rĩ, na githĩ Ithe wanyu Jehova ndarĩmũheaga roho mũtheru? Ũndũ ũrĩa mũrabatara gwĩka no kũhoya.’ Hihi wee nĩ ũrũmagĩrĩra ũtaaro ũcio wa Jesu? Ũhoyaga nĩ ũndũ wa maũndũ ta marĩkũ?