Jesu Kũhũnia Andũ Ngiri Nyingĩ

Ihinda inini mbere ya Pasaka ya mwaka wa 32 Mahinda Maitũ (M.M.), atũmwo nĩ maacokire kuuma kũndũ maathiĩte kũhunjia. Tondũ nĩ maanogete mũno, nĩ mathiire Bethisaida hamwe na Jesu makĩhũthĩra gatarũ nĩguo makahurũke. No hĩndĩ ĩrĩa gatarũ gaakuhĩrĩirie hũgũrũrũ-inĩ cia iria, Jesu akĩona andũ ngiri nyingĩ mamarũmĩrĩire. O na gũtuĩka Jesu eendaga gũkorũo hamwe na atũmwo ake tu, ndeerire andũ acio mathiĩ. Nĩ aahonirie arĩa maarĩ arwaru na akĩambĩrĩria kũmaruta. Aamarutire ũhoro wĩgiĩ Ũthamaki wa Ngai mũthenya mũgima. Rĩrĩa gwakinyire hwaĩ-inĩ, atũmwo ake makĩmwĩra ũũ: ‘No mũhaka gũkorũo andũ aya nĩ ahũtu. Meere mathiĩ nĩguo magacarie kĩndũ mangĩrĩa.’

JJesu akĩmeera ũũ: ‘Matirabatara gũthiĩ. Mahei kĩndũ gĩa kũrĩa.’ Nao atũmwo makĩmũũria: ‘Ũrenda tũthiĩ tũkamagũrĩre mĩgate?’ Nake mũtũmwo ũmwe wetagwo Filipu akiuga: ‘O na tũngĩkorũo na mbeca nyingĩ-rĩ, tũtingĩhota kũgũra mĩgate ya kũigana andũ aya othe.’

Jesu akĩmoria ũũ: ‘Mũrĩ na irio cigana atĩa?’ Nake Andrea akiuga: ‘Tũrĩ na mĩgate ĩtano na thamaki igĩrĩ. Na icio itingĩigana kĩrĩndĩ gĩkĩ gĩothe.’ Jesu akĩmeera ũũ: ‘Rehei mĩgate ĩyo na thamaki icio.’ Akĩra andũ maikare thĩ nyeki-inĩ marĩ ikundi cia andũ 50 na cia andũ 100. Akĩoya mĩgate ĩyo na thamaki icio, akĩrora igũrũ, na akĩhoya. Agĩcoka akĩnengera atũmwo irio icio, nao makĩhe andũ. Arũme 5,000, atumia, o hamwe na ciana, othe makĩrĩa nginya makĩhũna. Thutha ũcio, atũmwo makĩũngania kĩrĩa gĩatigarire nĩguo gũtigateo kĩndũ. Moonganirie ikabu 12 cihũrĩte. Kĩu kĩarĩ kĩama kĩnene!

Andũ nĩ maakenire mũno nginya makĩenda gũtua Jesu Mũthamaki. No Jesu nĩ aamenyaga atĩ rĩu rĩtiarĩ ihinda rĩa Jehova rĩa kũmũtua mũthamaki. Nĩ ũndũ ũcio akĩra kĩrĩndĩ gĩthiĩ, agĩcoka akĩra atũmwo ake mathiĩ mũrĩmo ũcio ũngĩ wa Iria rĩa Galili. Makĩingĩra gatarũ-inĩ kao, nake Jesu agĩthiĩ kĩrĩma-inĩ arĩ wiki. Nĩkĩ? Tondũ nĩ eendaga mahinda ma kũhoya Ithe. O na gũtuĩka Jesu nĩ aakoragwo na maũndũ maingĩ ma gwĩka, hingo ciothe nĩ aacaragia mahinda ma kũhoya.