Jesu Kũgerera Igũrũ rĩa Maĩ

Jesu to kũhonia aahonagia andũ na akamariũkia, ĩndĩ nĩ aahotaga nginya gwatha rũhuho na mbura. Thutha wa kũhoya arĩ kĩrĩma-inĩ, nĩ aarorire Iria rĩa Galili na akĩona kĩhuhũkanio. Atũmwo ake maarĩ gatarũ-inĩ, na nĩ maathĩnĩkaga magĩgatwarithia nĩ ũndũ wa kũhurutwo nĩ rũhuho. Jesu agĩikũrũka na akĩambĩrĩria kũgerera igũrũ rĩa maĩ athiĩte na kũrĩa gatarũ kaarĩ. Rĩrĩa atũmwo ake moonire mũndũ akĩgera igũrũ rĩa maĩ, nĩ maamakire mũno. No Jesu akĩmeera ũũ: ‘Nĩ niĩ. Tigai gwĩtigĩra.’

Petero akĩmwĩra ũũ: ‘Mwathani, angĩkorũo nĩwe, njĩra njũke.’ Nake Jesu akĩmwĩra: ‘Ũka.’ Nĩ ũndũ ũcio Petero akiuma gatarũ-inĩ na akĩambĩrĩria gũthiĩra igũrũ rĩa maĩ erekeire kũrĩ Jesu. No rĩrĩa aamũkuhĩrĩirie, aarorire kĩhuhũkanio na agĩtigĩra mũno. Akĩigua ambĩrĩria kũrikĩra, na akĩanĩrĩra akiuga: ‘Mwathani, honokia!’ Nake Jesu akĩmũnyita guoko akĩmwĩra: ‘Wambĩrĩria kũgĩa na nganja nĩkĩ? Wĩtĩkio waku ũrĩ kũ?’

Jesu na Petero makĩingĩra gatarũ-inĩ, na kĩhuhũkanio gĩgĩthira o hĩndĩ ĩyo. Ta hũũra mbica ũrĩa atũmwo maaiguire! Maaugire ũũ: “Wee kũna ũrĩ Mũrũ wa Ngai.”

Nĩ kũrĩ hĩndĩ ĩngĩ Jesu aathire rũhuho. Hĩndĩ ĩmwe makĩringa iria na atũmwo ake, Jesu aakomete gatarũ-inĩ. Arĩ toro, nĩ kwagĩire kĩhuhũkanio kĩnene. Makũmbĩ ma maĩ makĩhũũra gatarũ na gakĩingĩria maĩ. Atũmwo ake makĩmũũkĩria makĩmwanĩrĩra makĩmwĩra ũũ: ‘Mũrutani, tũrĩ hakuhĩ gũkua! Tũteithie!’ Jesu agĩũkĩra na akĩra iria ũũ: “Horera!” O rĩmwe rũhuho rũu na iria ikĩhoorera. Jesu akĩũria atũmwo ũũ: ‘Ũrĩ kũ wĩtĩkio wanyu?’ Nao makĩambĩrĩria kwĩrana: “Nginya rũhuho na iria nĩ iramwathĩkĩra.” Atũmwo nĩ meerutire atĩ mangĩehokire Jesu biũ, matiabataraga gwĩtigĩra ũndũ o na ũmwe.