Jesu Kũriũkio

Jesu akua, nĩ harĩ mũndũ ũmwe warĩ mũtongu wetagwo Jusufu wathiire kũũria Pilato amwĩtĩkĩrie oe mwĩrĩ wa Jesu. Jusufu ooire mwĩrĩ ũcio akĩwoha na itambaya cia gatani iria ciarĩ na mahuti maanungaga wega, agĩcoka akĩũkomia mbĩrĩra-inĩ njerũ. Aacokire akĩgaragaria ihiga inene mũromo-inĩ wa mbĩrĩra ĩyo akĩmĩhinga. Anene a athĩnjĩri-Ngai makĩra Pilato ũũ: ‘Nĩ tũretigĩra arutwo amwe a Jesu matigathiĩ moe mwĩrĩ ũcio macoke mauge atĩ nĩ ariũkĩte.’ Kwoguo Pilato akĩmeera ũũ: ‘Thingai mbĩrĩra ĩyo biũ na mũmĩrangĩre.’

Thutha wa thikũ ithatũ, atumia amwe nĩ maathiire mbĩrĩra-inĩ ĩyo rũcinĩ tene na magĩkora ihiga rĩu rĩgaragarĩtio rĩkeherio. Mũraika ũmwe warĩ thĩinĩ wa mbĩrĩra ĩyo akĩmeera ũũ: ‘Tigai kũmaka. Jesu nĩ ariũkĩtio. Thiĩi mwĩre arutwo ake mathiĩ Galili nĩ mekũmũkora kuo.’

Mariamu Mũmagidali nĩ aatengʼerire nĩguo agacarie Petero na Johana. Amona, akĩmeera ũũ: ‘Kũrĩ mũndũ woete mwĩrĩ wa Jesu!’ Petero na Johana magĩtengʼera mbĩrĩra-inĩ. Rĩrĩa maakorire ĩtarĩ kĩndũ, makĩinũka.

Rĩrĩa Mariamu aacokire mbĩrĩra-inĩ, nĩ oonire araika erĩ thĩinĩ na akĩmeera ũũ: ‘Ndiũĩ kũrĩa matwarĩte Mwathani wakwa.’ Agĩcoka akĩona mũthuri ũrĩa eecirĩirie atĩ nĩwe mũrĩmi wa mũgũnda ũcio, na akĩmwĩra ũũ: ‘Mũthuri ũyũ, ndagũthaitha ũnjĩre kũrĩa ũmũtwarĩte.’ No rĩrĩa mũthuri ũcio eetanire akiuga: “Mariamu!,” o hĩndĩ ĩyo Mariamu akĩmenya atĩ nĩ Jesu. Mariamu akiuga o rĩmwe “Mũrutani!” na akĩmũnyita. Jesu akĩmwĩra ũũ: ‘Thiĩ wĩre ariũ a Awa atĩ nĩ wanyona.’ Mariamu agĩtengʼera kũrĩ arutwo o hĩndĩ ĩyo na akĩmeera atĩ nĩ onete Jesu.

Mũthenya o ũcio nĩ kwarĩ na arutwo erĩ maaumaga Jerusalemu magĩthiĩ Emau. Marĩ njĩra-inĩ, mũthuri ũmwe akĩmakinyĩra na akĩmoria ũhoro ũrĩa maaragĩrĩria. Makĩmwĩra ũũ: ‘Kaĩ ũtaiguĩte? Athĩnjĩri-Ngai arĩa anene nĩ maroragire Jesu thikũ ithatũ thiru. Na rĩu kũrĩ na atumia amwe marauga atĩ nĩ ariũkĩte!’ Nake mũthuri ũcio akĩmoria: ‘Kaĩ mũtetĩkĩtie anabii? Maaugĩte atĩ Kristo nĩ angĩakuire acoke ariũkio.’ Agĩthiĩ na mbere kũmataarĩria ũrĩa Maandĩko maaugĩte. Rĩrĩa maakinyire Emau, arutwo acio makĩra mũthuri ũcio athiĩ hamwe nao kũrĩa maathiaga na agĩtĩkĩra gũthiĩ nao. Hwaĩ-inĩ rĩrĩa marĩanagĩra, thutha wa mũthuri ũcio kũhoera mũgate, makĩmenya atĩ aarĩ Jesu. Agĩcoka akĩbuĩria magĩtiga kũmuona.

Arutwo acio makĩhiũha magĩthiĩ nginya Jerusalemu nyũmba-inĩ ĩrĩa atũmwo maacemanĩtie, na makĩmeera ũrĩa gwathiĩte. No marĩ o nyũmba-inĩ ĩyo, Jesu akĩmaumĩrĩra othe. Kĩambĩrĩria-inĩ, atũmwo matietĩkagia atĩ nĩ Jesu. No we akĩmeera ũũ: ‘Ta rorai moko makwa; hutiai. Nĩ kwaandĩkĩtwo atĩ Kristo nĩ angĩkariũkio kuuma kũrĩ akuũ.’