Paulo na Timotheo

Timotheo aarĩ mũrũ wa Ithe witũ mwĩthĩ kĩũngano-inĩ kĩa Listra. Baba wao aarĩ Mũngiriki na mami wao aarĩ Mũyahudi. Mami wao Eunike na cũcũ wao Loisi nĩ maamũrutire ũhoro wa Jehova kuuma arĩ o kaana kanini.

Rĩrĩa Paulo aathiĩte Listra rũgendo-inĩ rwake rwa kerĩ rwa kũhunjia, nĩ oonire atĩ Timotheo nĩ eendete ariũ a Ithe witũ na nĩ eeriragĩria kũmateithia. Kwoguo Paulo akĩũria Timotheo mathiage nake ngʼendo ciake cia kũhunjia. Nĩ aamenyeririe Timotheo kwa ihinda nĩguo atuĩke mũhunjia mwega na mũrutani wa ũhoro ũrĩa mwega.

Paulo na Timotheo maatongoragio nĩ roho mũtheru kũrĩa guothe maathiaga. Ũtukũ ũmwe, Paulo nĩ eetirũo nĩ mũndũ ũmwe kũgerera kĩoneki athiĩ Makedonia akamateithie. Nĩ ũndũ ũcio, Paulo, Timotheo, Sila, na Luka magĩthiĩ kuo kũhunjia na kwambĩrĩria ciũngano.

Athuri na atumia aingĩ itũũra-inĩ rĩa Thesalonike rĩrĩa rĩarĩ Makedonia nĩ maatuĩkire Akristiano. No Ayahudi amwe nĩ maarĩ na ũiru mũno kwerekera Paulo na arĩa maahunjagia nake. Maacokanĩrĩirie kĩrĩndĩ na magĩkururia ariũ a Ithe witũ acio kũrĩ anene a itũũra, makiugaga ũũ: ‘Andũ aya nĩ thũ cia thirikari ya Roma!’ Tondũ Paulo na Timotheo maarĩ ũgwati-inĩ, moorire magĩthiĩ Beroia ũtukũ.

Andũ a Beroia nĩ maarĩ na wendi mũnene wa kwĩruta ũhoro ũrĩa mwega, na Angiriki na Ayahudi arĩa maaikaraga kuo nĩ maatuĩkire etĩkia. No rĩrĩa Ayahudi amwe mookire kuuma Thesalonike na makĩambĩrĩria ngũĩ, Paulo agĩthiĩ Athene. No Timotheo na Sila maaikarire o Beroia nĩguo mekĩre ariũ a Ithe witũ hinya. Thutha wa ihinda, Paulo agĩtũma Timotheo Thesalonike nĩguo agateithie aarĩ na ariũ a Ithe witũ mahote kũhiũrania na mĩnyamaro mĩnene ĩrĩa maacemanagia nayo. Thutha ũcio, nĩ aatũmire Timotheo athiĩ agaceerere ciũngano ingĩ nyingĩ na aciĩkĩre ngoro.

Paulo eerire Timotheo ũũ: ‘Arĩa othe mendaga gũtungatĩra Jehova nĩ marĩnyariragwo.’ Timotheo nĩ aanyaririrũo na akĩohwo njera nĩ ũndũ wa wĩtĩkio wake. No nĩ aakenire nĩ ũndũ wa mweke ũcio aagĩire naguo wa kuonania wĩhokeku wake harĩ Jehova.

Paulo eerire ariũ a Ithe witũ a Filipi ũũ: ‘Ngũmũtũmĩra Timotheo. Nĩ ekũmũruta gũthiĩ na njĩra ya ũhoro ũrĩa wa ma nĩ kuuga atĩa, na amũmenyerie ũtungata-inĩ.’ Paulo nĩ eehokete Timotheo. Nĩ maarutithanirie wĩra kwa ihinda iraya marĩ arata na marĩ ndungata cia Ngai.