Cioneki cia Ciikaro cia Roho
ONA ũngĩcũthĩrĩria igũrũ ihinda iraya atĩa, gũtirĩ kĩũmbe o na kĩmwe kĩa roho ũngĩona. O na ũngĩthikĩrĩria atĩa, ndũngĩigua o na kĩmwe gĩkĩaria. Ĩndĩ, no ũkorũo na ma atĩ nĩ kũrĩ ciũmbe cia roho. Ikoragwo na ũũgĩ na hinya mũingĩ, na ciothe nĩ irĩ marĩĩtwa na ngumo ngũrani ngũrani. Imwe nĩ itũteithagia, nacio ingĩ ciendaga gũtũgera ngero. Na ciothe nĩ ciendaga kũmenya maũndũ matũkoniĩ.
Ngai ũrĩa wa ma we mwene nĩ roho. (Johana 4:24) Nĩ arĩ rĩĩtwa rĩake rĩa mwanya rĩrĩa rĩmũkũranaga na ngai iria ingĩ itarĩ cia ma. Rĩĩtwa rĩake nĩ Jehova. (Thaburi 83:18) Mwandĩki wa Thaburi oigire ũũ: “Jehova nĩ mũnene, na nĩ wa kũgoocwo mũno: we nĩ wa gwĩtigĩrũo gũkĩra ngai ciothe. Thima-rĩ, ngai icio ciothe cia irĩndĩ no indo itarĩ kĩene, ĩndĩ Jehova nĩwe wombire igũrũ. Mbere-inĩ yake hatũũraga ũtĩĩku o na ũkaru; kũu gwake kwamũre gũgagĩtũũra hinya o na ũthaka.”—Thaburi 96:4-6.
Cioneki cia Ngai Ũrĩa wa Ma
Bibilia ĩtwĩraga atĩ “gũtirĩ mũndũ ũrĩ ona Ngai.” (Johana 1:18) O ta ũrĩa mũndũ waciarirũo arĩ mũtumumu atangĩmenya ũhoro wa marangi-rĩ, noguo tũtangĩmenya ũrĩa Ngai ahaana kana tũmenye riri wake. No o ta ũrĩa mũrutani mwega ataaragĩria arutwo maũndũ maritũ akĩhũthĩra indo moĩ-rĩ, noguo nake Ngai kũgerera Kiugo gĩake, Bibilia, ahũthagĩra maũndũ marĩa tuonaga gũtũtaarĩria maũndũ marĩa tũtangĩona. Kũgerera cioneki iria onirie ndungata ciake cia tene, Jehova nĩ atũteithagia kũhũũra mbica cia ciikaro cia igũrũ na kũmenya ũkuruhanu witũ na arĩa maikaraga kuo.
Kwa ngerekano-rĩ, kĩoneki kĩmwe kĩoonirio mũnabii Ezekieli kĩonanagia ũkaru wa Jehova ũhaana ta mwaki, ũtheri, kahiga ka yakuti, na mũkũnga-mbura. Thĩinĩ wa kĩoneki kĩngĩ-rĩ, mũtũmwo Johana onire Jehova aikarĩire gĩtĩ kĩa ũnene, na akoiga atĩ Ngai onekaga ahaana “ta ihiga mũthemba wa njathibi na wa wakiki,” agacoka akongerera atĩ “gĩtĩ kĩu gĩa ũthamaki nĩgĩathiũrũrũkĩirio nĩ mũkũnga-mbura ũhuana ta kahiga karĩa getagwo thumarati.” Ũhoro ta ũcio ũtwĩraga atĩ Jehova akoragwo athiũrũrũkĩirio nĩ ũthaka mũnene na wa mwanya mũno, wa gũkenia maitho na mũhoreru.—Kũguũrĩrio 4:2, 3; Ezekieli 1:26-28.
Mũnabii Danieli o nake nĩ onirio kĩoneki-inĩ kĩa Jehova “[araika] ngiri ikũmi maita ngiri ikũmi marũgamĩte mbere [ya Jehova].” (Danieli 7:10) Kĩu na ma kĩarĩ kĩoneki gĩa kũgegania! Kuona kĩoneki kĩa mũraika o ũmwe tu nĩ ũndũ wa kũgegania mũno, no ta kĩhũũre mbica ũkĩona araika akinyanĩru makiri maingĩ.
Araika magwetetwo hakuhĩ maita 400 thĩinĩ wa Bibilia, amwe ao nĩ aserafi na angĩ nĩ akerubi. Ciugo cia Kĩgiriki na Kĩhibirania iria itaũrĩtwo “mũraika” thĩinĩ wa Bibilia cierĩ ciugĩte “mũrekio.” Kwoguo araika no maranĩrie o ene, na maanaria na andũ tene. Araika ti andũ maatũũraga gũkũ thĩ mbere-inĩ. Jehova ombire ciũmbe icio cia roho ihinda iraya mbere ya kũũmba andũ.—Ayubu 38:4-7.
Kĩoneki-inĩ kĩa Danieli, araika acio aingĩ monganĩte meyonere ũndũ wa mwanya. Danieli agĩcoka akĩona “mũndũ wahaanaga ta mũrũ wa mũndũ” agĩkuhĩrĩria gĩtĩ kĩa ũnene kĩa Jehova nĩguo aheo “wathani, na riri, o na ũthamaki, nĩ getha andũ a nduka ciothe, na a ndũrĩrĩ ciothe, na a mĩario yothe, mamũtungatagĩre.” (Danieli 7:13, 14) “Mũrũ wa mũndũ,” ũrĩa ũkoragwo na wĩra wa bata mũno thĩinĩ wa ciikaro cia roho, nĩ Jesu Kristo ũrĩa wariũkirio, o we ũheetwo wathani wa thĩ yothe. Ica ikuhĩ wathani wake ũrĩeheria thirikari ciothe cia andũ na ũcoke ũniine mĩrimũ, ihooru, ũhinyanĩrĩria, ũkĩa, o na nginya gĩkuũ.—Danieli 2:44.
Jesu kũheo Ũthamaki hatarĩ nganja nĩ gwatũmire araika acio ehokeku makiri maingĩ, arĩa mendagĩra andũ maũndũ mega, makene mũno. No ũndũ wa kĩeha nĩ atĩ, ti araika othe maakenire.
Thũ cia Ngai na Andũ
O kĩambĩrĩria-inĩ kĩa andũ-rĩ, ũmwe wa araika nĩ eerirĩirie mũno gũthathaiyo na kwoguo agĩkararia Jehova na agĩĩtua Shaitani, rĩĩtwa riugĩte “Mũregani.” Shaitani, ũrĩa kĩhumo kĩa ũũru wothe, akoragwo na ũkararia mũrũrũ kwerekera Jehova, ũrĩa arĩ we kĩhumo kĩa wendani. Araika angĩ nĩ maanyitanĩire nake ũremi-inĩ. Bibilia ĩmetaga ndaimono. O ta Shaitani-rĩ, ndaimono nĩ ciatuĩkire thũ nene cia andũ. Mĩnyamaro mĩingĩ ĩrĩa ĩrĩ gũkũ thĩ, wagi wa kĩhooto, mĩrimũ, ũkĩa, na mbaara, ciumanaga nacio.
O na gũtuĩka ndini nyingĩ cia maheeni cia Gĩkristiano thikũ ici itiendaga kwaria ũhoro wa Shaitani-rĩ, ibuku ria Bibilia rĩa Ayubu nĩ rĩtũteithagia kũmenya ũrĩa mũraika ũcio mũremi ahaana na muoroto wake. Riugaga ũũ: “Na rĩrĩ, kwĩ mũthenya ariũ a Ngai maathiire kũrũgama mbere ya Jehova, na Shaitani o nake agĩthiĩ hamwe nao.” Mĩario-inĩ ĩrĩa yarũmĩrĩire, Shaitani oigire atĩ Ayubu aatungatagĩra Ngai no ũndũ tu wa maũndũ marĩa Ngai aamũheaga. Nĩ aareheire Ayubu thĩna mũingĩ mũno akĩgeria kuonania atĩ thitango ciake ciarĩ cia ma, akĩũraga mahiũ make na ciana ciake ciothe ikũmi. Thutha ũcio, akĩrehera Ayubu ironda cirĩ ruo mũno mwĩrĩ wothe. Tharĩkĩro icio ciothe cia Shaitani itiahotire kuonania atĩ ũrĩa oigaga warĩ wa ma.—Ayubu 1:6-19; 2:7.
Harĩ itũmi njega iria itũmĩte Jehova akirĩrĩrie Shaitani ihinda iraya ũguo, no ndegũtũũra amũkirĩrĩirie mĩndĩ na mĩndĩ. Ica ikuhĩ Mũcukani nĩ ekũniinwo. He makinya mambĩte kuoyũo na nĩ monanĩtio ibuku-inĩ rĩa Kũguũrĩrio, rĩrĩa rĩtũteithagia kuona ũndũ ũngĩ wa bata wekĩkire thĩinĩ wa ciikaro cia roho tũtaangĩkaũmenya na njĩra ĩngĩ. Tũthomaga ũũ: “Gũkĩgĩa mbaara Igũrũ, Mikaeli [Jesu Kristo ariũkĩtio] na araika ake magĩthiĩ kũrũa na ndamathia ĩo [Shaitani]; ndamathia o nayo na araika ayo makĩrũa nao; na matiigana kwĩhootanira, o na matiacokire kuona kũndũ rĩngĩ gwa gũikara kũu Iguru. Nayo ndamathia ĩo nene ĩkĩharũrũkio, nĩyo nyamũ-ya-thĩ o ĩrĩa ya tene, na noyo ũrĩa wĩtagwo Mũcukani na agetwo Shaitani, ũrĩa ũhĩtithagia kĩrĩndĩ gĩa thĩ gĩothe; agĩkĩharũrũkio o thĩ, o nao araika ake makĩharũrũkanĩrio hamwe nake.”—Kũguũrĩrio 12:7-9.
Ta rora wone atĩ Shaitani aratuĩka nĩwe “ũhĩtithagia kĩrĩndĩ gĩa thĩ gĩothe.” Ahĩtithagia andũ kũgerera maheeni ma kĩĩndini nĩguo matigane na Jehova na Kiugo gĩake. Maheeni mamwe nĩ atĩ andũ makua mathiaga ciikaro cia roho. Ũrutani ũcio ũtaaragĩrio na njĩra nyingĩ. Kwa ngerekano-rĩ, thĩinĩ wa Afrika na Asia, andũ aingĩ metĩkĩtie atĩ mũndũ akua athiaga ciikaro cia roho iria citũũragwo nĩ andũ ao arĩa maakuire tene. Ũrutani wa pagatorĩ na icua rĩa mwaki o naguo wĩhocetie harĩ rĩciria rĩa atĩ mũndũ akua athiaga o na mbere gũtũũra muoyo.
Hihi Andũ Makua Mathiaga Igũrũ?
Ĩ naguo wĩtĩkio ũrĩa andũ milioni nyingĩ thĩinĩ wa thĩ makoragwo naguo atĩ andũ othe ega mathiaga igũrũ? Nĩ ma, andũ amwe ega nĩ mathiaga igũrũ, no nĩ anyinyi makĩringithanio na bilioni nyingĩ arĩa maanakua. Bibilia yonanagia atĩ andũ 144,000 nĩ “maagũrĩtwo thĩ” na nĩ magaatuĩka ‘athĩnjĩri-Ngai’ na ‘athamaki a gũthamakaga thĩ.’ (Kũguũrĩrio 5:9, 10; 14:1, 3) Marĩ hamwe na Mũrũ wa mũndũ, Jesu Kristo, nĩo magaatuĩka thirikari ya igũrũ, nĩyo Ũthamaki wa Ngai. Thirikari ĩyo ĩkaaniina Shaitani na ndaimono ciake na ĩtue thĩ paradiso. Andũ aingĩ arĩa makuĩte nĩ magaacokio muoyo ihinda rĩũkĩte marĩ na kĩĩrĩgĩrĩro gĩa gũtũũra tene na tene thĩinĩ wa Paradiso gũkũ thĩ.—Luka 23:43.
Kwoguo na njĩra nguhĩ-rĩ, ciikaro-inĩ cia roho nĩ gũtũũraga ciũmbe nyingĩ. Ũrĩa mũnene mũno ũikaraga ciikaro-inĩ icio nĩ Jehova Ngai, Mũũmbi wa indo ciothe. Araika ngiri nyingĩ mamũtungatagĩra marĩ na wĩhokeku. Araika angĩ, matongoretio nĩ Shaitani, nĩ maakararirie Jehova na rĩu nĩ mahĩtithagia andũ. Ningĩ, nĩ kũrĩ andũ atare ‘magũrĩtwo’ kana magathuurũo kuuma thĩ makarute wĩra wa mwanya kũu igũrũ. Tũrĩ na ũndũ ũcio meciria-inĩ-rĩ, rekei rĩu twarĩrĩrie arĩa tũngĩarĩria thĩinĩ wa ciikaro cia roho, na ũrĩa twagĩrĩirũo nĩ kwaria nao.