Wĩrute Kuuma Kiugo-inĩ kĩa Ngai

Wagĩrĩirũo Kwĩruta Kuuma Kũrĩ Ngai Nĩkĩ?

Gĩcunjĩ gĩkĩ kĩrĩ na ciũria hihi waneyũria na nĩ kĩronania harĩa ũngĩona macokio ma ciũria icio thĩinĩ wa Bibilia yaku. Aira a Jehova no makenere kwarĩrĩria macokio macio hamwe nawe.

1. Wagĩrĩirũo kwĩruta kuuma kũrĩ Ngai nĩkĩ?

Ngai arĩ na ũhoro mwega wa maũndũ mega harĩ andũ. Atwĩraga maũndũ macio thĩinĩ wa Bibilia. Bibilia nĩ ta marũa kũrĩ ithuĩ kuuma kũrĩ Ithe witũ wa igũrũ ũtwendete.—Thoma Jeremia 29:11.

2. Ũhoro ũrĩa mwega nĩ ũrĩkũ?

Andũ nĩ marabatara thirikari njega. Gũtirĩ mũtongoria o na ũmwe wa gũkũ thĩ ũrĩ wahota kwehereria andũ ũhinya, wagi wa kĩhooto, mĩrimũ, kana gĩkuũ. No nĩ kũrĩ na ũhoro mwega. Ngai nĩ akahee andũ thirikari njega ĩrĩa ĩkeeheria mĩnyamaro yothe.—Thoma Danieli 2:44.

3. Nĩkĩ arĩ ũndũ wa bata twĩrute kuuma kũrĩ Ngai?

Ica ikuhĩ, Ngai nĩ arĩeheria andũ arĩa matũmaga kũgĩe na mĩnyamaro thĩinĩ wa thĩ. Ihinda-inĩ rĩrĩ, nĩ araruta andũ athingu milioni nyingĩ nĩguo makenere njĩra ĩrĩa njega ya ũtũũro, ĩrĩa ĩhocetie harĩ wendo. Kuuma Kiugo-inĩ kĩa Ngai, andũ nĩ mareruta ũrĩa mangĩhiũrania na mathĩna mũtũũrĩre-inĩ, ũrĩa mangĩona gĩkeno kĩa ma, na ũrĩa mangĩkenia Ngai.—Thoma Zefania 2:3.

4. Mũtungi wa Bibilia Nũũ?

Bibilia ĩkoragwo na mabuku 66. Maandĩkirũo nĩ andũ ta 40. Mabuku matano ma mbere maandĩkirũo nĩ Musa ta mĩaka 3,500 mĩhĩtũku. Ibuku rĩa mũthia rĩaandĩkirũo nĩ mũtũmwo Johana makĩria ma mĩaka 1,900 mĩthiru. No aandĩki a Bibilia maandĩkire meciria ma Ngai no ti mao. Kwoguo Ngai nĩwe Mũtungi wa Bibilia.—Thoma 2 Timotheo 3:16; 2 Petero 1:21.

Nĩ tũũĩ atĩ Bibilia yumĩte kwĩ Ngai tondũ ĩtaaragĩria maũndũ marĩa magooka ĩtekũhĩtia. Gũtirĩ mũndũ o na ũrĩkũ ũngĩhota gwĩka ũguo. (Isaia 46: 9, 10) Ningĩ, Bibilia nĩ ĩtaaragĩria ngumo njega cia Ngai. Nĩ ĩkoragwo na ũhoti wa kũgarũra mĩtũũrĩre ya andũ ĩkaagĩra. Maũndũ macio ma ma nĩ matũmaga andũ aingĩ metĩkie atĩ Bibilia nĩ Kiugo kĩa Ngai.—Thoma Joshua 23:14; 1Athesalonike 2:13.

5. Ũngĩtaũkĩrũo nĩ Bibilia Atĩa?

Jesu nĩ aatuĩkire mũrutani wĩ ngumo wa Kiugo kĩa Ngai. O na gũtuĩka andũ aingĩ arĩa aaragia nao nĩ mooĩ maandĩko-rĩ, nĩ mabataraga ũteithio nĩgetha mataũkĩrũo. Nĩguo amateithie-rĩ, Jesu aagwetaga rĩandĩko, agacoka akarĩtaarĩria nĩgetha “mamenye wega Maandĩko.” Gĩcunjĩ gĩkĩ, “Wĩrute Kuuma Kiugo-inĩ kĩa Ngai,” kĩrĩhũthagĩra njĩra o ta ĩyo nĩguo gĩgũteithie.—Thoma Luka 24:27, 45.

Ti maũndũ maingĩ mangĩtũcanjamũra ta kwĩruta igũrũ rĩgiĩ muoroto wa ũtũũro kuuma kũrĩ Ngai. No andũ amwe no maage gũkena atĩ tondũ nĩ ũreruta Bibilia. Ndũgakue ngoro. Kĩĩrĩgĩrĩro gĩaku gĩa gũgaakenera muoyo wa tene na tene kĩĩhocetie harĩ wee kũmenya Ngai.—Thoma Mathayo5:10- 12; Johana 17:3.

Nĩgetha wone ũhoro makĩria, rora gĩcunjĩ gĩa 2, kĩa ibuku rĩrĩ rĩcabĩtwo nĩ Aira a Jehova. Bibilia Ĩrutanaga Atĩa Kũna?