Rutwo nĩ Kiugo Kĩa Ngai

Ngai Nũũ?

Gĩcunjĩ gĩkĩ kĩrĩ na ciũria hihi waneyũria na nĩ kĩronania harĩa ũngĩthoma macokio ma ciũria icio thĩinĩ wa Bibilia yaku. Aira a Jehova no makenere kwarĩrĩria macokio macio hamwe nawe.

1. Ngai nũũ?

Ngai wa ma nĩ ũrĩa Wombire indo ciothe. Bibilia ĩmwĩtaga “Mũthamaki wa tene na tene,” ũguo nĩ kuuga atĩ ndarĩ kĩambĩrĩria na ndarĩ kĩrĩkĩrĩro. (Kũguũrĩrio 15:3) Tondũ Ngai nĩwe Kĩhumo kĩa muoyo-rĩ, twagĩrĩirũo kũmũthathaiya o we wiki.—Thoma Kũguũrĩrio 4:11.

2. Hihi Ngai atariĩ atĩa?

Gũtirĩ mũndũ ũrĩ wona Ngai tondũ we nĩ Roho, ũguo nĩ kuuga atĩ muoyo wake nĩ wa igũrũ mũno na nĩ ngũrani na wa ciũmbe iria ingĩ cionekaga gũkũ thĩ. (Johana 1:18; 4:24) Ngumo cia Ngai cionekaga kũgerera indo iria ombĩte. Kwa ngerekano-rĩ, rĩrĩa tweciria ũhoro wa mĩthemba mĩingĩ ya matunda na mahũa na ũrĩa yũmbĩtwo, nĩ tũhotaga kuona wendo na ũũgĩ wa Ngai. Kũneneha kwa igũrũ na thĩ nĩ gũtũmenyithagia ũrĩa Ngai arĩ hinya.—Thoma Aroma 1:20.

No twĩrute makĩria igũrũ rĩgiĩ ngumo cia Ngai kuuma Bibilia-inĩ. Kwa ngerekano-rĩ, nĩ ĩtwĩraga maũndũ marĩa Ngai endete na marĩa athũire, ũrĩa atugaga andũ, na ũrĩa ekaga maũndũ-inĩ ngũrani.—Thoma Thaburi 103:7-10.

3. Ngai etagwo atĩa?

Jesu oigire ũũ: “Ithe witũ wĩ Igũrũ, Rĩĩtwa rĩaku nĩrĩamũrũo.” (Mathayo 6:9) O na gũtuĩka Ngai nĩ arĩ marĩĩtwa maingĩ ma gĩtĩo, akoragwo na rĩĩtwa rĩmwe tu. O andũ nĩ marĩ ũrĩa matamũkaga rĩĩtwa rĩu kũringana na rũthiomi rwao. Na Gĩkũyũ rĩĩtwa rĩu nĩ “Jehova”.—Thoma Thaburi 83:18.

Rĩĩtwa rĩa Ngai nĩ rĩeheretio Bibilia-inĩ nyingĩ na handũ-inĩ harĩo hagekĩrũo marĩĩtwa ma ũnene Mwathani kana Ngai. No rĩrĩa Bibilia yaandĩkirũo, yaarĩ na rĩĩtwa rĩa Ngai ta maita 7,000. Jesu nĩ aamenyithanirie rĩĩtwa rĩa Ngai na njĩra ya kũrĩhũthĩra akĩarĩrĩria Kiugo kĩa Ngai hamwe na andũ. Nĩ aateithirie andũ mamenye ũrĩa Ngai etagwo.—Thoma Johana 17:26.

4. Hihi Jehova nĩ atũrũmbũyagia?

Jehova nĩ onanagia nĩ arĩ bata na ithuĩ na njĩra ya gũthikĩrĩria mahoya maitũ we mwene. (Thaburi 65:2) Hihi kũingĩha kwa mĩnyamaro kuonanagia atĩ Ngai ndatũrũmbũyagia? Kũrĩ andũ moigaga atĩ Ngai nĩwe ũtũmaga tũnyamarĩke agĩtũgeria, no ũcio ti ũhoro wa ma. Bibilia yugaga ũũ: “Kũrogira Mũrungu angĩĩka ũndũ mwaganu.”—Ayubu 34:10; thoma Jakubu 1:13.

Ngai nĩ aheete mũndũ gĩtĩo gĩa gwĩthuurĩra ũrĩa ekwenda gwĩka. Wĩyathi witũ wa gwĩthuurĩra gũtungatĩra Ngai nĩ ũndũ tũkenagĩra mũno! (Joshua 24:15) Mĩnyamaro ĩingĩhĩte tondũ andũ aingĩ mathuuraga gwĩka arĩa angĩ maũndũ mooru. Jehova nĩ atuuragwo rĩrĩa ona wagi ta ũcio wa kĩhooto.—Thoma Kĩambĩrĩria 6:5, 6.

Ica ikuhĩ, Jehova nĩ arĩhũthĩra Jesu kũniina mĩnyamaro na arĩa mamĩrehaga. No gwa kahinda gaka, Jehova arĩ na gĩtũmi kĩega gĩa gwĩtĩkĩria mĩnyamaro kwa ihinda inyinyi. Ithomo rĩngĩ gĩcunjĩ-inĩ o ta gĩkĩ nĩ rĩkaarĩrĩria gĩtũmi kĩa Ngai gwĩtĩkĩria mĩnyamaro.—Thoma Isaia 11:4.

5. Ngai endaga twĩke atĩa?

Jehova aatũmbire tũrĩ na ũhoti wa kũmũmenya na kũmwenda. Nĩ endaga twĩrute ma ĩrĩa ĩmũkoniĩ. (1 Timotheo 2:4) Tũngĩĩruta Bibilia, Ngai no atuĩke Mũrata witũ.—Thoma Thimo 2:4, 5.

Tondũ Jehova nĩ atũheete muoyo, nĩ twagĩrĩirũo nĩ kũmwenda gũkĩra ũrĩa twendete mũndũ ũngĩ o wothe. No tuonie Ngai atĩ nĩ tũmwendete na njĩra ya kũmũhoya na gwĩka ũrĩa endaga. (Thimo 15:8) Jehova atwĩraga twende andũ arĩa angĩ.—Thoma Mariko 12:29, 30; 1 Johana 5:3.

Nĩgetha wone ũhoro makĩria, rora gĩcunjĩ kĩa 1 kĩa ibuku rĩrĩ Bibilia Ĩrutanaga Atĩa Kũna?rĩcabĩtwo nĩ Aira a Jehova.

Hihi no gũkorũo na gĩtũmi kĩega gĩa gwĩtĩkĩria mĩnyamaro kwa ihinda inyinyi?