Jesu Aakuire Nĩkĩ?

‘Tondũ ti-itherũ Mũrũ wa mũndũ okire nĩguo arute muoyo wake ũtuĩke wa gũkũũra andũ aingĩ.’—MARIKO 10:45.

JESU nĩ aamenyaga maũndũ marĩa angĩacemanirie namo. Nĩ oĩ wega atĩ ndangĩatũũrire ũtũũro wake wothe arĩ na thayũ. Ithenya rĩa ũguo-rĩ, nĩ aamenyaga atĩ angĩoragirũo arĩ o mĩaka-inĩ yake ya 30, na nĩ eeharĩirie biũ gũkua.

Bibilia yonanagia atĩ gĩkuũ kĩa Jesu nĩ kĩa bata mũno. Ibuku rĩmwe riugaga atĩ gĩkuũ kĩa Jesu kĩgwetetwo ĩmwe kwa ĩmwe maita makĩria ma 175 thĩinĩ wa Maandĩko ma Kĩgiriki ma Gĩkristiano, kana Kĩrĩkanĩro kĩrĩa Kĩerũ. O na gũkĩrĩ ũguo-rĩ, nĩkĩ no mũhaka Jesu angĩanyamarĩkire na acoke akue? Nĩ tũkũbatara kũmenya tondũ gĩkuũ kĩa Jesu no gĩkorũo na ũguni mũnene ũtũũro-inĩ witũ.

▪ Maũndũ marĩa Jesu eerĩgagĩrĩra Mwaka wa mũico wa ũtũũro wake, maita maingĩ Jesu nĩ aakoretwo akĩaria na arutwo ake ũhoro wĩgiĩ ũrĩa angĩanyamarĩkire na acoke akue. Marĩ rũgendo-inĩ magĩthiĩ Jerusalemu gũkũngũĩra bathaka ĩrĩa yarĩ yake ya mũico-rĩ, eerire atũmwo ake arĩa 12 ũũ: ‘Mũrũ wa mũndũ nĩ ekũneanwo kũrĩ athĩnjĩri-Ngai arĩa anene o na aandĩki marũa; nao nĩ makũmũtuĩra cira atĩ oragwo, na mamũneane kũrĩ andũ a ndũrĩrĩ: nao nĩ makũmũnyũrũria, na mamũtuĩre mata, na mamũhũre na kĩboko kĩĩ njaaga, na mamũũrage; na thutha wa mĩthenya ĩtatũ nĩ agacoka kũriũka.’a (Mariko 10:33, 34) Nĩ kĩĩ gĩatũmaga akorũo na ũũma mũnene ũguo wĩgiĩ maũndũ marĩa mangĩamũkorire?

Jesu nĩ aamenyaga morathi maingĩ mũno thĩinĩ wa Maandĩko ma Kĩhibirania marĩa maarathĩte ũrĩa angĩoragirũo. (Luka 18:31-33) Rekei tũthuthurie mamwe ma morathi macio hamwe na Maandĩko marĩa mataaragĩria ũrĩa maahingire.

Mesia nĩ . . .

▪ Angĩakunyanĩirũo na endio thendi 30.​—ZEKARIA 11:12; MATHAYO 26:14-16.

▪ Angĩahũrirũo na atuĩrũo mata.​—ISAIA 50:6; MATHAYO 26:67; 27:26, 30.

▪ Angĩacuririo mũtĩ igũrũ.​—THABURI 22:16; MARIKO 15:24, 25.

▪ Angĩarumirũo arĩ mũtĩ igũrũ.​—THABURI 22:7, 8; MATHAYO 27:39-43.

▪ Angĩoragirũo na gũtirĩ ihĩndĩ rĩake o na rĩmwe rĩngĩaunirũo.​—THABURI 34:20; JOHANA 19:33, 36.

Jesu nĩ aahingirie morathi macio o na mangĩ maingĩ. Gũtingĩahotekire eke maũndũ macio na hinya wake we mwene. Kũhinga kwa morathi macio mothe megiĩ Jesu kuonanagia kũna atĩ aatũmĩtwo nĩ Ngai.b

O na kũrĩ ũguo-rĩ, nĩkĩ no mũhaka Jesu angĩanyamarĩkire na akue?

▪ Jesu aakuire nĩguo acokie ciũria cia bata mũno Jesu nĩ aamenyete ũhoro wĩgiĩ ciũria iria ciaumĩrire mũgũnda-inĩ wa Edeni ciĩgiĩ ũnene wa Ngai. Thutha wa kũheenio nĩ kĩũmbe kĩremi gĩa kĩĩroho, Adamu na Hawa makĩamũra kwaga gwathĩkĩra Ngai. Ũremi wao watũmire Ũnene wa Ngai kana kĩhooto gĩake gĩa gwathana gĩĩkĩrĩrũo nganja. Ningĩ mehia mao nĩ mooimĩririe kĩũria kana hihi nĩ kũrĩ mũndũ ũngĩikara arĩ mwĩhokeku harĩ Ngai rungu rwa magerio.—Kĩambĩrĩria 3:1-6; Ayubu 2:1-5.

Jesu aaheanire macokio mega mũno harĩ ciũria icio cierĩ, ciĩgiĩ ũnene wa Jehova na wĩhokeku wa mũndũ. Na njĩra ya wathĩki wake mũkinyanĩru, Jesu aanyitire mbaru ũnene wa Ngai “nginya akĩũragwo mũtĩ-igũrũ.” (Afilipi 2:8; NW) Ningĩ Jesu nĩ onanirie atĩ mũndũ mũkinyanĩru no ahote gũikara arĩ mwĩkindĩru harĩ Jehova o na angĩgerio na magerio manene atĩa.

▪ Jesu aakuire nĩguo akũũre kĩrĩndĩ Mũnabii Isaia nĩ aarathĩte atĩ mĩnyamaro na gĩkuũ kĩa Mesia ũrĩa weranĩirũo nĩ cingĩahorohirie mehia ma kĩrĩndĩ. (Isaia 53:5, 10) Jesu nĩ aamenyete ũguo wega, kwoguo akĩruta na kwĩyendera “muoyo wake ũtuĩke wa gũkũũra andũ aingĩ.” (Mathayo 20:28) Gĩkuũ gĩake kĩa igongona kĩahingũrĩire andũ matarĩ akinyanĩru njĩra ya kũgĩa na ũkuruhanu mwega na Jehova na kũhonokio kuuma harĩ mehia na gĩkuũ. Gĩkuũ kĩa Jesu gĩtũheaga mweke wa gũcokerio kĩrĩa Adamu na Hawa maateire—kĩĩrĩgĩrĩro gĩa gũgatũũra tene na tene thĩinĩ wa thĩ ĩrĩ na ũkinyanĩru.c—Kũguũrĩrio 21:3, 4.

▪ Ũrĩa ũngĩka Thĩinĩ wa icunjĩ icio irũmanĩrĩire, nĩ twathuthuria ũrĩa Bibilia yugaga ũhoro wĩgiĩ Jesu, kĩhumo gĩake, ũtũũro wake, na gĩtũmi gĩa gĩkuũ gĩake. Ma icio cititũteithagia o kũmenya Jesu wega. Gũtũũra kũringana nacio no gũtũrehere irathimo nyingĩ—ũtũũro mwega mahinda-inĩ maya, na muoyo wa tene na tene ihinda rĩũkĩte. Bibilia nĩ ĩtwĩraga ũrĩa twagĩrĩirũo nĩ gwĩka nĩguo tũkaamũkĩra irathimo icio.

▪ Wĩrute makĩria igũrũ rĩgiĩ Jesu Kristo na itemi rĩake harĩ muoroto wa Jehova.​—JOHANA 17:3.

▪ Onania wĩtĩkio waku harĩ Jesu, na kũgerera mĩikarĩre yaku-rĩ, wonanie atĩ nĩ ũmwĩtĩkĩrĩte arĩ Mũhonokia waku.​—JOHANA 3:36; ATŨMWO 5:31.

Aira a Jehova no makenere gũgũteithia wĩrute ũhoro makĩria wĩgiĩ Jesu Kristo “Mũrũ wa mũmwe” wa Ngai, ũrĩa kũgerera harĩ we tũngĩheo “muoyo wa tene na tene.”​—Johana 3:16.

[Kohoro ka magũrũ-inĩ]