4 Ngai Ti wa Kĩhooto—Hihi Ũcio nĩ Ũhoro wa Ma?

Ũrĩa ũngĩkorũo ũiguĩte: “Ngai nĩwe mwene thĩ ĩno, kwoguo maũndũ mothe marĩa mekĩkaga nĩ wendi wake. Tondũ thĩ ĩiyũirũo nĩ mũthutũkanio, wagi wa kĩhooto, na ũhinyanĩrĩria-rĩ, no mũhaka Ngai akorũo nĩwe ũtũmaga maũndũ macio mekĩke.”

Ũrĩa Bibilia ĩrutanaga: Ngai tiwe ũrehaga wagi wa kĩhooto thĩinĩ wa thĩ. Ĩkĩaria ũhoro wa Jehova, Bibilia yugaga ũũ: “Mĩthiĩre yake yothe nĩ ya kĩhooto.”—Gũcokerithia Maathani 32:4.

Ngai atanahagĩra andũ othe, nginya arĩa matagĩrĩire. Kwa ngerekano-rĩ, “nĩatũmaga riũa rĩake rĩrathĩre andũ arĩa oru, o na arĩa ega; ningĩ nĩoiragĩria mbura arĩa athingu, o na arĩa aaganu.” (Mathayo 5:45) Ekaga andũ a ndũrĩrĩ ciothe maũndũ ma kĩhooto, o ta ũrĩa Atũmwo 10:34, 35 yugaga: “Ngai ndatĩagĩra andũ maũthĩ: no thĩinĩ wa ndũrĩrĩ ciothe mũndũ ũrĩa ũmwĩtigagĩra na ageka maũndũ ma ũthingu nĩetĩkagĩrũo nĩwe.”

Gũkĩrĩ ũguo-rĩ, wagi wa kĩhooto uumaga kũ? Andũ aingĩ mathuuraga gwĩka maũndũ matarĩ ma kĩhooto, makaaga kũrũmĩrĩra kĩonereria kĩa Ngai gĩa kĩhooto. (Gũcokerithia Maathani 32:5) Ningĩ, Bibilia nĩ yonanagia atĩ Ngai nĩ etĩkĩrĩtie thũ yake, Mũcukani, gwathana thĩinĩ wa thĩ.a (1 Johana 5:19) O na kũrĩ ũguo, ica ikuhĩ Ngai nĩ ekũniina wathani wa Mũcukani. Nĩ arĩkĩtie kũhaarĩria njĩra ĩrĩa arĩhũthĩra ‘gũtharũria wĩra wa Mũcukani.’—1 Johana 3:8.

Ũrĩa kũmenya ma kũngĩgũteithia: No kũhoteke nĩ ũgegaga nĩ ũndũ wa riboti nyingĩ njũru ciĩgiĩ uungumania, ũhinyanĩrĩria, na wagi wa kĩhooto. Kũmenya kĩhumo kĩa mathĩna no gũgũteithie ũtaũkĩrũo nĩ kĩrĩa gĩtũmĩte maũndũ mathũke mũno, na nĩ kĩĩ gĩtũmĩte o na andũ makĩgeragia maremwo nĩ kwagĩria maũndũ thĩinĩ wa thĩ. (Thaburi 146:3) Handũ ha kũhũthĩra mahinda na hinya waku kũrehe ũgarũrũku ũtarĩ wa gũtũũra-rĩ, no ũgĩe na kĩĩrĩgĩrĩro kĩega kĩa mahinda mokĩte kiumanĩte na kwĩhoka ciĩranĩro cia Ngai.—Kũguũrĩrio 21:3, 4.

Gũtaũkĩrũo nĩ kĩrĩa gĩtũmaga gũkorũo na wagi wa kĩhooto no gũtũteithie, makĩria hĩndĩ ĩrĩa tũgũmĩirũo nĩ mathĩna. Hĩndĩ ĩrĩa twekwo maũndũ matarĩ ma kĩhooto, twahota kuuga ta ũrĩa Habakuku ndungata ya Ngai yoigire: “Watho nĩ mwagithie hinya, o namo matuĩro ma cira makaaga kũhingio.” (Habakuku 1:4) Ngai ndaigana kũrũithia Habakuku nĩ ũndũ wa ciugo icio. Ithenya rĩa ũguo, Ngai omĩrĩirie Habakuku akĩmwĩra atĩ nĩ Abangĩte hĩndĩ ya gũthondeka maũndũ na akĩmũteithia gũkorũo na gĩkeno o na kũrĩ na moritũ. (Habakuku 2:2-4; 3:17, 18) Ũndũ ũmwe na ũguo, kwĩhoka ciĩranĩro cia Ngai cia kũniina wagi wa kĩhooto no gũgũteithie ũgĩe na thayũ wa meciria ũrĩ thĩinĩ wa thĩ ĩno ĩtarĩ kĩhooto.

Hihi Ngai nĩwe ũtũmaga gũkorũo na mĩnyamaro na wagi wa kĩhooto?

© Sven Torfinn/Panos Pictures

[Kohoro ka Magũrũ-inĩ]