Hihi no Kũhoteke Kũgĩa na Ũtũũro ũrĩ na Muoroto?

NA GITHĨ ciugo icio ti cia ma? Ũtũũro thĩinĩ wa thĩ ĩno ũiyũirũo nĩ “mĩnoga na thĩna.” No gũkorũo waneyũria ũũ: ‘Hihi no kũhoteke kũgĩa na ũtũũro ũrĩ na muoroto mahinda-inĩ maya?’

Ta wĩcirie ngerekano ya Maria. Aakoragwo arĩ mũndũ ũrĩ na kĩyo mũno, no rĩu, arĩ na mĩaka 84, ndahotaga kwĩruta nyũmba. O na gũtuĩka meciria make nĩ marutaga wĩra wega, mwĩrĩ wake ndũkoragwo na hinya. Hihi no ecirie atĩ mũtũũrĩre ta ũcio no ũkorũo na muoroto?

Ĩĩ wee nawe? No kũhoteke waneyũria kana ũtũũro waku nĩ ũkoragwo na muoroto. No gũkorũo wĩra ũrĩa ũrutaga nĩ mũritũ na wa mĩnoga. Andũ no mage kuona kĩyo gĩaku. O na angĩkorũo nĩ ũgaacĩrĩte ũtũũro-inĩ mahinda maya, no ũkorũo ũtarĩ na ũũma wa ũrĩa gũkahaanĩka thutha-inĩ. Rĩmwe na rĩmwe no ũigue ta ũtiganĩirio kana ũhinyĩrĩrĩkĩte. Mũtũũrĩre wa famĩlĩ yaku no ũkorũo ũiyũire ngũĩ. No ũkorũo ũkuĩrĩirũo nĩ mũndũ wendete. André nĩ eendete ithe mũno, no ithe nĩ aanyitirũo nĩ ndwari ya narua na agĩkua. Rĩu rĩarĩ ihũra inene harĩ André, na aaiguaga ta atangĩhota gwĩtiria kĩmako na kĩeha kĩrĩa aarĩ nakĩo.

O na tũngĩcemania na mathĩna mahaana atĩa-rĩ, nĩ harĩ na ũndũ twendaga mũno kũmenya: Hihi no kũhoteke kũgĩa na ũtũũro ũrĩ na muoroto? No tuone macokio ma kĩũria kĩu tũngĩthuthuria ũtũũro wa Jesu Kristo, ũrĩa watũũraga gũkũ thĩ mĩaka ta 2,000 mĩhĩtũku. O na gũtuĩka Jesu nĩ aacemanirie na mĩhĩnga mĩingĩ, aarĩ na ũtũũro ũrĩ na muoroto. O na ithuĩ no tũgĩe na muoroto ũtũũro-inĩ tũngĩĩgerekania nake.