Oyaga na Ũritũ Mweke Ũrĩa ũrĩ Naguo wa Kũrutithania Wĩra na Jehova!

1. Jehova onaga wĩra atĩa, na ũndũ ũcio ũtũmaga eke atĩa?

JEHOVA nĩ mũruti wĩra ũkenagĩra mũno wĩra wake. (Thab. 135:6; Joh. 5:17) Nĩguo ciũmbe ciake igĩe na gĩkeno o ta kĩu, nĩ aciheaga wĩra mwega. Kwa ngerekano, nĩ aarutithanirie wĩra hamwe na Mũriũ wake wa irigithathi hĩndĩ ĩrĩa ombaga indo. (Thoma Akolosai 1:15, 16.) Bibilia ĩtwĩraga atĩ Jesu atanoka gũkũ thĩ, aatũũraga igũrũ hamwe na Ngai arĩ “njorua ya wĩra.”—Thim. 8:30, New World Translation.

2. Nĩ kĩĩ kĩonanagia atĩ Jehova nĩ aheaga ciũmbe ciake cia roho wĩra wa bata na wa gĩkeno?

² Kuuma kĩambĩrĩria nginya mũthia, Bibilia nĩ ĩkoragwo na ngerekano cionanagia atĩ hingo ciothe Jehova nĩ akoretwo akĩhe ariũ ake a kĩĩroho wĩra. Rĩrĩa Adamu na Hawa meehirie na makĩingatwo Paradiso, Ngai nĩ ‘aaigire Akerubi mũgũnda ũcio wa Edeni mwena ũrĩa riũa rĩrathagĩra, o na rũhiũ rwa rũrĩrĩmbĩ rwa mwaki rũeyerekagĩria na mbarĩ ciothe, nĩguo njĩra ya gũthiĩ mũtĩ-inĩ wa muoyo ĩikaragio ndĩkagerũo.’ (Kĩam. 3:24) Narĩo rĩandĩko rĩa Kũguũrĩrio 22:6 rĩonanagia atĩ Jehova “nĩaatũmire mũraika wake onie ndungata ciake maũndũ marĩa matarĩ hingo matagakinya narua.”

Ĩ ANDŨ NAO?

3. Rĩrĩa Jesu aarĩ gũkũ thĩ aarũmĩrĩire kĩonereria gĩa Ithe atĩa?

³ Rĩrĩa Jesu aarĩ gũkũ thĩ arĩ mũndũ mũkinyanĩru, nĩ aarutire wĩra ũrĩa Jehova aamũheete arĩ na gĩkeno. Akĩrũmĩrĩra kĩonereria gĩa Ithe, o nake nĩ aaheire arutwo ake wĩra wa bata. Akĩgeria kũmateithia mone wĩra ũrĩa warĩ mbere yao, aamerire ũũ: “Ndamwĩra atĩrĩ, o ma, ma, Ũrĩa wĩĩ’hokete-rĩ, maũndũ marĩa niĩ njĩkaga, we no ameke o nake; o na eke manene kwĩ macio, nĩ ũndũ ndathiĩ gwĩ Ithe witũ.” (Joh. 14:12) Agĩtĩtĩrithia atĩ wĩra ũcio waagĩrĩirũo kũrutwo na mĩtũkĩ, oigire ũũ: “Ũndũ kũrĩ, no tũrute mawĩra ma ũrĩa wandekirie, tũmarute rĩu kũrĩ o mũthenya; ũtukũ nĩũgũũka, gũtarĩ mũndũ ũngĩhota kũruta wĩra.”—Joh. 9:4.

4-6. (a) Tũgunĩkĩte atĩa nĩ ũndũ wa Nuhu na Musa kũhingia wĩra ũrĩa maahetwo nĩ Jehova? (b) Muoroto wa mawĩra marĩa mothe Ngai aheaga andũ nĩ ũrĩkũ?

⁴ O na Jesu atanoka gũkũ thĩ, andũ no maaheagwo wĩra mwega wa kũruta. O na gũtuĩka Adamu na Hawa matiahingirie wĩra ũrĩa maahetwo, nĩ kũrĩ andũ angĩ maathĩkĩire Ngai. (Kĩam. 1:28) Ngai nĩ eerĩte Nuhu maũndũ mothe marĩa aagĩrĩirũo nĩ gwĩka rĩrĩa aakaga thabina ya kũhonokia andũ hĩndĩ ya Mũiyũro. Nuhu eekire maũndũ mothe kũringana na ũrĩa Jehova aamwathĩte. Nĩ ũndũ wa wathĩki ũcio wake, nĩkĩo tũrĩ muoyo ũmũthĩ!—Kĩam. 6:14-16, 22; 2 Pet. 2:5.

⁵ Musa nĩ aarũmĩrĩire biũ maũndũ mothe marĩa eerĩtwo mekwo hĩndĩ ya gwakwo kwa hema-ya-gũtũnganwo na hĩndĩ ya gũtabania maũndũ ma ũthĩnjĩri-Ngai. (Tham. 39:32; 40:12-16) O na ũmũthĩ no tũgunĩkaga nĩ ũndũ wa wĩhokeku wake wĩra-inĩ ũcio. Na njĩra ĩrĩkũ? Mũtũmwo Paulo aataarĩirie atĩ maũndũ macio, marĩa maarĩ thĩinĩ wa Watho maarĩ ngerekano ya “maũndũ marĩa mega magoka.”—Ahib. 9:1-5, 9; 10:1.

⁶ Rĩmwe na rĩmwe Ngai aheaga ndungata ciake mawĩra matiganĩte kũringana na ũrĩa muoroto wake ũthiaga ũkĩhingaga. O na kũrĩ ũguo, hingo ciothe wĩra o wothe ũrĩa aciheaga ũkoragwo ũrĩ wa kũmũgoocithia na kũguna arĩa mamwĩtĩkĩtie. Ũguo nĩguo kũrĩ harĩ maũndũ marĩa Jesu aahingirie atanoka gũkũ thĩ, na thutha ũcio rĩrĩa okire gũkũ thĩ. (Joh. 4:34; 17:4) O ũndũ ũmwe na ũcio, wĩra ũrĩa Jehova atũheete ũmũthĩ nĩ ũmũgoocithagia. (Mat. 5:16; thoma 1 Akorintho 15:58.) Nĩ kĩĩ kĩngĩtũma tuuge ũguo nĩguo kũrĩ?

GŨTŨŨRIA MAWONI MARĨA MAGĨRĨIRE MEGIĨ WĨRA ŨRĨA TŨHEETWO

7, 8. (a) Ũmũthĩ Akristiano marĩ na gĩtĩo gĩa kũruta wĩra ũrĩkũ? (b) Twagĩrĩirũo kuona ũtongoria wa Jehova atĩa?

⁷ No twĩtĩkanie atĩ nĩ gĩtĩo kĩnene gũkorũo Jehova akĩhũthĩra andũ matarĩ akinyanĩru marĩ arutithania wĩra hamwe nake. (1 Kor. 3:9) Arĩa makaga Nyũmba cia Igomano, Nyũmba cia Ũthamaki, na wabici cia honge marutaga wĩra ũtariĩ o ta ũrĩa Nuhu na Musa maarutire. O na angĩkorũo ũraruta wĩra wa gũcokereria Nyũmba ya Ũthamaki kana ũraruta wĩra Warwick, New York, kũrĩa tũraaka wabici itũ ya thĩ yothe, kenera wĩra ũcio ũheetwo. (Rora mbica kĩambĩrĩria-inĩ gĩa gĩcunjĩ gĩkĩ.) Wĩra ũcio nĩ ũtungata mũtheru. O na kũrĩ ũguo, Akristiano arĩa aingĩ mahetwo wĩra wa gwaka na njĩra ya kĩĩroho. Wĩra ũcio o naguo nĩ ũgoocithagia Jehova na ũkaguna arĩa mamwathĩkagĩra. (Atũm. 13:47-49, NW) Ithondeka rĩa Jehova nĩ rĩtũheaga ũtongoria mwega ũrĩa tũngĩruta wĩra ũcio na njĩra njega biũ. Nĩguo ũndũ ũcio ũhoteke, rĩmwe na rĩmwe no tũbatare kũheo mawĩra merũ.

⁸ Ndungata njĩhokeku cia Jehova nĩ ciendaga mũno gwathĩkĩra ũtongoria wake hingo ciothe. (Thoma Ahibirania 13:7, 17.) Kĩambĩrĩria-inĩ no twage gũtaũkĩrũo biũ nĩ itũmi cia kũruta wĩra ũrĩa tũheetwo na njĩra ĩrĩa twathĩtwo. O na kũrĩ ũguo, nĩ tũĩ wega atĩ nĩ tũgunĩkaga twanyita mbaru ũgarũrũku o wothe ũrĩa Jehova arona wagĩrĩire.

9. Athuri maigagĩra kĩũngano kĩonereria kĩrĩkũ ũhoro-inĩ wĩgiĩ wĩra?

⁹ Ũrĩa athuri matongoragia ciũngano nĩ wonanagia wendi wao mũnene wa kũhingia wendi wa Jehova. (2 Kor. 1:24; 1 Thes. 5:12, 13) Nĩ monanagia atĩ nĩ makoragwo mehaarĩirie kũruta wĩra na kĩyo na kũrũmĩrĩra ũtongoria ũrĩa maheagwo. Metĩkagĩra o na ihenya kũhũthĩra njĩra njerũ cia kũhunjia ũhoro wa Ũthamaki wa Ngai. O na gũtuĩka kĩambĩrĩria-inĩ amwe nĩ moonete ũrĩ ũndũ mũritũ kũbanga wĩra wa kũhunjia na thimũ, kũhunjia icukĩro-inĩ cia meri, kana kũhunjia kũndũ kwa mũingĩ, thutha wa kahinda gatarĩ coho nĩ maagĩire na moimĩrĩro mega. Kwa ngerekano, kĩama kĩmwe gĩa athuri bũrũri-inĩ wa Njĩrĩmani nĩ kĩabangire mapainia ana mahunjie gĩcigo-inĩ kĩmwe kĩa biacara kĩrĩa gĩatiganĩirio ihinda iraya. Michael oigire ũũ: “Kwa ihinda rĩa mĩaka ĩigana ũna tũtiahunjĩtie gĩcigo-inĩ kĩa biacara, na nĩ ũndũ ũcio nĩ twaiguaga guoya. No mũhaka akorũo Jehova nĩ onete ũndũ ũcio tondũ nĩ aatũteithirie mũno tũkĩgĩa na moimĩrĩro mega rũcinĩ rũu. Nĩ twakenire mũno tondũ nĩ twarũmĩrĩire ũtongoria ũrĩa waheanĩtwo nĩ Ũtungata Witũ wa Ũthamaki na tũkĩĩhoka Jehova atũteithie.” Hihi we nĩ wĩhaarĩirie kũgeria kũhũthĩra njĩra njerũ cia kũhunjia iria ingĩhũthĩka kwanyu?

10. Nĩ mogarũrũku marĩkũ mekĩtwo ica ikuhĩ ithondeka-inĩ rĩa Jehova?

¹⁰ Rĩmwe na rĩmwe nĩ kũbataraga gwĩkwo mogarũrũku ithondeka-inĩ rĩa Jehova. Mĩaka mĩnini mĩhĩtũku, wabici imwe cia honge nĩ iraturanĩirũo na ingĩ. O na gũtuĩka mogarũrũku ta macio nĩ matũmaga aarĩ na ariũ a Ithe witũ arĩa matungataga wabici-inĩ icio o nao meke mogarũrũku, thutha wa ihinda inini nĩ macokaga makona bata wa mogarũrũku macio. (Koh. 7:8) Na githĩ aarĩ na ariũ a Ithe witũ ta acio a kwĩrutĩra matikoragwo na gĩkeno nĩ ũndũ wa gũtwarithia na mbere maũndũ ma ithondeka rĩa Jehova!

11-13. Andũ amwe macemanĩtie na moritũ marĩkũ nĩ ũndũ wa mogarũrũku marĩa mekĩtwo ithondeka-inĩ?

¹¹ No twĩrute maũndũ ma bata mũno kuuma kũrĩ arĩa maahutirio ĩmwe kwa ĩmwe nĩ ũhoro ũcio wa gũturanĩrũo kwa wabici cia honge. Amwe ao maatungatĩire wabici-inĩ ciao cia honge mĩaka mĩingĩ. Mũthuri ũmwe na mũtumia wake arĩa maatungatagĩra kafamĩlĩ-inĩ kanini ka Betheli thĩinĩ wa Amerika ya Gatagatĩ nĩ mooririo magatungatĩre Betheli ya Mexico ĩrĩa yaarĩ nene hakuhĩ maita 30 ma Betheli yao. Rogelio oigire ũũ: “Ndwarĩ ũndũ mũhũthũ gũtiga andũ a famĩlĩ na arata.” Mũrũ wa Ithe witũ Juan, ũrĩa o nake woririo athiĩ agatungatĩre Mexico, oigire ũũ: “Gwĩka ũguo gũtariĩ hakuhĩ ta gũciarũo rĩngĩ, tondũ no mũhaka mũndũ ambĩrĩrie gũcaria arata angĩ. Ũndũ ũcio ũbataraga mũndũ emenyerie ũndũire na mĩĩkĩre mĩerũ ya maũndũ.”

¹² Andũ amwe arĩa maatungataga Betheli mabũrũri-inĩ mangĩ ma Rũraya, nĩ mooririo mathiĩ magatungatĩre wabici-inĩ ya rũhonge ya Njĩrĩmani. O nao ũndũ ũcio ndwarĩ mũhũthũ harĩ o. Mũndũ ũkenagio nĩ kwĩrorera irĩma no one atĩ ndwarĩ ũndũ mũhũthũ harĩ arĩa maathamire Switzerland, magĩtiga bũrũri ũcio wao ũrĩ irĩma nene na thaka. Nao arĩa maathamire Austria kĩambĩrĩria-inĩ nĩ meeriragĩria mũno mũikarĩre ũrĩa maarĩ naguo thĩinĩ wa famĩlĩ nini ya Betheli ya Austria.

¹³ Arĩa mathamagĩra bũrũri ũngĩ, mabataraga kũmenyera mũciĩ mwerũ, kũrutithania wĩra na aarĩ na ariũ a Ithe witũ mataroyaine nao, na rĩngĩ na rĩngĩ kũruta wĩra ngũrani na ũrĩa mararutaga. Ningĩ nĩ mabataraga kũmenyera kĩũngano kĩerũ na kũhunjia thĩinĩ wa gĩcigo kĩerũ na hihi o na kũhunjia na rũthiomi rũngĩ. Gwĩka mogarũrũku ta macio ti ũndũ mũhũthũ. O na kũrĩ ũguo, andũ aingĩ arĩa matungataga Betheli nĩ metĩkĩrĩte gwĩka mogarũrũku macio. Nĩ kĩĩ kĩmateithĩtie gwĩka ũguo?

14, 15. (a) Gũtekũmakania wĩra ũrĩa maraheo-rĩ, andũ aingĩ monanĩtie atĩa atĩ nĩ moyaga na ũritũ mweke wa kũrutithania wĩra hamwe na Jehova? (b) Matũigĩire kĩonereria kĩega ũndũ-inĩ ũrĩkũ?

¹⁴ Mwarĩ wa Ithe witũ Grethel oigire ũũ: “Ndetĩkĩrire gũthaamĩra bũrũri ũngĩ tondũ ĩyo yarĩ njĩra ya kuonia Jehova atĩ wendo ũrĩa ngoragwo naguo harĩ we ndũngĩkĩrĩrũo mĩhaka nĩ bũrũri, mwako mũna, o na kana wĩra mũna.” Nake mwarĩ wa Ithe witũ Dayska oigire ũũ: “Rĩrĩa ndaaririkanire atĩ warĩ wendi wa Jehova thiĩ ngatungate bũrũri ũngĩ, ndetĩkĩrire ũndũ ũcio ndĩ na gĩkeno.” Nao André na mũtumia wake Gabriela, mooigire ũũ: “Tuonire ũrĩ mweke ũngĩ wa gũtungatĩra Jehova na njĩra ya kwamba gũtigana na merirĩria maitũ. Tweĩrire, ‘Rĩrĩa Jehova arenda wĩke ũgarũrũku, nĩ wega kwĩhaarĩria kũwĩka handũ ha gũcaria ciĩgwatio.’”

¹⁵ Nĩ ũndũ wa wabici cia honge gũturanĩrũo, amwe arĩa matungataga Betheli nĩ matũmagwo magatungatĩre marĩ mapainia. Rĩrĩa wabici ya rũhonge ya Denmark, ya Norway, na ya Sweden ciaturanĩirũo igĩthondeka wabici ya rũhonge ya Scandinavia, amwe arĩa maatungataga wabici-inĩ icio nĩ maatũmirũo marĩ mapainia. Amwe ao nĩ Florian na Anja, arĩa mooigire ũũ: “O na gũtuĩka ti ũndũ mũhũthũ, tuonaga gũthamĩra gũkũ ũrĩ ũndũ wa gĩkeno. Tuonaga kĩrĩ gĩtĩo kĩnene kũhũthĩrũo nĩ Jehova gũtekũmakania kũrĩa tũratungatĩra. No tuuge kuuma ngoro atĩ nĩ tũrathimĩtwo mũno.” O na gũtuĩka aingĩ aitũ tũtirabatara gwĩka ta aarĩ na ariũ a Ithe witũ acio, no twĩgerekanie na mwerekera wao wa kwĩrutĩra harĩ kũiga maũndũ ma Ũthamaki mbere. (Isa. 6:8) Hingo ciothe Jehova nĩ arathimaga arĩa moyaga na ũritũ mweke ũrĩa marĩ naguo wa kũrutithania wĩra hamwe nake, gũtekũmakania kũrĩa maratungatĩra.

THIĨ NA MBERE GŨKENERA MWEKE ŨRĨA ŨRĨ NAGUO WA KŨRUTITHANIA WĨRA NA JEHOVA!

16. (a) Rĩandĩko rĩa Agalatia 6:4 rĩtwĩraga twĩke atĩa? (b) Mweke ũrĩa mũnene mũno mũndũ angĩkorũo naguo nĩ ũrĩkũ?

¹⁶ Kaingĩ andũ matarĩ akinyanĩru nĩ meringithanagia na arĩa angĩ. Ĩndĩ, Kiugo kĩa Ngai gĩtwĩraga twĩcirie o maũndũ marĩa tũngĩhota kũhingia tũrĩ mũndũ kĩũmbe. (Thoma Agalatia 6:4.) Aingĩ aitũ tũtikoragwo na mĩeke ya gũtongoria maũndũ thĩinĩ wa ithondeka. Ningĩ ithuothe tũtingĩtuĩka mapainia kana amishonarĩ kana tũthiĩ tũgatungate Betheli. Hatarĩ nganja, ĩyo nĩ mĩeke mĩega mũno! O na kũrĩ ũguo, twagĩrĩirũo nĩ kũririkana atĩ mweke ũrĩa mũnene mũno mũndũ angĩkorũo naguo, nĩ ũrĩa ithuothe tũrĩ naguo, wa kũrutithania wĩra hamwe na Jehova wĩra-inĩ wa kũhunjia. Ũcio nĩ mweke twagĩrĩirũo kuoya na ũritũ mũno!

17. Nĩ ũndũ ũrĩkũ tũngĩremwo nĩ gwĩka thĩinĩ wa thĩ ĩno ya Shaitani, no nĩkĩ tũtiagĩrĩirũo nĩ gũkua ngoro?

¹⁷ Thĩinĩ wa thĩ ĩno ya Shaitani, no tũremwo nĩ gũtungatĩra Jehova ũrĩa tũngĩenda. No tũremwo nĩ gũtungatĩra na njĩra nene nĩ ũndũ wa maũndũ marĩa twĩhokeirũo famĩlĩ-inĩ, ũgima witũ wa mwĩrĩ, kana maũndũ mangĩ. Ĩndĩ ũndũ ũcio ndwagĩrĩirũo nĩ gũtũũraga ngoro. Hingo ciothe no tũhote kũhunjia ũhoro wa rĩĩtwa rĩa Jehova na Ũthamaki wake, o na tũrĩ na mathĩna mahaana atĩa. Ũndũ ũrĩa wa bata nĩ gwĩka o ũrĩa wothe ũngĩhota na kũhoya Jehova arathimage aarĩ na ariũ a Ithe witũ arĩa marĩ na ũhoti wa gwĩka maũndũ maingĩ gũkĩra marĩa ũngĩhota. Ririkana atĩ mũndũ o wothe ũgoocaga rĩĩtwa rĩa Jehova nĩ wa bata mũno maitho-inĩ make.

18. Nĩ maũndũ marĩkũ twagĩrĩirũo gũkorũo twĩhaarĩirie kwamba gũtigana namo, na nĩkĩ?

¹⁸ O na gũtuĩka nĩ tũrĩ mawathe maingĩ na tũtirĩ akinyanĩru, Jehova nĩ akenaga agĩtũhũthĩra tũrĩ arutithania wĩra hamwe nake. Nĩ tũcokagia ngatho mũno nĩ ũndũ wa mweke ũrĩa tũrĩ naguo wa kũrutithania wĩra na Ngai matukũ-inĩ maya ma kũrigĩrĩria! Nĩ ũndũ ũcio, twagĩrĩire gũkorũo twĩharĩirie kwamba gũtigana na maũndũ maingĩ marĩa tũngĩenda gũthingata, tondũ nĩ tũĩ atĩ thĩinĩ wa thĩ yake njerũ Jehova nĩ agaatũhotithia gũkenera “muoyo ũrĩa muoyo ma”—muoyo wa tene na tene tũrĩ na gĩkeno na thayũ.—1 Tim. 6:18, 19.

19. Nĩ kĩĩ Jehova atũigĩire mahinda marĩa maroka?

¹⁹ Tondũ tũrĩ hakuhĩ mũno kũingĩra thĩinĩ wa thĩ njerũ, nĩ wega kũririkana ũrĩa Musa eerire Aisiraeli kahinda kanini matanaingĩra Bũrũri wa Kĩĩranĩro. Aamerire ũũ: “Jehova Ngai waku nĩagagũtongia, akũgune mawĩra-inĩ mothe marĩa ũkaruta na moko maku.” (Gũcok. 30:9) Thutha wa Hari-Magedoni, arĩa makoretwo makĩrutithania wĩra na Ngai nĩ makaagaya bũrũri ũrĩa amerĩire. Kwambĩrĩria hĩndĩ ĩyo, nĩ tũkaagĩa na wĩra mwerũ wa gũthondeka thĩ ĩtuĩke paradiso.