MACOKIO MA CIŨRIA CIA BIBILIA
Ciana ingĩĩruta atĩa kwenda Ngai?
Hũthĩra ũũmbi gũteithia mwana waku amenye Ngai na amwende
Ciana ciaku no ciĩrute kwenda Ngai angĩkorũo nĩ ikũgĩa na ũira atĩ arĩ kuo na atĩ nĩ aciendete. Nĩguo ciende Ngai, nĩ irabatara kũmũmenya. (1 Johana 4:8) Kwa ngerekano, nĩ irabatara kũmenya: Muoroto wa Ngai akĩũmba mũndũ warĩ ũrĩkũ? Ngai etĩkagĩria mĩnyamaro nĩkĩ? Nĩ maũndũ marĩkũ Ngai arĩĩkĩra andũ mahinda mokĩte?—Thoma Afilipi 1:9.
Nĩguo ũteithie ciana ciaku kwenda Ngai, no mũhaka o nawe ũcionie atĩ nĩ ũmwendete. Na ciona ũguo, kwahoteka nĩ ikũrũmĩrĩra kĩonereria gĩaku.—Thoma Gũcokerithia Maathani 6:5-7; Thimo 22:6.
Ũngĩka atĩa nĩguo ũkinyĩre ciana ciaku ngoro?
Kiugo kĩa Ngai nĩ kĩrĩ ũhoti. (Ahibirania 4:12) Nĩ ũndũ ũcio, teithĩrĩria ciana ciaku kwĩruta maũndũ mayo ma mũthingi. Nĩguo Jesu akinyĩre ngoro cia andũ-rĩ, aamoragia ciũria, akamathikĩrĩria, na agataarĩria Maandĩko. O nawe no ũkinyĩre ngoro ya ciana ciaku, ũngĩĩgerekania na njĩra ya Jesu ya kũrutana.—Thoma Luka 24:15-19, 27, 32.
Makĩria ma ũguo, ũhoro ũrĩa ũrĩ thĩinĩ wa Bibilia wĩgiĩ ũrĩa Ngai anateithia andũ, no ũteithie ciana kũmũmenya na kũmwenda. Ũhoro ũhaarĩrĩirio wa gũgũteithia gwĩka ũguo no woneke thĩinĩ wa www.jw.org/ki.—Thoma 2 Timotheo 3:16.