Mũbango wa Kweheria Mũndũ Wĩhĩtie Kĩũngano-inĩ nĩ wa Wendo Nĩkĩ?

MŨRŨ wa Ithe witũ ũmwe wĩtagwo Julian oigire ũũ: “Rĩrĩa ndaaiguire kwanĩrĩrũo atĩ rĩu mwanake wakwa ti Mũira wa Jehova rĩngĩ, ndaaiguire ta thĩ yathira. Nĩwe warĩ irigithathi rĩakwa, na ningĩ twarĩ ũrata mũno na nĩ twekaga maũndũ maingĩ hamwe. Aarĩ mwana mwega mũno, ĩndĩ agĩcoka agĩcenjia akĩambĩrĩria mĩtugo mĩũru. Ihinda-inĩ rĩu mũtumia wakwa nĩ aarĩrire mũno, na ndiamenyaga ũrĩa ingĩmũmĩrĩria. Nĩ maita maingĩ tweyũragia kana hihi harĩ ũndũ tũtekire ũrĩa kwagĩrĩire.”

Nĩ kĩĩ kĩngĩgĩtũma tuuge atĩ kweheria Mũkristiano kĩũngano-inĩ nĩ mũbango wa wendo angĩkorũo kũrehagĩra andũ ruo rũnene ũguo? Kũrĩ na mũthingi ũrĩkũ wa Kĩĩmandĩko wa kuoya ikinya iritũ ũguo? Na nĩ maũndũ marĩkũ matũmaga mũndũ eherio thĩinĩ wa kĩũngano?

MAŨNDŨ MERĨ MARĨA MATŨMAGA MŨNDŨ EHERIO KĨŨNGANO-INĨ

Nĩguo mũndũ eherio kĩũngano-inĩ no mũhaka hakorũo na maũndũ maya merĩ: Wa mbere, no mũhaka akorũo arĩ Mũkristiano mũbatithie na nĩ ekĩte mehia maritũ. Wa kerĩ, nĩ aregete kwĩrira mehia macio make.

O na gũtuĩka Jehova nderĩgagĩrĩra tũkorũo tũrĩ akinyanĩru-rĩ, nĩ akoragwo na ithimi ciake cia ũthingu iria erĩgagĩrĩra ndungata ciake irũmĩrĩre. Kwa ngerekano, oigaga atĩ no mũhaka twĩtheme mehia maritũ ta ngomanio itagĩrĩire, ũhoi wa mĩhianano, ũici, ũtunyani, ũũragani, na kũrongoria ndaimono.​—1 Kor. 6:​9, 10; Kũg. 21:8.

Na githĩ to twĩtĩkanie atĩ ithimi cia Jehova cia ũthingu nĩ cia kĩhooto na muoroto wacio nĩ gũtũgitĩra? Nũ ũtangĩenda gũtũũrania na andũ mendete thayũ na a kwĩhokeka? Ũguo nĩguo ithuĩ andũ a Jehova tũkoragwo tũtariĩ nĩ ũndũ wa mwĩhĩtwa ũrĩa twĩhĩtaga hĩndĩ ya kwĩyamũrĩra Ngai tũkoiga atĩ tũrĩtũũraga kũringana na ithimi cia Kiugo gĩake.

Ĩ Mũkristiano mũbatithie angĩka mehia maritũ nĩ ũndũ wa kũnyihĩrũo nĩ hinya? Nĩ kũrĩ ndungata njĩhokeku cia tene ciekire mehia ta macio, ĩndĩ Ngai ndaigana gũcirega biũ. Mũthamaki Daudi nĩ ũmwe wa ndungata icio. Daudi nĩ eekire mehia ma ũtharia na kũũragana; o na kũrĩ ũguo, mũnabii Nathani aamwĩrire ũũ: ‘Jehova nĩ akwehereria wĩhia ũcio waku.’​—2 Sam. 12:⁠13.

Jehova oheire Daudi mehia make tondũ nĩ eerirĩte biũ. (Thab. 32:​1-5) O na ũmũthĩ Mũkristiano ndangĩeherio kĩũngano-inĩ angĩkorũo nĩ erirĩte biũ na agatigana na mehia. (Atũm. 3:​19; 26:20) Athuri arĩa marĩ kamĩtĩ-inĩ ya ciira ya gũteithia mũndũ wĩkĩte mehia maritũ mangĩona atĩ nderirĩte biũ magĩrĩirũo nĩ kũmweheria kĩũngano-inĩ.

Kĩambĩrĩria-inĩ twahota kuona ta itua rĩa kweheria mũndũ wĩhĩtie kĩũngano-inĩ ta rĩrĩ rĩũru kana ta rĩtarĩ rĩa kĩhooto, makĩria angĩkorũo nĩ mũndũ wa famĩlĩ itũ. Ĩndĩ Kiugo kĩa Ngai nĩ kĩheanĩte itũmi njega cia kuonania atĩ itua rĩu rĩkoragwo rĩrĩ rĩa wendo.

ŨGUNI WA KWEHERIA MŨNDŨ KĨŨNGANO-INĨ

Jesu oigire atĩ “ũũgĩ wa Ngai wonanagio atĩ nĩ wa ma kana wa ũthingu nĩ maciaro maaguo.” (Mat. 11:​19, The Holy Bible in Gĩkũyũ Language.) Itua rĩa ũũgĩ rĩa kweheria kĩũngano-inĩ mũndũ wagĩte kwĩrira nĩ rĩrehaga maciaro marĩ na ũthingu. Ta wĩcirie ũhoro wa maciaro maya matatũ:

Kweheria ehia kĩũngano-inĩ nĩ gũtĩithagia rĩĩtwa rĩa Jehova. Tondũ twĩtanĩtio na rĩĩtwa rĩa Jehova-rĩ, mĩthiĩre itũ no ĩtĩithie kana ĩcambithie rĩĩtwa rĩake. (Isa. 43:​10) O ta ũrĩa mĩthiĩre ya mwana ĩngĩtĩithia kana ĩcambithie aciari ake, noguo mĩthiĩre ya andũ a Jehova ĩngĩmũtĩithia kana ĩmũcambithie. Rĩĩtwa rĩega rĩa Ngai nĩ rĩgoocithagio angĩkorũo andũ arĩa metanĩtio narĩo nĩ mararũmĩrĩra biũ ithimi ciake cia ũthingu. Matukũ-inĩ ma Ezekieli, andũ a ndũrĩrĩ maakuruhithanagia Ayahudi na rĩĩtwa rĩa Jehova. (Ezek. 36:​19-​23) O ũndũ ũmwe na ũcio, mahinda-inĩ maya andũ makuruhithanagia Aira a Jehova na rĩĩtwa Jehova. Nĩ ũndũ ũcio, twathĩkĩra maathani ma Jehova nĩ tũrĩgoocithagia rĩĩtwa rĩake.

No tũcambithie rĩĩtwa itheru rĩa Jehova tũngĩĩingĩria thĩinĩ wa mĩtugo ya waganu. Mũtũmwo Petero aaheire Akristiano ũtaaro ũyũ: “Tuĩkai ciana cia gwathĩka, na mũtikehaananie na mũhianĩre wa ũrĩa mwatariĩ mbere, rĩrĩa mwatũire mũtoĩ Ngai na mwatũire mwathagwo nĩ merirĩria moru. Ĩndĩ kuona ũrĩa wamwĩtire nĩ mũtheru, o na inyuĩ tuĩkai atheru mĩthiĩre-inĩ yanyu yothe; nĩ ũndũ kwandĩkĩtwo atĩrĩ, No nginya mũtuĩke atheru, nĩ ũndũ niĩ ndĩ mũtheru.” (1 Pet. 1:​14-​16) Mĩthiĩre mĩtheru na ya ũthingu nĩ ĩgoocithagia rĩĩtwa rĩa Ngai.

Ningĩ Mũira wa Jehova angĩmenyera gwĩka maũndũ mooru, no kũhoteke arata na andũ arĩa mamũũĩ mamenye ũndũ ũcio. Nĩ ũndũ ũcio, kweheria mũndũ ta ũcio kĩũngano-inĩ kuonanagia atĩ Jehova nĩ akoragwo na andũ atheru arĩa marũmagĩrĩra biũ ithimi ciake nĩguo mathiĩ na mbere gũtũũria ũtheru ũcio. Thĩinĩ wa bũrũri wa Switzerland, mũthenya ũmwe guokire mũndũ thĩinĩ wa Nyũmba ya Ũthamaki akiuga atĩ arenda gũtuĩka Mũira wa Jehova. Mwarĩ wa nyina nĩ eeheretio kĩũngano-inĩ nĩ ũndũ wa kwĩingĩria maũndũ-inĩ ma waganu, na nĩ ũndũ ũcio mũndũ ũcio akiuga atĩ arenda kũnyitanagĩra na ithondeka “rĩtarekagĩrĩria waganu.”

Kweheria ehia nĩ kũgitagĩra kĩũngano gĩtheru gĩa Gĩkristiano. Mũtũmwo Paulo eerire Akristiano a Korintho atĩ nĩ ũgwati kũrekereria ehia matarerira maikare thĩinĩ wao. Aaringithanirie mĩthiĩre mĩũru ya andũ ta acio na ndawa ya kũimbia ĩrĩa ĩtũmaga mũtu wothe ũimbe. Oigire ũũ: ‘Gacunjĩ kanini ka ndawa ya kũimbia mũgate nĩkaimbagia kĩmere gĩothe.’ Agĩcoka akĩmahe ũtaaro ũyũ: ‘Eheriai mũndũ ũrĩa mwaganu oime harĩ inyuĩ.’​—1 Kor. 5:​6, 11-​13.

‘Mũndũ ũcio mwaganu’ ũgwetetwo nĩ Paulo aathiaga o na mbere na ũtharia. Andũ arĩa angĩ kĩũngano-inĩ o na nĩ maambĩrĩirie kuona ta mĩthiĩre yake ĩtaarĩ mĩũru mũno. (1 Kor. 5:​1, 2) Korũo mehia macio maritũ nĩ maathire na mbere kũrekererio, Akristiano arĩa angĩ mangĩonire ta warĩ ũndũ mwagĩrĩru kũrũmĩrĩra mĩthiĩre ya waganu ĩrĩa yarĩ itũũra-inĩ rĩa Korintho. Kũrekereria ehia matarerira mathiĩ na mbere gũkorũo thĩinĩ wa kĩũngano gũtũmaga andũ mahũthie ithimi cia Ngai cia ũthingu. (Koh. 8: 11) Makĩria ma ũguo, ehia ta acio no matuĩke ta “mahiga matekuoneka marĩa mahĩnganaga” na mathũkie wĩtĩkio wa andũ arĩa angĩ kĩũngano-inĩ.​—Jud. 4, 12.

Kweheria mũndũ kĩũngano-inĩ no gũtũme one bata wa kwĩrira. Hĩndĩ ĩmwe Jesu nĩ aaririe ũhoro wa mwanake woimire mũciĩ gwa ithe na agĩthiĩ agĩthũkangia igai rĩake na njĩra ya gũikara ũtũũro wa kwĩyananga. Nĩ ũndũ wa gũcemania na mathĩna maingĩ, mwanake ũcio weitangĩte nĩ aamenyire atĩ ũtũũro nja ya mũciĩ gwa Ithe ndwarĩ na gĩkeno o na hanini. Macũngĩrĩro-inĩ mwanake ũcio agĩĩcokera, akĩĩrira, na akĩoya ikinya rĩa gũcoka kũrĩ famĩlĩ yao. (Luk. 15:​11-​24) Ũrĩa Jesu aataarĩirie gĩkeno kĩrĩa Ithe wa mwanake ũcio aagĩire nakĩo nĩ ũndũ wa mũriũ wake kwĩrira na gũcoka mũciĩ, nĩ ũtũteithagia gũtaũkĩrũo nĩ ũrĩa Jehova aiguaga. Jehova atwĩraga ũũ: “Ndikenaga nĩ ũndũ wa gĩkuũ kĩa mũndũ mwaganu; no rĩrĩ, nĩ kaba mũndũ ũcio mwaganu agarũrũke atigane na mĩthiĩre ĩo yake nĩguo atũũre muoyo.”​—Ezek. 33:⁠11.

O ũndũ ũmwe na ũcio, arĩa meheretio thĩinĩ wa famĩlĩ yao ya kĩĩroho, nĩyo kĩũngano gĩa Gĩkristiano, no kũhoteke mecokere na merire. Kuona maciaro moru ma mehia mao, o hamwe na kũririkana gĩkeno kĩrĩa maarĩ nakĩo rĩrĩa maarĩ na ũrata na Jehova o hamwe na andũ ake, no gũtũme mecokere.

No nĩguo kũgĩe na moimĩrĩro mega, wendo na ũmĩrĩru nĩ ikũbatarania. Mwandĩki wa Thaburi, Daudi, oigire ũũ: “Mũndũ mũthingu o na nĩaninge, kũu nĩ kũnduga aanduga; kũndũithia nĩandũithie, naguo no ta maguta ngũhakwo mũtwe.” (Thab. 141:⁠5) Kwa ngerekano-rĩ, ta hũũra mbica mũndũ aitĩtwo nĩ nyama. Akaremwo nĩ kũhuhia na akaaga hinya nginya akaremwo nĩ kwaria. Mũndũ ũcio angĩaga gũteithĩrĩrio na ihenya nĩ egũkua, ĩndĩ mũrata wake akamũringa ngundi ya mũgongo nĩguo nyama ĩyo yume. Ngundi ĩyo nĩ ĩkũmũiguithia ruo ĩndĩ nĩ ĩkũhonokia muoyo wake. O ũndũ ũmwe na ũcio, nĩguo ateithĩke, Daudi nĩ aamenyaga no abatare kũrũngwo nĩ mũndũ mũthingu na no aigue ruo hĩndĩ ĩrĩa ararũngwo.

Kaingĩ, iherithia rĩa kweheria mũndũ kĩũngano-inĩ nĩ rĩmũheaga ũteithio ũrĩa arabatara nĩguo ecokere. Kwa ngerekano, thutha wa mĩaka ikũmi mwanake wa Julian ũrĩa ũgwetetwo kĩambĩrĩria-inĩ gĩa gĩcunjĩ gĩkĩ, nĩ aagarũrĩire mĩthiĩre yake, agĩcokio kĩũngano-inĩ na rĩu nĩ mũthuri wa kĩũngano. Oigaga ũũ: “Kweherio kĩũngano-inĩ nĩ gwatũmire nyone wega moimĩrĩro ma mĩthiĩre yakwa. Rĩu nĩrĩo iherithia rĩrĩa ndaabataraga.”​—Ahib. 12:​7-​11.

NJĨRA YA WENDO YA KŨHIŨRANIA NA ARĨA MEHERETIO

Ma nĩ atĩ, kweherio kĩũngano-inĩ ti ũndũ ũrehaga gĩkeno o na hanini. O na kũrĩ ũguo, gũtiagĩrĩirũo kuonwo ta arĩ kuo mũico wa maũndũ mothe. Ithuothe tũrĩ na itemi rĩa gũtigĩrĩra atĩ mũbango ũcio nĩ wahingia muoroto waguo.

Athuri a kĩũngano arĩa makoragwo na itemi iritũ rĩa kwĩra mũndũ ũhoro wa itua rĩa kũmweheria kĩũngano-inĩ nĩ merutanagĩria kuonania wendo ta wa Jehova. Rĩrĩa maramũmenyithia itua rĩao, mamũtaaragĩria na njĩra ya wendo makinya marĩa agĩrĩirũo nĩ kuoya nĩguo acokio kĩũngano-inĩ. Nĩ ũndũ wa kũririkania arĩa meheretio kĩũngano-inĩ maũndũ marĩa mangĩka nĩguo macokerere Jehova, thutha wa ihinda rĩna athuri no mabange gũceerera arĩa monanĩtie mwerekera wa gũcenjia mĩthiĩre yao.a

Andũ a famĩlĩ no monanie wendo harĩ kĩũngano na harĩ ũrĩa wĩhĩtie na njĩra kũnyita mbaru itua rĩa kũmweheria kĩũngano-inĩ. Julian oigire ũũ: “Ndaatigire gũtuĩka mwana wakwa. O na kũrĩ ũguo mĩthiĩre yake nĩ yekĩrĩte rũthingo gatagatĩ gaitũ nake.”

Andũ othe kĩũngano-inĩ magĩrĩirũo kuonania wendo wa Gĩkristiano na njĩra ya gwĩthema kwaranĩria kana gũkorũo na ũkuruhanu o wothe na mũndũ weheretio kĩũngano-inĩ. (1 Kor. 5:​11; 2 Joh. 10, 11) Na njĩra ĩyo makonania atĩ nĩ maranyita mbaru itua rĩa Jehova kũgerera kũrĩ athuri a kĩũngano. Ningĩ no monanie wendo harĩ andũ a famĩlĩ ya mũndũ ũcio weheretio na maamomĩrĩrie tondũ no makorũo magĩtangĩka mũno. Tũtiagĩrĩirũo nĩ gũtũma andũ acio meigue o nao ta mataagĩrĩire kũnyitanĩra na Akristiano arĩa angĩ.​—Rom. 12:​13, 15.

Julian aacokire akiuga ũũ: “Kweheria ehia kĩũngano-inĩ nĩ mũbango wa bata mũno tondũ nĩ ũtũteithagia gũikara kũringana na ithimi cia Jehova. O na gũtuĩka nĩ ũrehaga ruo rũnene, macũngĩrĩro-inĩ ũkoragwo na maciaro mega mũno. Korũo nĩ ndaanyitanagĩra na mwanake ũcio wakwa hĩndĩ ĩyo aarĩ na mĩthiĩre ĩyo mĩũru, ndangĩacokereire Jehova.”