KUUMA NGOTHI-INĨ | ŨRĨA TŨNGĨHIŨRANIA NA MĨTANGĨKO
Mĩtangĩko Ĩrĩ Kũndũ Guothe!
“Ndaathire kũgũra irio ngĩkora no mĩthiguiti tu—yarĩ goro ta mĩguongo! Mũthenya ũyũ ũngĩ matuka-inĩ gũtiarĩ o na kĩ kĩngĩrĩo.”—Paul, kuuma Zimbabwe.
“Mũthuri wakwa akĩnjikaria thĩ akĩnjĩra nĩ aratũtiga. Ingĩahiũranirie atĩa na ũndũ ũcio? Kũngĩahanĩkire atĩa harĩ ciana ciakwa?”—Janet, kuuma Amerika (U.S.).
“Rĩrĩa ingʼora ciagambire, ndeethire handũ ha kwĩhitha na ngĩkoma thĩ, mbomu o igĩtuthũkaga. Mathaa maingĩ thutha ũcio, moko makwa no mainainaga.”—Alona, kuuma Israel.
Tũratũũra mahinda me na mĩtangĩko, “mahinda ma ũgwati.” (2 Timotheo 3:1) Andũ aingĩ maratangĩka nĩ ũndũ wa maũndũ ta; mathĩna ma mbeca, famĩlĩ kũharagana, mbaara, gũtuthũka kwa mĩrimũ, na icanjama cia ndũire na ingĩ irehagwo nĩ andũ. Hamwe na maũndũ macio, o mũndũ kĩũmbe arĩ na ũndũ ũramũtanga: ‘Hihi gathundo kau ndĩronire mwĩrĩ-inĩ wakwa gagaacoka gũtuĩka kansa?’ ‘Hihi ciana cia ciana ciakwa igaakũrĩra kũ?’
Ti mĩtangĩko yothe mĩũru. Nĩ ũndũ wa ndũire kũigua tũgĩtangĩka tũrĩ hakuhĩ gwĩka kĩgeranio kana twĩ kwa ndagĩtarĩ twetereire gũthimwo, tũkĩenda gwĩka ũndũ tũrĩ mbere ya andũ, kana tũkĩũrio ciũria rĩrĩa tũretha wĩra. Gwĩtigĩra ũgwati nĩ gũtũteithagia gwĩthema ũndũ mũru. No mĩtangĩko ĩkĩrĩtie gĩthimi kana ĩtarathira ĩkoragwo na moimĩrĩro moru. Ũthuthuria wĩkĩtwo ica ikuhĩ gatagatĩ-inĩ ka andũ agima makĩria ma 68,000, nĩ wonanĩtie atĩ nginya mĩtangĩko ĩtarĩ mĩingĩ mũno no ĩtũme mũndũ akue tene. Nĩkĩo Jesu aarĩ na gĩtũmi kĩega akĩũria ũũ: “Nũ wanyu ũngĩhota kwĩongerera kĩũga gĩake mũkono ũmwe nĩ ũndũ wa gwĩtangĩkĩra?” Ma nĩ atĩ, gũtangĩka gũtiongagĩrĩra mũndũ mĩaka. Nĩkĩo Jesu aaheanire ũtaaro ũyũ: ‘Tigagai gũtangĩka.’ (Mathayo 6:25, 27) No rĩrĩ, ũndũ ũcio ũngĩhoteka atĩa?
Macokio mehocetie harĩ kũhũthĩra ũũgĩ mũkinyanĩru, gũkũria wĩtĩkio wa ma harĩ Ngai, na gũkũria mwĩhoko mũrũmu wa mahinda mokĩte. O na angĩkorũo rĩu tũtiracemania na maũndũ maritũ, twahota gũgaacemania namo mahinda marĩa marĩ mbere. Kwoguo reke tuone ũrĩa kũhũthĩra maũndũ macio gũteithĩtie Paul, Janet, na Alona kũhiũrania na mĩtangĩko.