Mĩtangĩko Ĩgiĩ Famĩlĩ

Janet oigire ũũ: “Kahinda kanini thutha wa baba gũkua, mũthuri wakwa nĩ aanjĩrire atĩ e na ũrata na mũtumia ũngĩ. Thutha ũcio, o na ategũtũmenyithia rĩngĩ kana gũtuugĩra ũhoro, akĩhaata nguo ciake ciothe kabati, na akĩndiga na ciana citũ igĩrĩ.” Janet nĩ onire wĩra, no mũcara wake ndwaiganaga kũhingia mabataro mao mothe. Makĩria ma gũkorũo na mabataro ma kĩĩmbeca, nĩ akoretwo na mĩtangĩko ĩngĩ. Oigire ũũ: “Nĩ ndaaritũhĩirũo mũno nĩ mĩtangĩko ya ũrĩa ngũhiũrania na mũrigo ũcio mũnene ndĩ wika. Ndaiguaga ũru tondũ ndiahotaga kũhe ciana ciakwa indo iria ciothe maabataraga, ta ũrĩa aciari arĩa angĩ mekaga. O na rĩu no ndangagwo nĩ rĩĩciria rĩa ũrĩa andũ angĩ manyonaga hamwe na ciana ciakwa. Hihi nĩ meyũragia kana nĩ ndekire ũrĩa wothe ingĩahotire kũgitĩra kĩhiko gĩakwa gĩtikaharagane?”

Mahoya nĩ mateithagia Janet kũhooreria meciria na gũkũria ũrata wake na Ngai. “Nĩ ngoragwo na ihinda iritũ mũno ũtukũ, nĩ ũndũ rĩrĩa gũkirĩte ki-rĩ, nĩrĩo nyambagĩrĩria gũtarania. Kũhoya na gũthoma Bibilia nĩ kũndeithagia nyone toro. Rĩandĩko rĩrĩa nyendete mũno nĩ Afilipi 4:6, 7: ‘Tigagai gwĩtanga nĩ ũndũ o na ũrĩkũ: no rĩrĩ, menyithagiai Ngai maũndũ marĩa mothe mwendaga, mũkĩmũhoyaga na mũkĩmũthaithaga, hamwe na kũmũcokeria ngatho. Naguo thayũ wa Ngai, ũrĩa ũtangĩmenyeka ũrĩa ũtariĩ, nĩũrĩikaragia ngoro cianyu o na gwĩciria kwanyu.’ Nĩ ngoretwo ngĩhoya kaingĩ ũtukũ na nĩ njiguaga thayũ wa Jehova wanyũmĩrĩria.”

Ciugo cia Jesu cia gũtũũmĩrĩria ciĩgiĩ mahoya thĩinĩ wa Mahunjio ma Kĩrĩma-inĩ cihutagia mĩtangĩko ya mĩthemba yothe: “Ithe wanyu nĩoĩ maũndũ marĩa mamũbatairie mũtanamũhoya.” (Mathayo 6:8) Na nĩ tũbatiĩ kũmũhoya. Njĩra ya mbere ĩrĩa ‘tũngĩkuhĩrĩria Ngai’ nayo nĩ kũgerera mahoya. Moimĩrĩro ma gwĩka ũguo nĩ marĩkũ? “Nake nĩekũmũkuhĩhĩria.”—Jakubu 4:8.

Nĩ ma, rĩrĩa twaitũrũra mĩtangĩko iitũ kũgerera mahoya nĩ tũiguaga wega, no nĩ harĩ ũndũ ũngĩ makĩria. Jehova, “Mũigua wa mahoya-rĩ,” ningĩ nĩ ateithagia arĩa mamũcaragia marĩ na wĩtĩkio. (Thaburi 65:2) Nĩkĩo gĩatũmire Jesu arute arũtwo ake atĩ “nĩmaagĩrĩirũo nĩ kũhoyaga Ngai hingo ciothe mategũtirika [kana gũkua ngoro.]” (Luka 18:1) No mũhaka tũthiĩ na mbere kũhoya ũtongoria wa Ngai na ũteithio wake, twĩ na ũũma atĩ nĩ egũtũhe ngerenwa nĩ ũndũ wa wĩtĩkio witũ. Tũtibatiĩ gũkorũo na nganja harĩ ũhoti kana wendi wake wa gũtũteithia. ‘Kũhoyaga tũtegũtigithĩria’ kuonanagia tũrĩ na wĩtĩkio wa ma.—1 Athesalonike 5:17.

ŨRĨA GŨKORŨO NA WĨTĨKIO KUUGĨTE

No hihi wĩtĩkio nĩ kĩĩ? Wĩtĩkio ũhutanĩtie na ‘kũmenya’ Ngai. (Johana 17:3) Njĩra ya mbere ya gwĩka ũguo nĩ gũthoma Bibilia nĩguo tũgĩe na mwĩcirĩrie ta wake. Tũreruta atĩ nĩ onaga o ũmwe witũ na nĩ endaga gũtũteithia. No rĩrĩ, wĩtĩkio wa ma nĩ makĩria ma kũmenya tu kaũndũ kana kegiĩ Ngai. Ningĩ wĩtĩkio nĩ kũgĩa na ũrata mũrũmu wa gĩtĩo hamwe nake. O ta ũrĩa kũgĩa ũrata gatagatĩ-inĩ ka andũ gũkoragwo, kũgĩa ũrata na Ngai ti ũndũ wa gwĩkwo na mũthenya ũmwe. Wĩtĩkio witũ ‘wongererekaga’ o ũrĩa tũrathiĩ na mbere kwĩruta makĩria ũhoro wĩgiĩ Ngai, o ũrĩa ‘tũreka o maũndũ marĩa mamũkenagia,’ na o ũrĩa tũrona agĩtũteithia. (2 Akorintho 10:15; Johana 8:29) Wĩtĩkio ta ũcio nĩguo ũteithagia Janet kũhiũrania na mĩtangĩko.

Janet oigaga: “Kĩrĩa kĩndeithĩtie gũkũria wĩtĩkio nĩ kuona ũrĩa Jehova andeithĩtie maũndũ-inĩ makwa mothe. Maita maingĩ nĩ twacemanagia na wagi wa kĩhooto wonekaga ũrĩ mũritũ kũhiũrania naguo. Nĩ ũndũ wa kũhoya mũno, Jehova hĩndĩ ciothe nĩ aahingũraga njĩra, itangĩahotire gũciĩciria ndĩ wika. Rĩrĩa ndamũcokeria ngatho, ndirikanaga maũndũ marĩa mothe anjĩkĩire. Hingo ciothe atũteithagia ihinda rĩrĩa rĩagĩrĩire, kaingĩ o rĩrĩa tũrabatara ũteithio. Na nĩ atũmĩte ngĩe na arata a ma, athuri na atumia Akristiano. Gũtirĩ hĩndĩ mandiganagĩria, na makoragwo marĩ cionereria njega harĩ ciana ciakwa.”a

“Nĩ njũĩ kĩrĩa gĩtũmaga Jehova oige ũũ thĩinĩ wa Malaki 2:16: ‘Ndigano ya mũndũ na mũtumia nĩndĩmĩthũũrĩte.’ Harĩ ũrĩa ũhĩtĩirio, kĩu nĩ gĩĩko gĩa gũtuurithia mũno. Mĩaka mĩingĩ nĩ ĩhĩtũkĩte kuuma rĩrĩa mũthuri wakwa aatũtigire, no rĩmwe na rĩmwe no njiguaga ihooru. Rĩrĩa ndaigua ũguo, ngeragia gwĩka ũndũ wa gũteithia mũndũ ũngĩ, na hingo ciothe ũndũ ũcio nĩ ũndeithagia o na niĩ.” Nĩ ũndũ wa kũhũthĩra ũtaaro wa Bibilia wa kwaga kwĩyeherania na andũ arĩa angĩ, Janet nĩ anyihanyihagia mĩtangĩko yake.b—Thimo 18:1.

Janet oigaga ũũ: “Ũndũ ũrĩa ũnyũmagĩrĩria makĩria nĩ kũmenya atĩ Ngai ‘nĩwe ithe wa ciana cia ngoriai, na harĩ atumia a ndigwa nĩ mũmatuĩri cira na kĩhooto.’ Ndagatũtiganĩria o rĩ o rĩ, ta ũrĩa mũthuri wakwa eekire.” (Thaburi 68:5) Janet nĩ oĩ atĩ Ngai ndatũgeragia na “maũũru.” Mũgarũ na ũguo, aheanaga ũũgĩ ‘na ũtana kũrĩ andũ othe’ na akaheana “ũhoti . . . ũrĩa mũnene” nĩguo ũtũteithie kũhiũrania na mĩtangĩko.—Jakubu 1:5, 13; 2 Akorintho 4:7.

Ĩ angĩkorũo tũratangĩka nĩ ũndũ ũtũũro witũ ũrĩ ũgwati-inĩ?