MACOKIO MA CIŨRIA CIA BIBILIA
Hihi ũtũũro no ũyũ tu?
Hihi rĩmwe na rĩmwe nĩ wonaga ta ũtũũro ũrĩ mũkuhĩ mũno?
Hihi nĩ ũrĩ weyũria kana ũtũũro no gũthaaka, kũruta wĩra, kũhika na kũhikania, kũrera ciana, na gũkũra? (Ayubu 14:1, 2) Bibilia nĩ yonanagia atĩ nginya andũ arĩa ogĩ mũno maaneyũria kĩũria kĩu.—Thoma Kohelethu 2:11.
Hihi ũtũũro nĩ ũrĩ muoroto? Nĩ wega twambe twĩyũrie ũũ: Ũtũũro wambĩrĩirie atĩa? Thutha wa kuona ũrĩa tombo na mwĩrĩ wa mũndũ ũmbĩtwo, andũ aingĩ nĩ makinyĩrĩire kuona atĩ no mũhaka akorũo twombirũo nĩ Mũũmbi ũrĩ na ũũgĩ. (Thoma Thaburi 139:14.) Angĩkorũo nĩguo, no mũhaka akorũo aatũmbire harĩ na gĩtũmi! Kwĩruta gĩtũmi kĩu no gũtũme tũkorũo na muoroto makĩria ũtũũro-inĩ witũ.
Andũ moombirũo nĩkĩ?
Ngai aarathimire mũthuri na mũtumia wa mbere na akĩmahe wĩra warĩ mwega mũno. Muoroto wake warĩ maiyũrie thĩ, mamĩtue paradiso, na matũũre tene na tene.—Thoma Kĩambĩrĩria 1:28, 31.
Muoroto wa Ngai nĩ waagire kũhinga ihinda rĩrĩa aatanyĩte tondũ andũ nĩ maaremeire watho wake. No Ngai ndaatiganĩirie andũ kana muoroto wake. Bibilia ĩtwĩraga na ma atĩ Ngai akoretwo akĩĩrutanĩria nĩguo ahonokie andũ arĩa ehokeku na atĩ muoroto wake harĩ thĩ nĩ ũkaahinga! Kwoguo Ngai endaga wone ũtũũro ta ũrĩa aatanyĩte. (Thoma Thaburi 37:29.) Wĩrute thĩinĩ wa Bibilia ũrĩa wee mwene ũngĩgunĩka kuumana na muoroto wa Ngai.