Muoroto wa Ũtũũro nĩ Ũrĩkũ?

Macokio ma Bibilia

Kĩũria kĩu no kĩũrio na njĩra nyingĩ, ta Tũkoragwo kuo nĩkĩ? kana Hihi ũtũũro wakwa nĩ ũrĩ muoroto? Bibilia yonanagia atĩ muoroto wa ũtũũro witũ nĩ gũthondeka ũrata hamwe na Ngai. Ta wĩcirie ũhoro wa ma ici cia mũthingi iria iguũrĩtio nĩ Bibilia.

• Ngai nĩwe Mũũmbi witũ. Bibilia yugaga ũũ: “[Ngai] nĩwe watũũmbire.”—Thaburi 100:3; Kũguũrĩrio 4:11.

• Ngai nĩ arĩ muoroto na indo ciothe iria ombire, nginya ithuĩ.​—Isaia 45:18.

• Ngai aatũũmbire tũrĩ na wendi wa ‘maũndũ ma ũthingu,’ na wendi ũcio nĩ hamwe na gwetha muoroto wa ũtũũro. (Mathayo 5:6) Nĩ endaga tũhingie wendi ũcio.—Thaburi 145:16.

• Tũhingagia wendi witũ wa maũndũ ma ũthingu kana ma kĩĩroho na njĩra ya gũthondeka ũrata na Ngai. O na gũtuĩka andũ amwe monaga ta gũtuĩka arata a Ngai arĩ ũndũ ũtangĩhoteka-rĩ, Bibilia ĩtwĩkagĩra ngoro ũũ: “Kuhĩhĩriai Ngai, nake nĩekũmũkuhĩhĩria inyuĩ.”—Jakubu 4:8; 2:23.

• Nĩguo tũtuĩke arata a Ngai, no mũhaka tũikare kũringana na muoroto wake harĩ ithuĩ. Bibilia ĩgwetaga muoroto ũcio thĩinĩ wa Kohelethu 12:13: “Wĩtigĩre Ngai, na ũmenyagĩrĩre maathani make; nĩ ũndũ gwĩka ũguo nĩ kũhingia maũndũ mothe marĩa mũndũ aagĩrĩirũo nĩ gwĩka.”

• Mahinda-inĩ mokĩte, nĩ tũgaakenere biũ muoroto wa Ngai harĩ ithuĩ rĩrĩa akeeheria mĩnyamaro na acoke ahe arata ake, arĩa mamũthathayagia, muoyo wa tene na tene.​—Thaburi 37:10, 11.