Tũrutaga Kũ Mbeca cia Ũtungata Witũ?

O mwaka, nĩ tũcabaga na tũkaheana Bibilia milioni nyingĩ na mabuku marĩ na ũhoro wa Bibilia. Nĩ twakaga na tũgatwarithia na mbere wabici cia honge na cia gũcabĩra mabuku kũndũ kũingĩ thĩinĩ wa thĩ. Ciũngano ngiri nyingĩ nĩ ikoragwo na nyũmba njega cia gũcemanĩria no itarĩ cia goro, ciĩtagwo Nyũmba cia Ũthamaki. Mbeca cia kũruta wĩra ũcio wothe ciumaga kũ?

Wĩra witũ wothe ũtwarithagio na mbere na mĩhothi ya kwĩyendera. (2 Akorintho 9:7) Mwaka-inĩ wa 1879, riuma rĩa kerĩ rĩa ngathĩti ĩno rĩoigĩte ũũ: “Twĩtĩkĩtie atĩ ngathĩti ĩno ya ‘Zion’s Watch Tower’ [nĩguo ngathĩti ĩno yetagwo hĩndĩ ĩyo] ĩranyitwo mbaru nĩ JEHOVA, nĩ ũndũ ũcio, gũtirĩ hĩndĩ ĩkaahoya kana ĩthaithe andũ mamĩteithie.” Ũguo noguo twĩtĩkĩtie nginya ũmũthĩ.

Andũ matũmaga mĩhothi yao ĩmwe kwa ĩmwe kũrĩ wabici o yothe ya rũhonge, kana magaikia ithandũkũ-inĩ rĩa mĩhothi rĩrĩa rĩkoragwo thĩinĩ wa Nyũmba ya Ũthamaki. Tũtiĩtagia gacunjĩ ga ikũmi, kana mĩhothi kuuma kũrĩ andũ, kana kũrĩhia ũtungata ũrĩa tũheanaga o na kana kwendia mabuku. Tũtirĩhagwo nĩ ũndũ wa kũhunjia, kũrutana thĩinĩ wa kĩũngano, kana gwaka nyũmba citũ cia ũthathaiya. Makĩria ma ũguo-rĩ, Jesu oigire ũũ: “Mũheetwo o ro tũhũ, heanagai o ro tũhũ.” (Mathayo 10:8) Arĩa othe matungataga thĩinĩ wa wabici citũ cia rũhonge na wabici ĩrĩa nene ya thĩ yothe, o hamwe na arĩa makoragwo thĩinĩ wa Kĩama Kĩrĩa Gĩtongoragia kĩa Aira a Jehova, gũtirĩ o na ũmwe ũrĩhagwo.

Mĩhothi itũ ningĩ nĩ ĩhũthagĩrũo hĩndĩ ĩrĩa kwagĩa na icanjama. Akristiano a mahinda ma tene nĩ maakenagĩra gũteithia arĩa macemania na maũndũ maritũ. (Aroma 15:26) Na njĩra o ta ĩyo, nĩ tũteithagĩrĩria arĩa macemania na icanjama, tũkamaakĩra rĩngĩ nyũmba ciao na cia ũthathaiya, na tũkamahe irio, nguo, na ũrigitani.