Bibilia Yugaga Atĩa?

Mũcukani nũ kana nĩ kĩĩ?

HIHI ŨNGIUGA Mũcukani nĩ . . .

• Kĩũmbe kĩa roho?

• Ũũru ũkoragwo thĩinĩ wa mũndũ?

• Kĩndũ gĩa gwĩcirĩrio?

ŨRĨA BIBILIA YUGAGA

Mũcukani nĩ aaririe na Jesu na ‘akĩmũgeria.’ (Mathayo 4:​1-4) Kwoguo Mũcukani ti kĩndũ gĩa gwĩcirĩrio o na kana ũũru ũkoragwo thĩinĩ wa mũndũ. Nĩ kĩũmbe kĩũru kĩa roho.

NĨ ATĨA ŨNGĨ TWĨRUTAGA KUUMA BIBILIA-INĨ?

• Kĩambĩrĩria-inĩ Mũcukani aarĩ mũraika mwega no “ndeehandire wega ũhoro-inĩ ũrĩa wa ma.” (Johana 8:44) Aatuĩkire mũheenania na akĩremera Ngai.

• Araika angĩ nĩ maanyitanĩire na ũremi wa Shaitani.​—Kũguũrĩrio 12:9.

• Mũcukani nĩ atumumarĩtie andũ aingĩ meciria nĩguo metĩkie ndakoragwo kuo.​—2 Akorintho 4:4.

Hihi Mũcukani no atongorie andũ?

ANDŨ AMWE MOIGAGA atĩ gũtingĩhoteka Mũcukani atongorie andũ, nao angĩ metigagĩra kũingĩrũo nĩ maroho moru. Wee wonaga atĩa?

ŨRĨA BIBILIA YUGAGA

“Thĩ yothe ĩtongoragio nĩ ũrĩa mũru.” (1 Johana 5:19) Mũcukani nĩ akoragwo na ũgucania mũnene mũno harĩ andũ, no ndatongoragia andũ othe.

NĨ ATĨA ŨNGĨ TWĨRUTAGA KUUMA BIBILIA-INĨ?

• Mũcukani ahũthagĩra maheeni nĩguo athiĩ na mbere kũhĩtithia andũ.​—2 Akorintho 11:14.

• Rĩmwe maroho moru no makorũo magĩtongoria andũ.​—Mathayo 12:22.

• Kũgerera ũteithio wa Ngai no ũhote ‘kũregana na Mũcukani.’​—Jakubu 4:7.