KUUMA NGOTHI-INĩ | CIONEKI CIĨGIĨ CIŨMBE IRIA IKORAGWO KŨRĨA IGŨRŨ
Nĩa Maikaraga Ciikaro cia Roho?
Hihi nĩ ũrĩ weciria ũhoro wa ciikaro cia roho kũrĩa igũrũ na wa arĩa maikaraga kuo? Angĩkorũo nĩguo, ndũrĩ wiki. Kwa ihinda rĩa mĩaka ngiri nyingĩ andũ manegereria ũhoro ũcio. Amwe metĩkĩtie atĩ kũu igũrũ gũtũũragwo nĩ maroho ma arĩa akuũ, na atĩ mabatiĩ kũheo gĩtĩo. Angĩ nao meciragia nĩ kũndũ kũhoreru gwĩtagwo matu-inĩ, na gũtũũragwo nĩ araika na andũ ega arĩa maanakua. No kũrĩ angĩ meciragia atĩ kũu igũrũ nĩ mũciĩ wa ngai nyingĩ.
Kwĩragwo atĩ, wanaruona anarũmenya. Kwoguo andũ angĩ magagĩtua atĩ tũtingĩmenya tondũ gũtirĩ mũndũ wanathiĩ igũrũ nĩguo atũtaarĩrie ũhoro wa kuo. No mwĩcirĩrie ta ũcio nĩ mũhĩtanu tondũ Jesu Kristo atanoka gũkũ thĩ aatũũraga igũrũ. We mwene eerire atongoria a ndini karine-inĩ ya mbere ũũ: “Ndiumĩte igũrũ gwĩka wendi wakwa niĩ mwene, ĩndĩ nĩ gwĩka wendi wa ũrĩa wandũmire.” Kwoguo Jesu eraga arutwo ake ũhoro wa igũrũ rĩrĩa oigire ũũ: “Thĩinĩ wa nyũmba ya Awa kũrĩ ciikaro nyingĩ.”—Johana 6:38; 14:2.
Bibilia yugaga atĩ Jehova Ngai, o we Ithe wa Jesu, aikaraga igũrũ. (Thaburi 83:18) Kwoguo Jehova na Jesu nĩo mangĩtaarĩria wega makĩria ũhoro wa igũrũ gũkĩra mũndũ ũngĩ o wothe. Kũgerera cioneki cia magegania iria monirie ndungata njĩhokeku, nĩ maaguũririe maũndũ maingĩ megiĩ igũrũ.
Icunjĩ iria irũmĩrĩire nĩ ikwarĩrĩria mĩhari ya Bibilia ĩrĩa ĩrataarĩria imwe cia cioneki icio. Ũgĩthoma ũhoro ũcio, ririkana atĩ ciikaro cia roho ti kũndũ tũngĩona na maitho kana tũhutie. Kwoguo, Ngai atũtaarĩirie ũhoro wa igũrũ kũgerera cioneki tũngĩtaũkĩrũo nĩcio, handũ ha gũtũtaarĩria na njĩra ya kĩĩroho tũtangĩtaũkĩrũo nĩyo. Gũthuthuria cioneki icio nĩ gũgũgũteithia ũtaũkĩrũo nĩa maikaraga ‘ciikaro-inĩ nyingĩ’ cia kũu igũrũ.