‘Arotũma Mĩbango Yaku Yothe Ĩgaacĩre’

1. Nĩ ũndũ ũrĩkũ mũndũ mwĩthĩ arĩ o mũhaka atue wĩgiĩ ihinda rĩũkĩte, no nĩkĩ ndagĩrĩirũo gũtangĩka nĩ ũndũ ũcio gũkĩria gĩthimi? (Rora mbica kĩambĩrĩria-inĩ gĩa gĩcunjĩ gĩkĩ.)

INYUĨ andũ ethĩ, no mwĩtĩkanie atĩ nĩ ũndũ wa ũũgĩ mũndũ kũbanga kũrĩa arenda gũthiĩ atanambĩrĩria thabarĩ. Ũtũũro nĩ ta thabarĩ, na ihinda rĩrĩa rĩega rĩa kũbanga kũrĩa ũrenda gũthiĩ nĩ rĩrĩa ũrĩ mwĩthĩ. Nĩ ma, kũbanga no gũkorũo gũtarĩ ũndũ mũhũthũ. Mwarĩ wa Ithe witũ ũmwe mwĩthĩ wĩtagwo Heather oigaga ũũ: “Mũndũ no etigĩre. Ũrabatara gũtua itua rĩa ũrĩa ũgwĩka na ũtũũro waku wothe.” No wĩhe hinya. Jehova eraga andũ ake ũũ: “Menya ũmake nĩ ũndũ niĩ nĩ niĩ Ngai waku; nĩngũkuongerera hinya waku, ĩĩ, ti-itherũ nĩndĩĩgũteithagia.”—Isa. 41:10.

2. Ũmenyaga atĩa atĩ Jehova nĩ endaga ũbange nĩguo ũkaagĩa na ũtũũro ũrĩ na gĩkeno?

² Jehova aragwĩkĩra ngoro ũbange na njĩra ya ũũgĩ ũhoro wa ũtũũro waku. (Koh. 12:1; Mat. 6:20) Nĩ endaga ũkorũo na gĩkeno. Ũthaka ũrĩa ũkoragwo kũndũ gũtiganĩte, mĩgambo mĩega, na mĩcamo mĩega ya indo iria ciũmbĩtwo nĩ cionanagia ũndũ ũcio. Ningĩ ta wĩcirie ũrĩa atũrũmbũyagia na agatũruta njĩra ĩrĩa njega biũ ya ũtũũro. Jehova erĩte arĩa maregaga ũtaaro wake ũũ: “[Mwethurĩire] maũndũ marĩa matangenagia. . . . Atĩrĩrĩ, ndungata ciakwa nĩ gũkena igakenaga, no inyuĩ nĩ gũconorũo mũgaconorũo; o na ningĩ atĩrĩ, ndungata ciakwa nĩ kũina ikainaga nyĩmbo icanjamũkĩte ngoro.” (Isa. 65:12-14) Jehova nĩ agoocithagio andũ ake mangĩtua matua ma ũũgĩ ũtũũro-inĩ.—Thim. 27:11.

MĨBANGO ĨRĨA ĨGŨTŨMA ŨGĨE NA GĨKENO

3. Nĩ mĩbango ĩrĩkũ Jehova angĩenda ũthingate?

³ Nĩ mĩbango ĩrĩkũ Jehova angĩenda ũthingate? Ombire andũ nĩguo magĩage na gĩkeno nĩ ũndũ wa kũmũmenya na kũmũtungatĩra marĩ na wĩhokeku. (Thab. 128:1; Mat. 5:3) Ũndũ ũcio ũtũmaga andũ makorũo marĩ ngũrani na ũũmbi wake wa nyamũ iria ciganagĩra na kũrĩa, kũnyua, na gũciarana. Ngai nĩ endaga ũgĩe na gĩkeno na njĩra ya kũbanga maũndũ makĩrĩte macio matũmaga nyamũ ciganĩre. Mũkũũmbi nĩ “Ngai mwene wendo,” “Ngai ũrĩa mũkeni,” ũrĩa wombire andũ na “mũhianĩre wake we mwene.” (2 Kor. 13:11; 1 Tim. 1:11; Kĩam. 1:27) Nĩ ũrĩkoragwo na gĩkeno wegerekanagia na Ngai witũ ũrĩ wendo. Hihi waneyonera ũũma wa ciugo cia rĩandĩko rĩrĩa riugaga atĩ “kũheana nĩ kũrĩ gĩkeno kĩnene gũkĩra kwamũkĩra”? (Atũm. 20:35) Icio nĩ ciugo cia ma mũtũũrĩre-inĩ wa andũ. Kwoguo Jehova endaga werekerie mĩbango yaku harĩ kuonania wendo harĩ andũ arĩa angĩ na harĩ Ngai.—Thoma Mathayo 22:36-39.

4, 5. Nĩ kĩĩ gĩakenagia Jesu?

⁴ Jesu Kristo nĩ aamũigĩire inyuĩ andũ ethĩ kĩonereria kĩega biũ. Hatarĩ nganja, rĩrĩa aarĩ mwana nĩ aathakaga na agakenera maũndũ. Kiugo kĩa Ngai kiugaga atĩ nĩ kũrĩ “hĩndĩ ya gũtheka . . . o na hĩndĩ ya kũina.” (Koh. 3:4) Ningĩ Jesu nĩ aakuhĩrĩirie Jehova kũgerera kwĩruta Maandĩko. Rĩrĩa aarĩ na mĩaka 12, arutani arĩa maarĩ hekarũ-inĩ nĩ maagegirio mũno nĩ “macokio make na ũhoti wake wa gũtaũkĩrũo nĩ maũndũ” ma kĩĩroho.—Luk. 2:42, 46, 47.

⁵ Jesu aakũrire agĩtuĩka mũndũ mũgima ũrĩ na gĩkeno. Nĩ kĩĩ kĩamũkenagia? Nĩ aamenyaga atĩ Ngai nĩ eendaga ‘aheane ũhoro mwega kũrĩ arĩa athĩni na ahunjĩrie arĩa atumumu atĩ nĩ mekuona.’ (Luk. 4:18) Gwĩka ũrĩa Ngai eendaga nĩ gwatũmaga Jesu akorũo na gĩkeno. Thaburi 40:8 nĩ yonanagia ũrĩa aaiguaga, tondũ yugaga ũũ: “Niĩ ngenagio no gwĩka ũrĩa wendaga.” Jesu nĩ aakenagĩra kũruta andũ ũhoro wĩgiĩ Ithe wake wa igũrũ. (Thoma Luka 10:21.) Hĩndĩ ĩmwe thutha wake kũruta mũtumia ũmwe ũhoro wĩgiĩ ũthathaiya wa ma, Jesu eerire arutwo ake ũũ: “Irio ciakwa nĩ gwĩka wendi wa ũrĩa wandũmire na kũrĩkia wĩra wake.” (Joh. 4:31-34) Kuonania wendo wake harĩ Ngai na harĩ andũ arĩa angĩ nĩ gwatũmaga Jesu akorũo na gĩkeno. O nawe ũngĩka ũguo no ũkorũo na gĩkeno.

6. Nĩkĩ nĩ ũndũ wa bata kwarĩrĩria mĩbango yaku ya ihinda rĩũkĩte na Akristiano marĩ na ũmenyeru?

⁶ Akristiano aingĩ nĩ meegĩrĩire na gĩkeno nĩ ũndũ wa gũtungata marĩ mapainia rĩrĩa maarĩ ethĩ. Na githĩ to warĩrĩrie na amwe ao maũndũ marĩa ũrabanga. “Kũndũ gũtarĩagwo kĩrĩra, mathondeko makuo nĩ gũthata mathataga, no kũrĩa kwĩ na aheani aingĩ a kĩrĩra nĩ kũrũma marũmaga.” (Thim. 15:22) Andũ ta acio a kĩĩroho no makwĩre atĩ ũtungata wa hĩndĩ-ciothe nĩ ũgũkũruta maũndũ megũkũguna ũtũũro waku wothe. Thutha wa Jesu kũrutwo nĩ Ithe marĩ kũrĩa igũrũ, no aathire na mbere kwĩruta rĩrĩa aarĩ ũtungata-inĩ wake gũkũ thĩ. Kwa ngerekano, nĩ eerutire gĩkeno kĩrĩa kiumanaga na gũkinyĩra andũ ngoro kũgerera ũhoro ũrĩa mwega na o na gĩkeno kĩrĩa kiumanaga na gũtũũria wĩkindĩru rungu rwa magerio. (Thoma Isaia 50:4; Ahib. 5:8; 12:2) Reke twarĩrĩrie mĩeke ĩmwe ya ũtungata wa hĩndĩ-ciothe ĩrĩa ĩngĩkũrehera gĩkeno kĩnene.

GŨTUA ANDŨ ARUTWO NO GŨTŨME ŨGAACĨRE

7. Nĩ kĩĩ gĩtũmaga andũ aingĩ ethĩ makenere wĩra wa gũtua andũ arutwo?

⁷ Jesu oigire ũũ: “Thiĩi mũgatue andũ . . . arutwo akwa . . . mũkĩmarutaga.” (Mat. 28:19, 20) Ũngĩkorũo nĩ ũrabanga kũrutaga wĩra wa gũtua andũ arutwo, ũgũkorũo ũgĩthuura wĩra ũrĩa mwega biũ, wĩra ũragoocithia Ngai. O ta wĩra ũngĩ o wothe, nĩ ũkũbatara ihinda nĩguo ũgĩe na ũmenyeru. Ica ikuhĩ, mũrũ wa Ithe witũ wĩtagwo Timothy ũrĩa wambĩrĩirie gũtungata arĩ painia rĩrĩa aarĩ mwĩthĩ, oigire ũũ: “Nĩ nyendete gũtungatĩra Jehova ũtungata-inĩ wa hĩndĩ-ciothe tondũ nĩyo njĩra ĩrĩa nyonanagia nayo atĩ nĩ ndĩmwendete. Kĩambĩrĩria-inĩ ndiahotaga kwambĩrĩria wĩruti wa Bibilia na mũndũ o na ũmwe, no thutha-inĩ ngĩthamĩra gĩcigo kĩngĩ na kahinda-inĩ ka mweri ũmwe ngĩambĩrĩria kwĩruta Bibilia na andũ maigana ũna. Mũrutwo ũmwe wa Bibilia nĩ aambĩrĩirie gũka Nyũmba-inĩ ya Ũthamaki. Thutha wa gũthiĩ Cukuru ya Bibilia ya Ariũ a Ithe Witũ Arĩa Matahikanĩtiea kwa ihinda rĩa mĩeri ĩĩrĩ, nĩ ndatũmirũo gĩcigo-inĩ kĩngĩ na nĩ hotete kwambĩrĩria wĩruti wa Bibilia na andũ ana. Nĩ nyendete kũruta andũ tondũ nĩ nyonaga roho mũtheru ũkĩmagarũra.”—1 Thes. 2:19.

8. Akristiano amwe ethĩ mahotete atĩa kũnyita mbaru makĩria wĩra wa gũtua andũ arutwo?

⁸ Akristiano amwe ethĩ nĩ merutĩte rũthiomi rũngĩ. Kwa ngerekano, Jacob kuuma North America, oigĩte ũũ: “Rĩrĩa ndarĩ na mĩaka mũgwanja, ciana nyingĩ cia kĩrathi gitũ ciaragia rũthiomi rwa Kĩvietnam. Nĩ ndendaga kũmeera ũhoro wĩgiĩ Jehova na kwoguo thutha wa ihinda ngĩka mĩbango ya kwĩruta rũthiomi rũu. Kwa ihinda, nderutaga na njĩra ya kũringithania ngathĩti ya Mũrangĩri ya Gĩthũngũ na ya rũthiomi rwa Kĩvietnam. Ningĩ nĩ ndethire arata kuuma kĩũngano-inĩ kĩarĩ hakuhĩ kĩa rũthiomi rwa Kĩvietnam. Rĩrĩa ndakinyirie mĩaka 18, ngĩambĩrĩria kũpainia. Thutha ũcio ngĩthiĩ Cukuru ya Bibilia ya Ariũ a Ithe Witũ Arĩa Matahikanĩtie. Ũndũ ũcio nĩ ũndeithĩtie ũtungata-inĩ wakwa wa ũpainia gĩcigo-inĩ kĩrĩa ndatũmirũo, kũrĩa ndungataga ndĩ mũthuri wa kĩũngano gĩkundi-inĩ kĩa rũthiomi rwa Kĩvietnam, kĩrĩa gĩtakoragwo na athuri angĩ a kĩũngano. Andũ aingĩ arĩa maragia rũthiomi rwa Kĩvietnam nĩ magegaga nĩ kuona atĩ nĩ ndĩrutĩte rũthiomi rwao. Nĩ manyitaga ũgeni na kaingĩ nĩ ndĩrutaga Bibilia nao. Amwe nĩ mathiĩte na mbere nginya magakinyĩra kũbatithio.”—Ringithania Atũmwo 2:7, 8.

9. Nĩ na njĩra ĩrĩkũ wĩra wa gũtua andũ arutwo ũtũrutaga maũndũ ma gũtũguna?

⁹ Wĩra wa gũtua andũ arutwo nĩ ũkũrutaga mĩtugo mĩega ya kũruta wĩra, kwagagĩria ũhoti waku wa kwaranĩria, kũgĩa na ũmĩrĩru, na kuonania ũũgĩ rĩrĩa ũrahiũrania na andũ arĩa angĩ. (Thim. 21:5; 2 Tim. 2:24) No wĩra wa gũtua andũ arutwo ũrehaga gĩkeno makĩria tondũ nĩ ũgũteithagia kũmenya wega mũthingi wa Kĩĩmaandĩko wa wĩtĩkio waku. Ningĩ nĩ wĩrutaga ũrĩa ũngĩrutithania wĩra na Jehova.—1 Kor. 3:9.

10. Ũngĩhota atĩa kũnyitanĩra harĩ gĩkeno kĩrĩa kiumanaga na wĩra wa gũtua andũ arutwo o na ũngĩkorũo gĩcigo-inĩ andũ mataretĩkĩra wega ũhoro wa ma?

¹⁰ No ũkenere gũtua andũ arutwo o na angĩkorũo no andũ anini tu gĩcigo-inĩ kĩanyu maretĩkĩra ũhoro ũrĩa mwega. Wĩra wa gũtua andũ arutwo ti wa mũndũ ũmwe. Kĩũngano gĩothe nĩ kĩnyitanagĩra harĩ gwetha andũ arĩa marĩ na ngoro njega. O na gũtuĩka no mũrũ kana mwarĩ wa Ithe witũ ũmwe wonaga mũndũ ũrĩa ũcokaga gũtuĩka mũrũmĩrĩri wa Kristo, othe kĩũngano-inĩ nĩ manyitanagĩra harĩ gwetha na othe no makenere rĩrĩa ũmwe oneka. Kwa ngerekano, mũrũ wa Ithe witũ Brandon aatungatire arĩ painia kwa ihinda rĩa mĩaka kenda gĩcigo-inĩ andũ matetĩkagĩra ũhoro wa ma. Oigaga ũũ: “Nĩ nyendete kũhunjia ũhoro ũrĩa mwega tondũ ũcio nĩguo wĩra ũrĩa Jehova atwĩrĩte tũrute. Ndambĩrĩirie ũpainia ndarĩkia cukuru. Nĩ ngenagĩra gwĩkĩra ngoro ariũ a Ithe witũ arĩa ethĩ kĩũngano-inĩ na ngakenera kuona magĩthiĩ na mbere kĩĩroho. Thutha wa gũthiĩ Cukuru ya Bibilia ya Ariũ a Ithe Witũ Arĩa Matahikanĩtie nĩ ndatũmirũo gĩcigo-inĩ kĩngĩ ndĩ painia. Nĩ ma ndirĩ ndagĩa na mũrutwo ũgũkinyĩra kũbatithio, no arĩa angĩ managĩa. Nĩ ngenaga tondũ nĩ ndabangire kũnyitanĩra biũ wĩra-inĩ wa gũtua andũ arutwo.”—Koh. 11:6.

KŨRĨA MĨBANGO YAKU ĨNGĨGŨKINYIA

11. Nĩ mũthemba ũrĩkũ wa ũtungata mũtheru andũ aingĩ ethĩ makeneire?

¹¹ Nĩ kũrĩ mĩeke mĩingĩ ya gũtungatĩra Jehova. Kwa ngerekano, andũ aingĩ ethĩ nĩ merutagĩra wĩra-inĩ wa mĩako. Nĩ kũbataranagia Nyũmba cia Ũthamaki nyingĩ. Wĩra wa gũciaka nĩ ũtungata mũtheru ũrĩa ũgoocithagia Ngai na no ũkũrehere gĩkeno. O ta ũrĩa kũrĩ harĩ mĩthemba ĩrĩa ĩngĩ ya ũtungata mũtheru, nĩ tũkenagĩra kũrutithania wĩra na Akristiano arĩa angĩ. Wĩra wa mĩako ningĩ nĩ ũkũrutaga maũndũ maingĩ ta kũmenyerera muoyo waku na wa arĩa angĩ rĩrĩa ũrĩ wĩra-inĩ, kũruta wĩra na kĩyo, na kũnyitanĩra na arĩa maratongoria.

12. Ũtungata wa ũpainia ũngĩtũhingũrĩra mĩeke ĩngĩ na njĩra ĩrĩkũ?

¹² Mũrũ wa Ithe witũ ũmwe wĩtagwo Kevin oigaga ũũ: “Kuuma ndĩ kamwana kanini, ndakoretwo ngĩrirĩria atĩ mũthenya ũmwe nĩ ngatungatĩra Jehova ũtungata-inĩ wa hĩndĩ ciothe. Rĩrĩa ndakinyirie mĩaka 19, ngĩambĩrĩria ũpainia. Nĩguo hote kwĩrũgamĩrĩra, ndandĩkĩtwo wĩra nĩ mũrũ wa Ithe witũ warutaga mawĩra ma mĩako tũrutage nake thikũ imwe. Ngĩĩruta kũgita nyũmba, na gwĩkĩra ndirica na mĩrango. Thutha-inĩ, nĩ ndarutithanirie wĩra kwa ihinda rĩa mĩaka ĩĩrĩ na ariũ a Ithe witũ tũgĩteithia arĩa maagũmĩirũo nĩ ihuhũkanio wĩra-inĩ wa gwaka rĩngĩ Nyũmba cia Ũthamaki na nyũmba cia aarĩ na ariũ a Ithe witũ. Rĩrĩa ndaiguire atĩ bũrũri-inĩ wa Afrika ya Mũhuro nĩ kwarĩ na wĩra mũingĩ wa mĩako, nĩ ndaiyũririe fomu ya kwĩrutĩra kũu na ngĩtwo. Rĩu ndĩ gũkũ Afrika, twakaga Nyũmba ĩmwe ya Ũthamaki ihinda rĩa ciumia cigana ũna na twarĩkia tũgathiĩ gwaka ĩngĩ handũ hangĩ. Gĩkundi kĩrĩa twakaga nakĩo nĩ ta famĩlĩ. Tũikaraga hamwe, tũkeruta Bibilia hamwe, na tũkaruta wĩra hamwe. Ningĩ nĩ ngenagĩra kũhunjia hamwe na aarĩ na ariũ a Ithe witũ a kũrĩa tũrĩ o kiumia. Mĩbango ĩrĩa ndabangire ndĩ kamwana kanini nĩ ĩndeheire gĩkeno na njĩra o na itangĩeciririe.”

13. Nĩ na njĩra irĩkũ ũtungata wa Betheli ũrehagĩra andũ ethĩ gĩkeno?

¹³ Andũ amwe arĩa moire makinya ma gũkinyanĩria mĩbango yao ya gũtungatĩra Jehova ũtungata-inĩ wa hĩndĩ ciothe rĩu matungataga Betheli. Ũtungata wa Betheli nĩ ũtũũro ũrĩ gĩkeno tondũ ũtungata wothe ũrutagwo kũu ũrutagĩrũo Jehova. Famĩlĩ ya Betheli nĩ ĩteithagĩrĩria harĩ kũhaarĩria irio cia kĩĩroho. Mũrũ wa Ithe witũ ũmwe wĩtagwo Dustin ũtungataga Betheli oigaga ũũ: “Ndeigĩire muoroto wa kũingĩra ũtungata-inĩ wa hĩndĩ-ciothe ndĩ na mĩaka kenda na ngĩambĩrĩria ũpainia ndarĩkia cukuru. Thutha wa mwaka ũmwe na nuthu nĩ ndetirũo Betheli, na ndĩ kũu nĩ nderutire kũhũthĩra macini cia gũcaba na thutha-inĩ ngĩĩruta gũthondeka programu cia kompiuta. Ndĩ Betheli nĩ ngenaga kũigua ĩmwe kwa ĩmwe ũhoro wĩgiĩ ũrĩa wĩra wa gũtua andũ arutwo ũrathiĩ na mbere thĩinĩ wa thĩ yothe. Nĩ nyendete gũtungata gũkũ tondũ maũndũ marĩa twĩkaga nĩ mateithagia andũ gũkuhĩrĩria Jehova.”

NĨ MĨBANGO ĨRĨKŨ ŨGWĨKA NĨ ŨNDŨ WA ŨTŨŨRO WAKU WA IHINDA RĨŨKĨTE?

14. Ũngĩhota atĩa kwĩbanga nĩguo ũingĩre ũtungata-inĩ wa hĩndĩ ciothe?

¹⁴ Ũngĩhota atĩa kwĩbanga nĩguo ũingĩre ũtungata-inĩ wa hĩndĩ ciothe? Gũkĩra ũndũ ũngĩ o wothe, ngumo cia kĩĩroho nĩ igũgũteithia ũgaacĩre ũgĩtungatĩra Jehova biũ. Kwoguo, wĩrute Kiugo kĩa Ngai ũrĩ na kĩyo, ũgĩcũranie ũrikĩire, na wethe njĩra cia kuonania wĩtĩkio waku ũrĩ mĩcemanio-inĩ ya kĩũngano. Mĩaka-inĩ ĩrĩa ũrĩ cukuru, no ũgĩe na ũmenyeru na ũkũrie ũhoti waku wa kũrutana ũrĩ mũhunjia wa ũhoro ũrĩa mwega. Wĩrute gũkenagio nĩ andũ na njĩra ya kũhũthĩra ũũgĩ ũkĩmoria mawoni mao na gũthikĩrĩria macokio mao. Ningĩ no wĩrutĩre gwĩkaga maũndũ kĩũngano-inĩ hihi ta gũteithĩrĩria wĩra-inĩ wa ũtheru na kũmenyerera Nyũmba ya Ũthamaki. Jehova nĩ akenaga kũhũthĩra arĩa enyihia na marĩ ngoro ya kwĩrutĩra meyendeire. (Thoma Thaburi 110:3; Atũm. 6:1-3) Mũtũmwo Paulo nĩ eetire Timotheo marutithanie wĩra hamwe ũtungata-inĩ wa ũmishonarĩ tondũ “ngumo ciake njega nĩ ciaaragio ũhoro wacio nĩ ariũ a Ithe witũ.”—Atũm. 16:1-5.

15. Ũngĩĩharĩria atĩa ũrĩa ũrĩhotaga kwĩrũgamĩrĩra?

¹⁵ Ndungata cia mahinda mothe nĩ ibataraga gwetha mabataro ma cio. (Atũm. 18:2, 3) Gũthoma kothi nini kwahota gũgũteithia wone wĩra ũtarĩ wa hĩndĩ ciothe ũrĩa ũngĩoneka gĩcigo-inĩ kĩanyu. Ũgĩka mĩbango ta ĩyo, no waranĩrie na mũrori wanyu wa mũthiũrũrũko o hamwe na mapainia arĩa angĩ mũthiũrũrũko-inĩ wanyu. Morie nĩ wĩra ta ũrĩkũ ũngĩagĩrĩra mapainia. Na o ta ũrĩa Bibilia yugaga, “rekagĩrĩria Jehova maũndũ marĩa ũbataragio nĩ gwĩka, na mathugunda maku nĩmarĩhotekaga.”—Thim. 16:3; 20:18.

16. Nĩ na njĩra ĩrĩkũ gũtungatĩra Jehova biũ ũrĩ mwĩthĩ kũngĩkũhaarĩria nĩ ũndũ wa mawĩra mangĩ ma ihinda rĩũkĩte?

¹⁶ No ũkorũo na ma atĩ Jehova nĩ arenda ‘ũkegĩra’ na gĩkeno ihinda rĩũkĩte. (Thoma 1 Timotheo 6:18, 19.) Ũtungata wa hĩndĩ-ciothe nĩ ũtũmaga ũcemanie na ndungata ingĩ cia mahinda mothe na ũgagũteithia ũkũre kĩĩroho. Aingĩ nĩ monete atĩ gũtungatĩra Jehova biũ marĩ ethĩ ningĩ nĩ kũmateithĩtie magĩe na kĩhiko kĩgaacĩru. Kaingĩ, arĩa maatungataga marĩ mapainia mbere ya kũingĩra kĩhiko-inĩ nĩ mahotete gũthiĩ na mbere gũtungata marĩ hamwe ũtungata-inĩ ũcio o na thutha wa kũhikania.—Rom. 16:3, 4.

17, 18. Kwĩbanga kũhutĩtie ngoro yaku atĩa?

¹⁷ Kwĩbanga nĩ kũhutĩtie ngoro yaku. Thaburi 20:4 yugaga ũũ ũhoro-inĩ wĩgiĩ Jehova: “Arokũhe maũndũ marĩa ngoro yaku ĩĩrirĩirie, na atũme mĩbango yaku yothe ĩgaacĩre.” (Holy Bible in Gĩkũyũ) Kwoguo wĩcũranie ũrĩa ũngĩenda kũhũthĩra ũtũũro waku. Wĩcũranie maũndũ marĩa Jehova arahingia mahinda-inĩ maya na ũrĩa ũngĩnyita itemi ũtungata-inĩ wake. Ũcoke ũbange gwĩka maũndũ marĩa mamũkenagia.

¹⁸ Ũngĩtungatĩra Jehova biũ nĩ ũkũgĩa na gĩkeno kĩnene tondũ nĩyo njĩra ya ũtũũro ĩrĩa ĩtĩithagia Ngai. “Nĩrĩo ũngĩtũũra wĩkenagĩra nĩ ũndũ wa Jehova, nake nĩarĩkũheaga maũndũ marĩa ngoro yaku ĩhoyaga.”—Thab. 37:4.