“Kaĩ Ngai Aarĩ Kũ?”
“HINGO CIOTHE NDĨYŨRAGIA: KAĨ NGAI AARĨ KŨ?”— Ciugo icio cioigirũo nĩ Pope Benedict XVI aceerete kũndũ kwarĩ kambĩ ya kũherithĩrio Auschwitz, Poland.
HIHI RĨRĨA WACEMANIA NA ŨNDŨ MŨRITŨ NĨ WĨYŨRAGIA, ‘KAĨ NGAI AARĨ KŨ?’ KANA HIHI ŨTŨŨRO-INĨ WAKU-RĨ, HARĨ ŨNDŨ MŨŨRU ŨRĨ WEKĨKA ŨKĨĨYŨRIA KANA NGAI NĨ AKŨRŨMBŨYAGIA?
No gũkorũo ũiguaga o ta ũrĩa Sheila ũrĩa ũikaraga Amerika (US) aaiguaga. Tondũ aarereirũo famĩlĩ-inĩ yekĩrĩire mũno maũndũ ma ndini ooigire: “Kuuma ndĩ o mũnyinyi, nĩ ndeendete Ngai tondũ nĩwe Mũũmbi witũ. Ĩndĩ ndiaiguaga ndĩmũkuhĩrĩirie. Nĩ ndeeciragia nĩ andoraga, no akoragwo kũraihu mũno na niĩ. Nĩ ndamenyaga atĩ Ngai ndathũire, ĩndĩ ndietĩkĩtie atĩ nĩ aanũmbũyagia.” Nĩ kĩĩ gĩatũmĩte Sheila agĩe na nganja? Aatarĩirie akiuga: “Famĩlĩ itũ yakorirũo nĩ maũndũ moru marũmanĩrĩire, na ndionaga ta Ngai aatũteithagia o na hanini.”
O ta Sheila, no kũhoteke o nawe ndũkoragwo na nganja atĩ Ngai Mwene-Hinya-Wothe arĩ kuo. Ĩndĩ no gũkorũo nĩ wĩyũragia kana hihi nĩ akũrũmbũyagia. O na Ayubu, mũthuri warĩ mũthingu na warĩ na wĩtĩkio harĩ ũhoti na ũũgĩ wa Mũũmbi, aarĩ na nganja o ta icio. (Ayubu 2:3; 9:4) Thutha wa Ayubu kũgũmĩrũo nĩ mathĩna marũmanĩrĩire, atarĩ na mwĩhoko ooririe Ngai ũũ: “Wĩhithĩte ũthiũ nĩ ũndũ kĩ, ũgakĩndua thũ yaku?”—Ayubu 13:24.
Bibilia yugaga atĩa? Hihi Ngai nĩwe twagĩrĩire gũcokereria mahĩtia rĩrĩa kuoimĩra mathĩna? Hihi nĩ kũrĩ ũira o wothe wonanagia atĩ Ngai nĩ arũmbũyagia andũ marĩ othe na o ũmwe witũ? Tũrĩ mũndũ ũmwe ũmwe-rĩ, hihi no tũmenye kana Ngai nĩ atuonaga, nĩ ataũkagĩrũo nĩ ithuĩ, nĩ atũiguagĩra tha, kana gũtũteithia rĩrĩa tũrĩ na mathĩna?
Icunjĩ-inĩ iria irũmĩrĩire, nĩ tũkwarĩrĩria maũndũ marĩa twĩrutaga kuuma kũrĩ ũũmbi ũhoro-inĩ wĩgiĩ ũrĩa Ngai atũrũmbũyagia. (Aroma 1:20) Tũcoke tũthuthurie ũrĩa Bibilia yugĩte igũrũ rĩgiĩ ũrĩa Ngai atũrũmbũyagia. O ũrĩa ũgũthiĩ ‘ũmũmenyete’ kũgerera ũũmbi na Kiugo gĩake, noguo ũrĩkoragwo na ũũma atĩ ‘nĩ akũrũmbũyagia.’—1 Johana 2:3; 1 Petero 5:7.