Ũrĩa Ũngĩĩruta Bibilia na Njĩra Ũkũgunĩka na Ũkenere

Joshua agĩthoma Watho; thingo cia Jeriko ikĩmomoka no nyũmba ya Rahabu ĩkaga kũmomoka; Joshua akĩhoya oete moko na igũrũ

JOSHUA aarĩ na wĩra mũritũ mbere yake. Aarĩ atongorie rũrĩrĩ rwa Isiraeli nginya Bũrũri wa Kĩĩranĩro na nĩ mangĩacemanirie na moritũ manene. No Jehova nĩ aamwĩrire atĩ nĩ egũtooria na akĩmũmĩrĩria kũgerera ciugo ici: ‘Gĩa na hinya, na ũũmĩrĩrie. Menyagĩrĩra Watho wakwa. Ũũthomage mũthenya o na ũtukũ, nĩ getha ũmenyagĩrĩre gwĩka o ta ũrĩa ũhoro wothe ũtariĩ ũrĩa wandĩkĩtwo thĩinĩ waguo. Weka ũguo, nĩ ũkũgaacĩra, na nĩ ũkũgĩa na ũũgĩ maũndũ-inĩ.’—Josh. 1:7, 8.

‘Mahinda-inĩ maya ma ũgwati maritũ kũhiũrania namo,’ o na ithuĩ nĩ tũcemanagia na maũndũ maritũ. (2 Tim. 3:1) O na ithuĩ no tũtoorie ta Joshua tũngĩrũmĩrĩra ũtaaro ũrĩa aaheirũo nĩ Jehova. Twagĩrĩirũo gũthomaga Bibilia na hĩndĩ ĩrĩa twacemania na moritũ tũkahũthagĩra motaaro mayo.

O na kũrĩ ũguo, aingĩ aitũ no twĩtĩkĩre atĩ tũtiĩrutaga Bibilia na njĩra njega na atĩ tuonaga gũthoma kũrĩ kũritũ. No tondũ kwĩruta Bibilia nĩ kwa bata mũno, rora gathandũkũ karĩ na kĩongo “Geria Maũndũ Maya” wone maũndũ mega ũngĩka nĩguo ũkahota kwĩruta na njĩra ũkũgunĩka na ũgakenera.

Mwandĩki wa Thaburi oigire ũũ: ‘Tũma ‘thiage na njĩra o ĩo ya maathani maku, amu nĩ gũkena ndĩĩkenagĩra nĩ ũndũ wamo.’ (Thab. 119:35) No ũgĩe na gĩkeno kĩnene nĩ ũndũ wa kwĩruta Kiugo kĩa Ngai. O ũrĩa ũgũthiĩ na mbere kwĩruta noguo ũkuona maũndũ maingĩ ma bata.

O na gũtuĩka wee ndũgũtongoria rũrĩrĩ ta Joshua, nĩ harĩ moritũ marĩa ũracemania namo. Kwoguo wĩrutage Kiugo kĩa Ngai ta Joshua, na ũrũmagĩrĩre maũndũ marĩa mandĩkĩtwo nĩguo ũgunĩke. Weka ũguo, o nawe nĩ ũkũgaacĩra na ũgĩe na ũũgĩ maũndũ-inĩ.

GERIA MAŨNDŨ MAYA

Ambĩrĩria na mahoya. Bibilia ĩkoragwo na ũhoro umĩte kũrĩ Ngai ũrĩa aandĩkithirie nĩguo ũkũgune. Kwoguo rĩrĩa ũramĩthoma, mũhoe agũteithie nĩguo ũtaũkĩrũo nĩyo, ũririkane maũndũ marĩa wathoma, na ũmahũthĩre mũtũũrĩre-inĩ waku.—Ezar. 7:10.
Wĩyũragie ciũria rĩrĩa ũrathoma Bibilia kana mabuku maitũ: ‘Ũhoro ũyũ ũranduta ũndũ ũrĩkũ wĩgiĩ Jehova? Ũrahutania atĩa na ndũmĩrĩri ya Bibilia? Ingĩũhũthĩra atĩa gũteithia andũ arĩa angĩ?’
Wĩcũranagie maũndũ marĩa wathoma. Tithia hĩndĩ ĩrĩa ũrathoma nĩguo wĩcirie: ‘Ũhoro ũyũ ũratũma njigue atĩa? Ũratũma njigue ũguo nĩkĩ? Ũrahutania atĩa na maũndũ marĩa ndanacemania namo, marĩa ndĩrahiũrania namo rĩu, na marĩa mangĩhaanĩka ihinda rĩũkĩte? Ingĩhũthĩra motaaro marĩa ndathoma thĩinĩ wa Bibilia atĩa?’ (Ayub. 23:5; Thab. 49:3) Ũgĩĩcũrania, rora kana no ũhote gũtaarĩria kĩrĩa kĩratũma Jehova ere andũ ake metheme maũndũ mamwe. Ningĩ wĩcirie moimĩrĩro mangĩarĩ marĩkũ korũo mũndũ ũrĩa ũrathoma ũhoro wake eekire maũndũ na njĩra ngũrani.—Gũcok. 32:28, 29.
Hũũra mbica meciria-inĩ rĩrĩa ũrathoma. Kwa ngerekano, no ũhũũre mbica ariũ a ithe na Jusufu makĩmwendia kũrĩ Aishumaeli. (Kĩam. 37:18-28) Ũraigua kĩĩ? Ũrona kĩĩ? Ũraigua mũnungo ũhaana atĩa? Wĩĩkĩre iratũ-inĩ cia andũ acio. Mareciria atĩa na maraigua atĩa? Kũhũũra mbica na njĩra ta ĩyo nĩ gũgũtũma ũtaũkĩrũo wega nĩ maũndũ marĩa ũreruta na ũgunĩke.
Hũthĩra indo cia gũgũteithia kwĩruta iria tũrĩ nacio cia gwĩka ũthuthuria. Wĩrute kũhũthĩra indo iria icabĩtwo kana iria ciĩkĩrĩtwo intaneti-inĩ cia rũthiomi rwaku. Ndũgetigĩre kwĩra andũ arĩa angĩ magũteithie kũmenya ũrĩa ũngĩcihũthĩra. Kwa ngerekano, Fahirisi na Ũteithio wa Ũthuthuria Harĩ Aira a Jehova no igũteithie kuona ũhoro wĩgiĩ maũndũ matiganĩte na kuona ũrĩa mĩhari mĩingĩ ya Bibilia ĩtaarĩirio. Hũthĩra ũhoro muongerere thĩinĩ wa New World Translation of the Holy Scriptures angĩkorũo ĩrĩ kuo na rũthiomi ũĩ. Ũhoro ũcio ũkoragwo na maũndũ ma bata megiĩ ũrĩa kũndũ kwahaanaga, historĩ, ithimi, na maũndũ mangĩ ta macio.
Cokera maũndũ manene nĩgetha ũririkane maũndũ marĩa weruta. Ĩra arĩa angĩ maũndũ marĩa weruta. Hihi nĩ harĩ ũndũ weruta ũngĩhũthĩra ũtungata-inĩ? Gwĩka maũndũ macio nĩ gũgũgũteithia kũririkana maũndũ manene na gũgũteithie kũhũthĩra maũndũ marĩa weruta gũteithia andũ arĩa angĩ.