NĨ Kĩheo Kĩrĩkũ Tũngĩhe Jehova?

HĨNDĨ ĩmwe Jesu ooigire ũũ: “Kũheana nĩ kũrĩ gĩkeno kĩnene gũkĩra kwamũkĩra.” (Atũm. 20:35) Ũndũ ũcio nĩ ũhutanĩtie na ũrata witũ na Jehova. Nĩkĩ? Jehova nĩ atũheete iheo nyingĩ mũno iria itũmaga tũkene, ĩndĩ no tũgĩe na gĩkeno kĩnene makĩria tũngĩhe Jehova kĩheo. Nĩ kĩheo kĩrĩkũ tũngĩhe Jehova? Thimo 3:9 yugaga ũũ: “Tĩithagia Jehova na indo iria ũrĩ nacio.” ‘Indo iria tũrĩ nacio’ nĩ mahinda maitũ, ũhoti witũ, hinya witũ, na indo citũ cia kĩĩmwĩrĩ. Rĩrĩa twahũthĩra indo ta icio gũtwarithia ũthathaiya wa ma na mbere, tũkoragwo tũkĩhe Jehova kĩheo, na ũndũ ũcio nĩ ũtũmaga tũgĩe na gĩkeno kĩnene.

Ũhoro-inĩ wĩgiĩ indo citũ cia kĩĩmwĩrĩ-rĩ, nĩ kĩĩ kĩngĩtũteithia kwaga kũhũthia kũhe Jehova kĩheo? Mũtũmwo Paulo eerire Akorintho ‘maigage kĩndũ’ nĩguo makona gĩa kũhotha. (1 Kor. 16:2) Ũngĩka atĩa angĩkorũo nĩ ũrenda kũmenya njĩra cia kũruta mĩhothi iria ũngĩhũthĩra kũrĩa ũikaraga? Rora gathandũkũ gaka karĩ haha kĩanda.

Mabũrũri-inĩ mamwe mũndũ ndangĩhota kũruta mĩhothi kũgerera Intaneti. Ĩndĩ, ũhoro wĩgiĩ njĩra ingĩ cia kũruta mĩhothi no woneke thĩinĩ wa website ya jw.org. Mabũrũri-inĩ mamwe, nĩ harĩ gacunjĩ thĩinĩ wa website ĩyo gacoketie ciũria nyingĩ ciũragio kaingĩ ũhoro-inĩ wĩgiĩ mĩhothi.