Rĩrĩa Ũrahiũrania na Mũrimũ Mũnene

“Rĩrĩa ndamenyire atĩ ndĩna kansa ya mahũri na nda, ndeciragia no gũkua ngũkua. No hĩndĩ ĩrĩa ndainũkire mũciĩ nyumĩte kwĩ ndagĩtarĩ, ngĩĩra, ‘Nĩ ma ũguo tiguo ngwĩrĩgagĩrĩra, ĩndĩ no mũhaka njarie njĩra ya kũhiũrania na ũndũ ũyũ.’”—Linda, ũrĩa ũrĩ na mĩaka 71.

“Ngoragwo na mũrimũ ũrĩ ruo mũno ũrĩa ũhutĩtie mĩkiha ya mwena wa ũrĩo wa ũthiũ. Rĩmwe na rĩmwe ruo rũnene rũrĩa ngoragwo naruo nĩ rũtũmaga thuthĩke ngoro. Maita maingĩ njiguaga ndĩna ihooru na ngeciria ũrĩa ingĩyũraga.”—Elise, ũrĩa ũrĩ na mĩaka 49.

Mũndũ mũrwaru aikarĩire wheelchair arĩ hamwe na andũ mamwendete

ANGĨKORŨO wee ũrĩ na mũrimũ mũnene kana mũndũ wendete arĩ naguo, nĩ ũĩ ũrĩa ũndũ ũcio ũrehaga mĩtangĩko. O ũkĩhiũranagia na mũrimũ ũcio, nĩ ũbataraga kũhiũrania na moritũ mangĩ ta kũrakara na ihenya kana gũtangĩka. Guoya na mĩtangĩko no ciongerereke rĩrĩa mũndũ arathiĩ kuona ndagĩtarĩ, araritũhĩrũo kuona kana kũrĩhĩra ũrigitani, kana nĩ ũndũ wa maũndũ moru marĩa marehagwo nĩ kũhũthĩra ndawa. Mĩtangĩko ya meciria ĩrĩa yumanaga na mũrimũ mũnene no ĩritũhĩre mũndũ mũno.

Tũngĩruta kũ ũteithio? Andũ aingĩ nĩ meyoneire atĩ ũteithio wao mũnene umanaga na kwĩhoka Ngai na njĩra ya mahoya na gũthoma maandĩko ma kũũmĩrĩria kuuma Bibilia-inĩ. Ningĩ no tũteithĩke kuumana na wendo na ũteithio ũrĩa tũngĩheo nĩ andũ a famĩlĩ na arata.

MAŨNDŨ MARĨA MATEITHĨTIE ANDŨ AMWE

Robert ũrĩa ũrĩ na mĩaka 58 ooigire ũũ: “Gĩa na wĩtĩkio harĩ Ngai na nĩ arĩgũteithagia kũũmĩrĩria mũrimũ waku. Hoya Jehova na ũmũmenyithie ũrĩa ũraigua. Mũhoe akũhe roho mũtheru. Mũrie akũhe hinya nĩguo ũhote kũũmĩrĩria famĩlĩ yaku na ũhote gũikara ũhooreire ũkĩhiũrania na mũrimũ waku.”

Robert aacokire akiuga ũũ: “Nĩ ũkoragwo ũrĩ ũteithio mũnene rĩrĩa famĩlĩ yaku ĩrakũũmĩrĩria. O mũthenya hatiagaga ũmwe kana erĩ mekũhũũrĩra thimũ makanjũria, ‘Ũhaana atĩa?’ Nyũmagĩrĩrio nĩ arata kuuma kũndũ na kũndũ. Hatarĩ nganja nĩ matũmaga njigue wega, na ũndũ ũcio ũkandeithia kwaga gũkua ngoro.”

Linda akĩaria ũhoro wa mũrata ũceereire mũndũ mũrwaru, ooigire ũũ: “Wendi wa mũndũ mũrwaru nĩ gũtũũra ũtũũro o ta wa andũ arĩa angĩ na ndangĩenda kwaria ũhoro wa mũrimũ wake hĩndĩ ciothe. Nĩ wega kwaria maũndũ marĩa mũmenyerete kwaria.”

Kũgerera hinya kuuma kũrĩ Ngai na kũũmĩrĩrio nĩ Maandĩko, o hamwe na ũteithio wa andũ a famĩlĩ marĩ na wendo na arata, no tũgĩe na ũũma atĩ ũtũũro nĩ wa bata, o na rĩrĩa tũrahiũrania na mũrimũ mũnene.

Mĩhari ya Bibilia Ĩngĩgũteithia

Wĩhokage Ngai.

“Ndatuĩririe ũhoro harĩ Jehova, nake akĩnjokeria. Aahonokirie kuuma harĩ maũndũ mothe marĩa maanjĩkĩraga guoya. Mũndũ ũcio ũtarĩ hinya aakaĩire Jehova, nake akĩmũigua.”—Thaburi 34:4, 6.

Linda ũrĩa ũkũgwetetwo ooigire ũũ: “Ngĩhoya ndiugaga, ‘Honia.’ Hĩndĩ ciothe hoyaga ngoiga, ‘Ndeithia ngĩe na hinya, na ũndeithie kũũmĩrĩria mũrimũ wakwa.’”

Thomaga Kiugo kĩa Ngai nĩguo ũgĩe na hinya.

“Gũtirĩ mũikari wakuo ũkoiga: ‘Ndĩ mũrwaru.’”—Isaia 33:24.

Wĩcũranagie igũrũ rĩgiĩ ciĩranĩro cia Ngai cia ihinda rĩrĩa rĩroka. Nĩ irĩkũheaga kĩĩrĩgĩrĩro ũkahota kũgĩa na hinya wa kũũmĩrĩria.

Caragia ũteithio kuuma kũrĩ andũ a famĩlĩ na arata.

“Mũrata wa ma onanagia wendo hingo ciothe, Na aciarĩtwo atuĩke mũrũ wa nyina na mũndũ hĩndĩ ya mĩtangĩko.”—Thimo 17:17.

Elise ũrĩa ũkũgwetetwo ooigire ũũ: “Ndũgaikare kũraihu na andũ. He arata aku mweke wa gũgũteithia. Nĩ kũrĩ hĩndĩ ũngĩigua ihooru na wone ta Ngai ataragũthikĩrĩria, no ndũgaikare kũraihu na andũ.”