Ũrĩa Mũhikanĩtie Nake Angiuma Nja wa Kĩhiko

“Ndaiguire ngĩenda gũkua rĩrĩa mũthuri wakwa aanjĩrire atĩ nĩ ekũndiga oe mũtumia mwĩthĩ. Ndaiguire njĩkĩtwo ũndũ ũtarĩ wa kĩhooto, makĩria nĩ kũririkana maũndũ marĩa mothe ndeimĩte nĩ ũndũ wake.”—Maria, kuuma Spain.

“Rĩrĩa mũtumia wakwa aandigire hinahi, ndaiguire ta harĩ kĩndũ gĩakua thĩinĩ wakwa. Mĩbango ĩrĩa twarĩ nayo, o hamwe na maũndũ marĩa twerĩgagĩrĩra tũrĩ hamwe, nĩ maathirire. Nĩ kũrĩ hĩndĩ ndaiguaga ta thirĩtwo nĩ mĩtangĩko, no ngekora njokereirũo nĩ kĩeha o rĩngĩ.”—Bill, kuuma Spain.

WAGI wa wĩhokeku thĩinĩ wa kĩhiko nĩ ũndũ ũrĩ ruo mũno. Nĩ ma, andũ amwe nĩ matuĩte itua rĩa kuohera ũrĩa mahikanĩtie nake thutha wake kwĩrira na makambĩrĩria gwaka kĩhiko kĩao rĩngĩ.a No gũtekũmakania kana kĩhiko ta kĩu nĩ gĩgũthiĩ na mbere kana nĩ gĩgũthira, mũndũ ũrĩa ũkoretwo arĩ mwĩhokeku nĩ atuuragwo mũno amenya atĩ ũrĩa mahikanĩtie nake nĩ athiĩte nja wa kĩhiko. Hihi andũ ta acio mangĩhiũrania atĩa na ruo rwao?

MĨHARI YA BIBILIA ĨNGĨGŨTEITHIA

Arĩa makoretwo marĩ ehokeku harĩ arĩa mahikanĩtie nao, nĩ mahooreretio nĩ Maandĩko o na makĩgeragĩra ruo rũnene. Nĩ merutĩte atĩ Ngai nĩ onaga maithori mao na agataũkĩrũo nĩ ruo rwao.—Malaki 2:13-16.

“Rĩrĩa mĩtangĩko yandooretie, nĩ wanyũmĩrĩirie na ũkĩhooreria.”—Thaburi 94:19.

Bill ooigire ũũ: “Ndathoma mũhari ũcio, ndahũũrire mbica ya Jehova akĩhooreria ruo rwakwa na wororo, ta ũrĩa mũthuri ũrĩ na tha angĩhooreria mwana wake.”

“Harĩ mũndũ mwĩhokeku, wee ũkoragwo ũrĩ mwĩhokeku.”—Thaburi 18:25.

Carmen, ũrĩa mũthuri wake aakoretwo atarĩ mwĩhokeku ihinda rĩa mĩeri mĩingĩ, ooigire ũũ: “Mũthuri wakwa ndaakoretwo arĩ mwĩhokeku. No nĩ ndehokaga atĩ Jehova nĩ angĩakorirũo arĩ mwĩhokeku harĩ niĩ. Ndarĩ hĩndĩ angĩandiganĩirie.”

“Mũtigatangĩkage nĩ ũndũ o na ũrĩkũ, no maũndũ-inĩ mothe menyithagiai Ngai maũndũ marĩa mũbataraga kũgerera mahoya na mathaithana . . . naguo thayũ wa Ngai ũrĩa ũkĩrĩte ũtaũku wothe nĩ ũrĩgitagĩra ngoro cianyu.”—Afilipi 4:6, 7.

Sasha ooigire ũũ: “Ndaathomaga mĩhari ĩyo rĩngĩ na rĩngĩ. O ũrĩa ndahoyaga makĩria, noguo Ngai aaheaga thayũ ũtũũro-inĩ wakwa.”

Acio othe meyarĩtie hau rũgongo nĩ harĩ hĩndĩ maaiguaga ta makinyĩte mũico. No nĩ meehokire Jehova Ngai na makĩũmĩrĩrio nĩ Kiugo gĩake. Bill ooigire ũũ: “Wĩtĩkio wakwa nĩ waheire muoroto ũtũũro-inĩ rĩrĩa maũndũ mothe moonekaga ta maharaganĩte. O na gũtuĩka nĩ harĩ hĩndĩ ndaagereire ‘mũkuru-inĩ ũrĩ na kĩĩruru kĩnene,’ Ngai aarĩ hamwe na niĩ.”—Thaburi 23:4.

a Nĩgetha wone kana mũndũ nĩ agĩrĩirũo kuohera ũrĩa mahikanĩtie nake kana ndagĩrĩirũo, rora kĩrũmanĩrĩrio kĩarĩ na kĩongo,“Mwenzi Anapokosa Uaminifu” thĩinĩ wa Amkeni! ya Ĩpuro 22, 1999.

Maũndũ Marĩa Mateithĩtie Andũ Amwe

Wĩcũranie maandĩko marĩa mangĩkũũmĩrĩria.

Bill ooigire: “Ndathomire ibuku rĩa Ayubu ngĩcoka ngĩthoma rĩa Thaburi, ngĩkururagĩra mũhari o wothe ndonaga ũkĩhutia maũndũ marĩa ndageragĩra. Nĩ ndonire atĩ andĩki acio a Bibilia nĩ maagereire ruo na mĩtangĩko o ta ĩrĩa ndaiguaga.”

Ĩtĩkĩra kũhoorerio nĩ nyĩmbo.

Carmen aririkanaga ũũ: “Rĩrĩa ndorũo nĩ toro ũtukũ, ndathikagĩrĩria nyĩmbo. Ũndũ ũcio nĩ wahooragĩria mũno.” Daniel ooigire ũũ: “Nĩ nderutire kũhũũra ngita, na nyĩmbo nĩ ciandeithagia kũgĩa na thayũ.”

Wĩyarie.

Daniel ooigire ũũ: “Ndiamenyerete kwĩyaria. No ndaarĩ na arata ega, na nĩ ndaragia nao o mũthenya. Nĩ ndamaitũrũragĩra ũrĩa ndĩraigua, kũgerera kũmaandĩkĩra marũa kana kwaria nao. Ũndũ ũcio nĩ wandeithirie mũno.” Sasha ooigire: “Famĩlĩ itũ nĩ yandeithirie mũno. Mami ndarĩ hĩndĩ aandiganagĩria. Aakoragwo ehaarĩirie gũũthikĩrĩria. Nake baba nĩ aatũmaga njigue nyendetwo na ndĩna ũgitĩri, na akĩndeithia gũcokereria o kahora.”

Ndũgatigithĩrie kũhoya.

Carmen ooigire ũũ: “Ndaahoyaga kaingĩ kaingĩ. Ndaiguaga Ngai arĩ hakuhĩ na niĩ, agĩthikĩrĩria, na akĩndeithia. Nĩ ndakuhĩrĩirie Ngai makĩria ihinda-inĩ rĩu iritũ.”