‘Ndũgetigĩre’
1. O ta Jeremia-rĩ, nĩ moritũ marĩkũ tũngĩcemania namo?
1 Rĩrĩa Jeremia eerirũo atuĩke mũnabii, eeyonaga ta ataagĩrĩire. No Jehova akĩmũũmĩrĩria ũũ: ‘Ndũgetigĩre,’ na akĩmwĩkĩra hinya nĩguo ahote kũhingia wĩra ũcio. (Jer. 1:6-10) Matukũ-inĩ maya maitũ, thoni kana kwaga ũmĩrĩru no gũtũme tũremwo nĩ kũhunjia ũrĩa kwagĩrĩire. Rĩmwe na rĩmwe, gwĩtigĩra ũrĩa andũ mekwamũkĩra ũhoro witũ kana ũrĩa megũtuona no gũtũme tũtithie kũmahunjĩria. Tũngĩtooria guoya ta ũcio atĩa, na nĩ irathimo irĩkũ tũgũkenera tweka ũguo?
2. Kwĩhaarĩria kũngĩtũteithia atĩa kũniina guoya witũ ũtungata-inĩ?
2 Haarĩria Mbere: Kwĩhaarĩria wega no gũtũteithie kũniina guoya. Kwa ngerekano-rĩ, tũngĩciria mbere ũhoro wa maũndũ marĩa andũ moigaga, nĩ tũgũkorũo twĩhaarĩirie gũcokia ciũria iria moragia kaingĩ cia gũtũgirĩrĩria twarie nao. (Thim. 15:28) Hihi no mũhũthĩre mahinda manyu hĩndĩ ya Ũthathaiya wa Famĩlĩ kwĩhaarĩria ũrĩa mũngĩhiũrania na moritũ marĩa mũngĩcemania namo cukuru kana ũtungata-inĩ?—1 Pet. 3: 15.
3. Kwĩhoka Jehova gũtũteithagia atĩa gũtooria guoya?
3 Wĩhoke Jehova: Ũteithio ũrĩa mwega wa kũniina guoya nĩ kwĩhoka Ngai witũ. Jehova oigĩte na ma atĩ nĩ egũtũteithia. (Isa. 41:10-13) Gũtirĩ ũgitĩri ũngĩ ũkĩrĩte ũcio. Makĩria ma ũguo-rĩ, Jesu nĩ aatwĩrire na ma atĩ, o na rĩrĩa twacemania na maũndũ materĩgĩrĩirũo, roho wa Ngai nĩ ũrĩtũteithagia kũhunjia na njĩra ĩrĩa yagĩrĩire. (Mar. 13:11) Kwoguo, hoyaga Jehova kaingĩ akũhe roho mũtheru.—Luk. 11: 13.
4. Nĩ irathimo irĩkũ tũgĩaga nacio nĩ ũndũ wa gũkirĩrĩria ũtungata-inĩ o na tũgĩcemanagia na moritũ?
4 Irathimo: O ũrĩa tũrakirĩrĩria ũtungata-inĩ o na tũgĩcemanagia na moritũ, noguo twĩkagĩrũo hinya wa gũtooria magerio mahinda marĩa mokĩte. Nĩ tũhotaga kũgĩa na ũmĩrĩru na ũcamba, ngumo iria cionanagio nĩ arĩa maiyũirũo nĩ roho mũtheru. (Atũm. 4:31) Ningĩ-rĩ, o ũrĩa tũgũtooria guoya witũ tũgĩteithĩrĩrio nĩ Jehova, noguo tũgwĩkĩra hinya wĩtĩkio na mwĩhoko witũ harĩ ũhoti wake wa gũtũhonokia. (Isa. 33: 2) Ningĩ, nĩ tũgĩaga na gĩkeno na tũkaiganĩra nĩ ũndũ wa kũmenya atĩ nĩ tũrakenia Ithe witũ wa igũrũ. (1 Pet. 4:13, 14) Kwoguo-rĩ, rekei tũtigetigĩre kũhunjia ũhoro wa Ũthamaki tũrĩ na ũcamba, hingo ciothe tũrĩ na ma atĩ Jehova nĩ aratũteithia!