Ũteithio Kũrĩ Famĩlĩ

1. Thabatũ ya o kiumia yaarĩ na ũguni ũrĩkũ harĩ famĩlĩ cia Aisiraeli?

¹ Thabatũ yaarĩ mũbango wa wendo, ũrĩa wagunaga famĩlĩ kuuma kũrĩ Jehova. Aisiraeli nĩ maahurũkaga mawĩra mao ma o mũthenya, na makagĩa na mahinda ma gwĩciria wega wa Jehova na ũkuruhanu wao hamwe nake. Aciari nĩ maangĩoire kamweke kau gũthomithia ciana ciao Watho wa Jehova, nĩguo ũikare ngoro-inĩ ciao. (Gũcok. 6:6, 7) Thabatũ yamaheaga mweke o kiumia wa gwĩciria ũhoro wa ũkuruhanu wao na Jehova.

2. Thabatũ ĩtũrutaga atĩa igũrũ rĩgiĩ Jehova?

² Ũma nĩ atĩ, ũmũthĩ Jehova ndoigĩte atĩ famĩlĩ inyite Thabatũ. O na kũrĩ ũguo-rĩ, watho ũcio nĩ ũtũrutaga ũndũ wĩgiĩ Ngai witũ. Hingo ciothe Jehova nĩ akoragwo akĩenda andũ ake magunĩke kĩĩroho. (Isa. 48:17, 18) Njĩra ĩmwe Jehova onanĩtie wendo wake ũmũthĩ, nĩ kũgerera hwaĩ-inĩ wa Ũthathaiya wa Famĩlĩ.

3. Muoroto wa hwaĩ-inĩ wa Ũthathaiya wa Famĩlĩ nĩ ũrĩkũ?

³ Muoroto wa Hwaĩ-inĩ wa Ũthathaiya wa Famĩlĩ nĩ Ũrĩkũ? Kwambĩrĩria Janũarĩ 2009, Wĩruti wa Ibuku wa Kĩũngano nĩ waambĩrĩirie gwĩkagwo mũthenya ũmwe na Cukuru ya Ũtungata wa Gĩtheokrasi na Mũcemanio wa Ũtungata. Gĩtũmi kĩmwe kĩa ũgarũrũku ũyũ waarĩ kũhe famĩlĩ mweke wa gwĩkĩra hinya ũkuruhanu wao na Jehova, na njĩra ya kũbanga hwaĩ-inĩ ũmwe o wiki ũkorũo ũrĩ wa ũthathaiya wa famĩlĩ. O famĩlĩ nĩyekĩrirũo ngoro kũngĩahotekire, ĩcenjie mũthenya wao wa wĩruti wa famĩlĩ ũkoragwo ũrĩ mũthenya ũrĩa maakoragwo na wĩruti wa ibuku wa kĩũngano, na mahũthĩre ihinda rĩu kũgia na ndereti cia Bibilia matarĩ na ihenya na ĩrahutia mabataro ma famĩlĩ.

4. Hihi no mũhaka Ũthathaiya wa Famĩlĩ ũkorũo ũrĩ o wa ithaa rĩmwe tu? Taarĩria.

⁴ Nĩguo tũhote gũkinya mũcemanio-inĩ wa Wĩruti wa Ibuku wa Kĩũngano nĩ twabataraga mahinda ma kwĩhaarĩria na ma gũthiĩ. Kũrĩ aingĩ aitũ, gũkinya mũcemanio-inĩ ũcio wa ithaa rĩmwe nĩ kuoyaga mahinda maingĩ gũkĩra ithaa rĩu rĩmwe rĩa wĩruti. Nĩ ũndũ wa ũgarũrũku ũcio, rĩu tũkoragwo na hwa-ini ũcio gũthathaiya Jehova tũrĩ famĩlĩ. Kwoguo to mũhaka hwaĩ-inĩ wa Ũthathaiya witũ wa Famĩlĩ ũkorũo ũrĩ o wa ithaa rĩmwe tu. No twagĩrĩirũo gwĩciria mabataro na ũhoti wa famĩlĩ ciitũ, nĩguo tũmenye twagĩrĩirũo nĩ kũhũthĩra ihinda rĩigana atĩa.

5. Hihi no mũhaka ihinda rĩothe rĩa Ũthathaiya wa Famĩlĩ rĩhũthĩrũo rĩrĩ rĩa ndeereti? Taarĩria.

⁵ Hihi no Mũhaka Ihinda Rĩu Rĩothe Rĩhũthĩke Kwarĩrĩria Maũndũ Mũrĩ Hamwe? Rĩrĩa famĩlĩ iria irĩ na ciana, na arĩa mahikanĩtie na matarĩ na ciana marĩrĩria hamwe maũndũ ma kĩĩroho-rĩ, nĩ momanagĩrĩria. (Rom. 1:12) Nĩ magĩaga na ũkuruhanu wa hakuhĩ. Nĩ ũndũ ũcio, gũkorũo na ndeereti cia Maandĩko hamwe, kwagĩrĩire gũkorũo arĩ kuo ũndũ ũrĩa wa bata makĩria hĩndĩ ya hwaĩ-inĩ wa Ũthathaiya wa Famĩlĩ. No ona kũrĩ ũguo, o mũndũ thĩinĩ wa famĩlĩ no ahũthĩre ihinda rĩna gũkorũo na wĩruti wake kĩũmbe. Kwa ngerekano, thutha wa gũkorũo na ndereti mũrĩ hamwe, famĩlĩ no ĩikare hamwe rĩrĩa o mũndũ arathiĩ na mbere kwĩruta arĩ wiki, hihi kũrĩkĩrĩria kũhaarĩria mĩcemanio kana gũthoma ngathĩti. Famĩlĩ imwe cionaga arĩ wega kũhoria TV hwaĩ-inĩ ũcio megũkorũo na Ũthathaiya wa Famĩlĩ.

6. Ndereti yagĩrĩirũo nĩ gũtongorio atĩa?

⁶ Ndeereti Yagĩrĩirũo nĩ Gũtongorio Atĩa? To mũhaka ndeereti hĩndĩ ciothe ĩkorũo ĩrĩ ya ciũria na macokio. Nĩguo hwaĩ-inĩ wa Ũthathaiya wa Famĩlĩ ũkorũo ũrĩ mwega na wa gũcanjamũra, famĩlĩ nyingĩ ikoragwo na mũtaratara ũhanaine na wa mĩcemanio itũ ya gatagatĩ ga kiumia. Magayanagia ndeereti yao tũcunjĩ tũigana ũna, magacoka magatwarĩrĩria na njĩra itiganĩte. Kwa ngerekano-rĩ, no mathome Bibilia marĩ hamwe, mahaarĩrie icunjĩ ĩmwe cia mĩcemanio, na memenyerie maũndũ maigana ũna marĩa mangĩhũthĩra marĩ ũtungata-inĩ. Karatathi ga 6, nĩ karonania maũndũ mamwe mangĩhũthĩka.

7. Aciari magĩrĩirũo gũtũma ihinda rĩa Ũthathaiya wa Famĩlĩ rĩkorũo rĩhaana atĩa?

⁷ Aciari Magĩrĩirũo Gũtũma Ihinda rĩa Ũthathaiya wa Famĩlĩ Rĩkorũo Rĩhaana Atĩa? Famĩlĩ yaku ĩkwĩruta wega mangĩkorũo mahoreire na kũngĩkorũo kũrĩ na wendo. Mahinda mangĩ no mũthomere nja rĩera rĩngĩkorũo rĩrĩ rĩega. No mũgĩe na mahinda ma kũhurũka rĩrĩa mũrathoma, kũngĩbatarania. Famĩlĩ imwe nĩ ikoragwo na kĩndũ mangĩrĩa kana mangĩnyua thutha wa ũthathaiya. O na gũtuĩka aciari matiagĩrĩirũo kũhũthĩra ihinda rĩu gũkũũma kana kũrũithia ciana ciao, no mone harĩ bata kũhũthĩra kahinda kanini kwarĩrĩria ũndũ mũna monete ũtarĩ mwega. No angĩkorũo nĩ ũndũ mũritũ ũkoniĩ mwana ũmwe, nĩ wega mangĩarĩrĩria ũndũ ũcio me keherinĩ na mwana ũcio ihinda rĩngĩ, nĩguo matikamũconorithie mbere ya arĩa angĩ. Ihinda rĩa hwaĩ-inĩ wa Ũthathaiya wa Famĩlĩ rĩagĩrĩire gũkorũo rĩrĩ ihinda rĩa gĩkeno, rĩkĩonania atĩ tũthathayagia Ngai mũkeni. —1 Tim. 1:11, NW.

8, 9. Mĩtwe ya famĩlĩ yagĩrĩire kwĩhaarĩria atĩa?

⁸ Mũtwe wa Famĩlĩ Angĩhaarĩria Atĩa? Famĩlĩ no ĩgunĩke makĩrĩa angĩkorũo mũtwe wa famĩlĩ nĩ ahaaragĩria wega mbere hĩndĩ ciothe, nĩ ũndũ wa Ũthathaiya wa Famĩlĩ na njĩra ya kũmenya nĩ ũndũ ũrĩkũ wagĩrĩirũo nĩ kwarĩrĩrio na ũrĩa wagĩrĩirũo nĩ kwarĩrĩrio. (Thim. 21:5) Mũthuri no eke wega angĩaria na mũtumia wake ũhoro wa kĩrĩa kĩagĩrĩirũo kwarĩrĩrio hĩndĩ ya ũthathaiya. (Thim. 15:22) Nĩ wega rĩngĩ na rĩngĩ, mĩtwe ya famĩlĩ kũũragia ciana maũndũ marĩa mangĩenda maarĩrĩrio hĩndĩ ĩyo ya ũthathaiya. Mweka ũguo, nĩ mũkũmenya wega maũndũ marĩa mamakenagia na maramathumbũra.

⁹ Ciumia nyingĩ mũtwe wa famĩlĩ ndarĩbataraga mahinda maingĩ ma kũhaarĩria. Famĩlĩ hihi yahota gũkenera gũkoragwo na ũndũ mũna wa kwaragĩrĩria o kiumia o kiumia, na kwoguo mũtwe wa famĩlĩ ndarĩbataraga kũbanga mũtaratara mwerũ o hingo. No one arĩ wega kũhaarĩrĩria mũtaratara thutha wa kũrĩkia ũthathaiya wao, rĩrĩa mabataro ma kĩĩroho ma famĩlĩ yake marĩ o meciria-inĩ. Mĩtwe ĩmwe ya famĩlĩ yandĩkaga na njĩra nguhĩ maũndũ marĩa makarĩrĩrio na makamaiga handũ andũ othe a famĩlĩ mangĩmona, ta friji-inĩ. Ũndũ ũyũ ũtũmaga famĩlĩ ĩrĩgĩrĩre kĩrĩa gĩgaathomwo na ũkamahe mweke wa kwĩhaarĩria.

10. Arĩa maikaraga marĩ oiki mangĩhũthĩra atĩa hwaĩ-inĩ wao wa Ũthathaiya wa Famĩlĩ?

¹⁰ Ĩ Angĩkorũo Ngoragwo Ndĩ Wiki? Arĩa maikaraga marĩ oiki no mahũthĩre hwaĩ-inĩ wa Ũthathaiya wa Famĩlĩ gũkorũo na wĩruti wao kĩũmbe. Wĩruti mwega wa mũndũ kĩũmbe wagĩrĩirũo gũkorũo na ũthomi wa Bibilia, kũhaarĩria mĩcemanio na gũthoma ngathĩti ya Mũrangĩri na Amkeni! O hamwe na gwĩka ũguo ahunjia angĩ nĩ magĩaga na mũbango wa gwĩka ũthuthuria. Rĩngĩ na rĩngĩ, o na no meete famĩlĩ ĩngĩ kana mũhunjia ũngĩ magĩe na ndeereti cia Maandĩko hamwe.

11, 12. Nĩ ũguni ũrĩkũ uumanaga na gũkorũo na hwaĩ-inĩ wa Ũthathaiya wa Famĩlĩ ũtegũtĩrĩrio?

¹¹ Nĩ Ũguni Ũrĩkũ Ũmanaga na Kũgĩa na Hwaĩ-inĩ wa Ũthathaiya wa Famĩlĩ Mategũtĩrĩria? Arĩa mathathaiyagia Jehova na ngoro yao yothe nĩ mamũkuhagĩrĩria. O na makĩria, famĩlĩ iria ithathayagia hamwe igĩaga na ũrũmwe ũrĩ na hinya. Mũthuri na mũtumia ũmwe mahikanĩtie, maandĩkire ũũ igũrũ rĩgiĩ irathimo iria makeneire: “Tũrĩ mapainia tũtarĩ na ciana, nĩ twĩrĩgagĩrĩra mũno hwaĩ-inĩ witũ wa Ũthathaiya wa Famĩlĩ. Tũiguaga tũgĩkuhanĩrĩria na o na tũgĩkuhĩrĩria Ithe witũ wa igũrũ. Rũcinĩ rwa mũthenya wa ũthathaiya witũ twokĩra twĩranaga ũũ: “Nĩ ũraririkana hwaĩ-inĩ wa ũmũthĩ nĩ wa kĩĩ? Ũthathaiya wa Famĩlĩ!”

¹² Mũbango ũyũ wa kũgĩa na hwa-ini wa ũthathaiya wa famĩlĩ nĩ ũteithagia o na famĩlĩ iria ikoragwo na mĩhangʼo mĩingĩ. Mũtumia ũmwe ũtarĩ mũthuri, ũrarera ariũ ake erĩ na nĩ painia wa hĩndĩ ciothe aandĩkire ũũ: “Tene, wĩruti witũ wa Bibilia ndwarĩ mwega. Nĩ twatĩragĩria tondũ ndakoragwo ndĩ mũnogu. Nĩ ndaaremagwo nĩ kũbanga rĩrĩa tũngĩhota kũgĩa na wĩruti witũ wa famĩlĩ. Nĩ ũndũ ũcio, ndĩramwandĩkĩra kũmũcokeria ngatho nĩ ũndũ wa hwaĩ-inĩ wa Ũthathaiya wa Famĩlĩ. Tũkoretwo tũkĩhota kũgĩa na wĩruti wa famĩlĩ tũtegũtĩrĩria na nĩ tũragunĩka mũno.”

13. Nĩ ũndũ ũrĩkũ ũngĩonania ũrĩa famĩlĩ yaku ĩngĩgunĩka kuumana na mũbango ũyũ?

¹³ O ta Thabatũ, hwaĩ-inĩ wa Ũthathaiya wa Famĩlĩ nĩ kĩheo kuuma kũrĩ Ithe witũ wa igũrũ kĩrĩa kĩngĩteithia famĩlĩ. (Jak. 1:17) Ũrĩa famĩlĩ cia Aisiraeli ciekaga hĩndĩ ya Thabatũ kuoonanagia ũrĩa maagunĩkaga kĩĩroho. O ũndũ ũmwe, ũrĩa tũhũthagĩra hwaĩ-inĩ ũcio tũheetwo wa ũthathaiya wa famĩlĩ kuonanagia ũrĩa famĩlĩ iitũ ĩkũgunĩka. (2 Kor. 9:6; Gal. 6:7, 8; Kol. 3:23, 24) Mũngĩhũthĩra wega mũbango ũyũ, famĩlĩ yaku no yuuge ciugo ta ici cia mwandĩkĩ wa Thaburi: “No niĩ-rĩ, gũkuhĩrĩria Ngai, nĩkuo kũnjagĩrĩire; Mwathani Jehova nowe nduĩte irahĩro rĩakwa.” —Thab. 73:28.

[Kohoro karatathi ga 5]

Ihinda rĩa hwaĩ-inĩ wa Ũthathaiya wa Famĩlĩ rĩagĩrĩire gũkorũo rĩrĩ ihinda rĩa gĩkeno, rĩkĩonania atĩ tũthathayagia Ngai mũkeni

[Ithandũkũ Karatathi ga 6]

IGA WEGA

Maũndũ Mamwe Mangĩhũthĩka Hĩndĩ ya Hwaĩ-inĩ wa Ũthathaiya wa Famĩlĩ

Bibilia:

• Thomai gĩcũnjĩ kĩa ũthomi wa Bibilia wa kiumia mũrĩ hamwe. Mũndũ ũmwe no athome gĩcunjĩ kĩa mũgani rũgano, na acio angĩ mathome icunjĩ cia acio angĩ marĩ thĩinĩ wa rũgano rũu, angĩkorũo gĩcunjĩ kĩu nĩguo gĩtariĩ.

• No muoye gĩcunjĩ kĩmwe kĩa ũthomi wa Bibilia na mũgĩke kĩrĩ ta ithako.

• O mũndũ thĩinĩ wa famĩlĩ no agaĩrũo gũthoma gĩcunjĩ kĩa Bibilia kabere, na acarie kĩũria kĩmwe kana igĩrĩ ciĩgiĩ ũhoro ũcio athoma. Mũcoke mwĩke ũthuthuria mũrĩ hamwe igũrũ rĩa kĩũria kĩa o mũndũ.

• O kiumia thondeka gakandi karĩ na mũhari wa Bibilia na ũgerie kũũririkana na kũũtaarĩria. Igaga kandi icio handũ, na ũcicokagĩre o kiumia wone nĩ maandĩko maigana ũngĩririkana.

• Thikĩrĩria Bibilia ĩgĩthomwo CD-inĩ na ũtwarane hamwe ũrĩ na Bibilia yaku.

Mĩcemanio:

• Harĩriai mũrĩ hamwe gĩcũnjĩ kĩa mĩcemanio.

• Mwĩrutei kũina mũrĩ hamwe nyĩmbo cia Ũthamaki iria ikainwo mĩcemanio-inĩ ya kiumia kĩrĩa kĩrũmĩrĩire.

• Angĩkorũo harĩ mũndũ wa famĩlĩ ũgaakorũo na mĩario thĩinĩ wa Cukuru ya Ũtungata wa Gĩtheokrasi kana kĩonereria thĩinĩ wa Mũcemanio wa Ũtungata, arĩrĩriai ũrĩa kĩngĩrutwo kana agĩcokere mbere ya famĩlĩ.

Mabataro ma Famĩlĩ:

• No mũrore ũhoro mũngĩĩruta ibuku-inĩ rĩa Vijana Huuliza kana rĩa Jifunze Kutoka Kwa Mwalimu Mkuu.

• Gĩai na ihinda rĩa kwĩmenyeria ũrĩa ciana ingĩhiũrania na ũndũ mũna ũngĩhanĩka rĩrĩa marĩ cukuru.

• Gĩai na kahinda ga kwĩmenyeria, ciana igetua aciari nao aciari magetua ciana. Ciana igeeka ũthuthuria wa ũndũ mũna magacoka makawarĩrĩria na aciari.

Ũtungata:

• Gĩai na ihinda rĩa kwĩmenyeria nĩguo mwĩhaarĩrie ũrĩa mũkaahunjia mũthia-inĩ wa kiumia.

• Arĩrĩriai matanya marĩa famĩlĩ yanyu ĩngĩiigĩra nĩguo yandandũre ũtungata hĩndĩ ya Kĩririkano gĩa gĩkuũ kĩa Jesu kana rĩrĩa marĩ rũtha.

• He o mũndũ thĩinĩ wa famĩlĩ ndagĩka nyinyi cia gũthuthuria ũrĩa angĩcokia kĩũria ngũrani kĩrĩa mangĩũrio makĩhunjia, mũcoke mwĩmenyerie maũndũ macio.

Maũndũ Mangĩ Mangĩhũthĩka:

• Thomai hamwe ngathĩti cia ica ikuhĩ.

• Rekei o mũndũ thĩinĩ wa famĩlĩ agĩe na kamweke ga gũthoma kabere gĩcunjĩ kĩna kĩrĩa endete kuuma ngathĩti-inĩ cia ica ikuhĩ, acoke aheane maũndũ marĩa araathomire.

• Mahinda mangĩ no mwĩte mũhunjia ũngĩ kana mũthuri na mũtumia arĩa mahikanĩtie manyitanĩre hamwe na inyuĩ hwaĩ-inĩ wanyu wa Ũthathaiya wa Famĩlĩ na hihi mũmahoe ũhoro.

• Mwĩrorerei na mwarĩrĩrie ĩmwe ya vidio ciitũ.

• Arĩrĩriai mũrĩ hamwe “Vijana Huuliza” kana “Mazungumzo ya Familia” kuuma ngathĩti-inĩ ya Amkeni!

• Arĩrĩriai mũrĩ hamwe “Wafundishe Watoto Wako” kana “Kwa Ajili ya Vijana” ngathĩti-inĩ ya Mũrangĩri.

• Thoma na mwarĩrĩrie gacunjĩ kuuma Kitabu cha Mwaka rĩa ica ikuhĩ kana ibuku rĩrĩa twaheirũo thĩinĩ wa kĩrũrũngano kĩa ngʼongo.

• Cokerai maũndũ marĩa maarĩrĩirio kĩrũrũngano-inĩ kana kĩgomano-inĩ kĩrĩa mwĩrĩga.

• Thutha wa kwĩrorera ũũmbi wa Jehova, arĩrĩriai ũrĩa ũngĩmũruta igũrũ rĩa Jehova.

• No mũcore mũcoro, kana mũthondeke mũhaano wa kĩndũ mwathoma ũhoro wakĩo mũrĩ hamwe.