Ngathĩti Ciitũ Ihaarĩirio Nĩguo Igucĩrĩrie Andũ Othe
1. Nĩ na njĩra ĩrĩkũ ngombo ĩrĩa ĩĩhokekete na njũgĩ ĩĩgerekanagia na mũtũmwo Paulo?
1 O ta ũrĩa mũtũmwo Paulo aahũthagĩra njĩra itiganĩte nĩguo ahunjĩrie “andũ othe,” ngombo ĩrĩa ĩĩhokekete na njũgĩ ĩhũthagĩra ngathĩti nĩguo ĩkinyie ndũmĩrĩri kũrĩ andũ moimĩte mĩena ĩtiganĩte na marĩ na wĩtĩkio ngũrani. (1 Kor. 9:22, 23) Nĩguo tũhote kũhũthĩra wega Ngathĩti ya Mũrangĩri na Amkeni! tũrabatara kũririkana nĩ a makoragwo marongoreirio ngathĩti icio.
2. Amkeni! ihaarĩirio kũgucĩrĩria andũ arĩkũ?
2 Amkeni!: Ngathĩti ĩno ĩcabĩtwo nĩguo ĩkinyĩre andũ o ta arĩa mũtũmwo Paulo aahunjagĩria rĩrĩa aaragia na ‘athuri a Athene.’ (Atũm. 17:22) Andũ acio matiarĩ Akristiano, na matiarĩ na ũmenyo mũingĩ wa Maandĩko. Ũndũ ũmwe na ũguo, arĩa makoragwo marongoreirio ngathĩti ya Amkeni! nĩ andũ matakoragwo na ũmenyo mũingĩ wa Bibilia. No makorũo matoĩ ũrutani o na mũnini wa Ũkristiano, kana makaga mwĩhoko harĩ ndini, o na kana rĩngĩ magakorũo matoĩ atĩ Bibilia nĩ ĩrĩ maũndũ mangĩhũthĩka ũtũũro-inĩ. Muoroto ũmwe mũnene wa Amkeni! nĩ kũiguithia athomi ayo atĩ nĩ kũrĩ Ngai wa ma, hamwe na gwaka wĩtĩkio harĩ Bibilia na gũteithia mũthomi wayo amenye atĩ Aira a Jehova nĩ ngũrani na ikundi iria ingĩ cia kĩndini.
3. O riuma rĩa ngathĩti ya Mũrangĩri rĩkoragwo rĩrongoreirio a?
3 Mũrangĩri: Riuma rĩa andũ othe rĩa ngathĩti ĩno rĩrongoreirio andũ matĩĩte Ngai o na Maandĩko. No makorũo moĩ Bibilia hanini no matitaũkĩirũo wega nĩ ũrutani wayo. Mahaana o ta andũ arĩa maathikagĩrĩria Paulo,rĩa oigire atĩ nĩ ‘meetigĩrĩte Ngai.’ (Atũm. 13:14-16) Riuma rĩa wĩruti wa Mũrangĩri rĩandĩkĩirũo Aira a Jehova. Paulo aatuaga atĩ arĩa maathomaga marũa make nĩ andũ maarĩ na ũtaũku wa Maandĩko na ũũgĩ ũrĩa wa ma. (1 Kor. 1:1, 2) Ũndũ ũmwe na ũguo, icunjĩ iria irĩ thĩinĩ wa riuma rĩa wĩruti ikoragwo ciandĩkĩirũo andũ arĩa mokaga mĩcemanio iitũ na mangĩtaũkĩrũo nĩ ciugo iria Aira a Jehova mahũthagĩra.
4. Twagĩrĩirũo gũthoma na kũmenya ũhoro ũrĩa ũrĩ thĩinĩ wa o riuma rĩa ngathĩti iria tũkũhũthĩra tũkĩhunjia nĩkĩ?
4 O na gũtuĩka tũheanaga ngathĩti icio irĩ igĩrĩ, kaingĩ twaragĩrĩria o ĩmwe yacio rĩrĩa tũraciheana. Kwoguo, reke ũkorũo ũrĩ muoroto waku gũthoma na kũmenya ũhoro ũrĩa ũrĩ thĩinĩ wa o ĩmwe yacio. Weka ũguo nĩ ũgũkorũo na kamweke kega ga kwarĩrĩria maũndũ marĩa mangĩgucĩrĩria andũ arĩa ũgucemania nao.