Ithandũkũ rĩa Kĩũria

◼ Nĩkĩ gĩtũteithagia kũmenya kana nĩ tũgũtigĩra mũndũ ibuku?

Ũndũ ũrĩa wa bata kũrora nĩ kana mũndũ nĩ arakenio nĩ ũhoro. Angĩonania kũna atĩ nĩ arakenio, no tũmũtigĩre ngathĩti igĩrĩ, broshua, ibuku, kana kĩndũ kĩngĩ o gĩothe tũngĩkorũo tũkĩheana. No twĩke ũguo o na angĩkorũo mũndũ arĩ na mbeca nini tu kana ndarĩ na mũhothi wa gũteithĩrĩria wĩra wa kũhunjia thĩ yothe. (Ayub. 34:19; Kũg. 22:17) O na kũrĩ ũguo-rĩ, mabuku maitũ tũtitigagĩra andũ arĩa matonaga marĩ ma bata.—Mat. 7:6.

Mwene nyũmba angĩonania atĩa nĩ arakenio nĩ ũhoro? Ũndũ ũmwe tũngĩrora nĩ wendi wake wa kwaranĩria na ithuĩ. Gũthikĩrĩria rĩrĩa tũraaria, gũcokia ciũria, na kũruta mawoni make kuonanagia nĩ arakenera ndeereti. Gũtwarana na ithuĩ rĩrĩa tũrathoma Bibilia kuonanagia nĩ atĩĩte Kiugo kĩa Ngai. Kaingĩ-rĩ, nĩ wega kũũria mũndũ kana nĩ egũthoma ibuku rĩrĩa tũkũmũhe. Ahunjia magĩrĩirũo kũhũthĩra ũũgĩ kũmenya kana mũndũ nĩ arakenio nĩ ũhoro. Kwa ngerekano, rĩrĩa tũrahunjia barabara-inĩ, ti wega kũheana ngathĩti, broshua, kana mabuku kũrĩ mũndũ o wothe tũracemania nake tũtekũrora kana nĩ arakenio nĩ ũhoro. Angĩkorũo tũtinahota kũmenya kana mũndũ nĩ arakenio nĩ ũhoro, nĩ kaba tũmũhe karatathi ga kũmũnyita ũgeni mĩcemanio-inĩ kana trakti.

Ũndũ ũmwe na ũguo, mũigana wa mabuku marĩa mũhunjia ekuoya metha-inĩ ya mabuku wagĩrĩirũo kũringana na kĩrĩa arabatara ũtungata-inĩ wake no ti mũhothi ũrĩa angĩhota kũruta. Mĩhothi ti ya kũrĩha mabuku ĩndĩ nĩ ya gũteithĩrĩria maũndũ mothe makoniĩ wĩra witũ wa kũhunjia thĩ yothe. Gũtekũmakania ũhoti witũ wa kĩĩmbeca, ngaatho ciitũ no itũhatĩrĩrie tũhothe na ũtaana kũnyita mbaru maũndũ ma Ũthamaki, o na twĩna indo nyinyi, no ti ũndũ twĩna nyingĩ. (Mar. 12:41-44; 2 Kor. 9:7) Ningĩ ũndũ ũcio nĩ ũrĩtũmaga tuoye o mabuku marĩa tũrabatara, na njĩra ĩyo tũkaaga kũhũthĩra ũũru indo cia Ũthamaki.

Ahunjia magĩrĩirũo kũhũthĩra ũũgĩ kũmenya kana mũndũ nĩ arakenio nĩ ũhoro