Itũmi Ikũmi na Igĩrĩ cia Kũhunjia

Tũhunjagia na tũkarutana ũhoro ũrĩa mwega nĩkĩ? Hihi no gũteithia andũ a ngoro njega maingĩre njĩra-inĩ ya muoyo? (Mat. 7:14) Kĩu nĩkĩo gĩtũmi kĩa mbere haha mũhuro, ĩndĩ ti kĩo gĩtũmi gitũ kĩrĩa kĩnene. Ũgwĩciria nĩ gĩtũmi kĩrĩkũ gĩa kũruta wĩra wa ũtungata kĩa bata makĩria harĩ ici 12 irĩ haha?

1. Rĩrĩa tũrahunjia tũteithagia kũhonokia mĩoyo.—Joh. 17:3.

2. Rĩrĩa tũrahunjia tũheaga arĩa aganu mũkaana.—Ezek. 3:18, 19.

3. Rĩrĩa tũrahunjia tũteithagia kũhingia ũrathi wa Bibilia.—Mat. 24:14.

4. Rĩrĩa tũrahunjia tuonanagia Ngai nĩ mũthingu. Jehova ndangĩcambio atĩ aniinaga andũ aganu atambĩte kũmahe mweke wa kwĩrira.—Atũm. 17:30, 31; 1 Tim. 2:3, 4.

5. Rĩrĩa tũrahunjia tũgĩaga na mweke wa kũrĩha thirĩ witũ wa gũteithia kĩĩroho arĩa magũrĩtwo na thakame ya Jesu.—Rom. 1:14, 15.

6. Rĩrĩa tũrahunjia twĩthemaga kũũrio thakame ya andũ.—Atũm. 20:26, 27.

7. Kũhunjia nĩ kwa bata harĩ ũhonokio witũ.—Ezek. 3:19; Rom. 10:9, 10.

8. Rĩrĩa tũrahunjia tuonanagia wendo witũ harĩ andũ.—Mat. 22:39.

9. Rĩrĩa tũrahunjia tuonanagia wathĩki harĩ Jehova na harĩ Mũriũ.—Mat. 28:19, 20.

10. Kũhunjia nĩ gĩcunjĩ kĩa ũthathaiya witũ.—Ahib. 13:15.

11. Kũhunjia kuonanagia wendo witũ harĩ Ngai.—1 Joh. 5:3.

12. Kũhunjia gũtũmaga rĩĩtwa rĩa Ngai rĩtherio.—Isa. 43:10-12; Mat. 6:9.

Ma nĩ atĩ icio to cio itũmi iria itũmaga tũhunjie. Kwa ngerekano, kũhunjia nĩ gwĩkagĩra wĩtĩkio witũ hinya na gũgatũhe mweke wa kũrutithania wĩra hamwe na Ngai. (1 Kor. 3:9) O na kũrĩ ũguo, gĩtũmi kĩrĩa kĩnene makĩria gĩa kũhunjia nĩ namba 12. Gũtekũmakania ũrĩa andũ maraiyũkia ndũmĩrĩri, ũtungata ũtũmaga rĩĩtwa rĩa Ngai rĩtherio na ũgatũma Jehova acokerie ũrĩa ũmũnyũrũragia. (Thim. 27:11) Hatarĩ nganja tũrĩ na itũmi njiganu cia gũthiĩ na mbere ‘tũtegũtiga kũrutana na kũheana ũhoro ũrĩa mwega.’—Atũm. 5:42.