Tĩa Mweke Waku wa Ũtungata
1. Andũ aingĩ thĩinĩ wa thĩ monaga wĩra witũ wa kũhunjia atĩa?
1 Andũ aingĩ thĩinĩ wa thĩ ĩno ya Shaitani monaga wĩra witũ wa kũhunjia ũrĩ “ũrimũ.” (1 Kor. 1:18-21) Tũngĩaga kwĩmenyerera, mawoni macio matagĩrĩire no matũme tũkue ngoro na tũnyihie kĩyo giitũ. (Thim. 24:10; Isa. 5:20) Tũrĩ na itũmi irĩkũ cia gũtĩa mweke witũ wa gũkorũo tũrĩ Aira a Jehova?—Isa. 43:10.
2. Nĩkĩ wĩra wa kũhunjia arĩ “wĩra mũtheru”?
2 “Wĩra Mũtheru”: Mũtũmwo Paulo oigire ũtungata nĩ “wĩra mũtheru.” (Rom. 15:15, 16, NW) Ũtungata nĩ “wĩra mũtheru” na njĩra ĩrĩkũ? Gũkorũo na itemi ũtungata-inĩ gũtũmaga tũkorũo tũrĩ “arutithania wĩra” hamwe na ũrĩa ‘Mũtheru,’ Jehova, na gũgatheria rĩĩtwa rĩake. (1 Kor. 3:9; 1 Pet. 1:15) Jehova onaga wĩra witũ wa kũhunjia ũrĩ “igongona tũramũrutĩra,” kwoguo ũtungata nĩ gĩcunjĩ kĩa bata ũthathaiya-inĩ witũ.—Ahib. 13:15.
3. Nĩ kĩĩ gĩtũmaga kũhunjia ũhoro ũrĩa mwega gũkorũo arĩ gĩtĩo kĩnene?
3 Kũhunjia ũhoro ũrĩa mwega nĩ gĩtĩo kĩnene kĩrĩa arĩ o andũ anini maheetwo. Araika no makenere wĩra ũcio mũno na hatarĩ nganja ma ũrute wega makĩria. (1 Pet. 1:12) O na kũrĩ ũguo-rĩ, Jehova atũthuurĩte tũrĩ andũ matarĩ akinyanĩru, tũhaana ta “nyũngũ ya rĩũmba” nĩ ũndũ wa gĩtĩo gĩkĩ kĩnene!—2 Kor. 4:7.
4. Tũngĩonania atĩa nĩ tũtĩĩte ũtungata?
4 Kũũhe Mweke wa Mbere: Tondũ nĩ tuonaga gĩtĩo kĩu kĩa ũtungata kĩrĩ kĩa bata-rĩ, tuonaga wĩra wa kũhunjia ũrĩ ũndũ ũmwe wa marĩa ‘magĩrĩire kũrĩ marĩa mangĩ’ ũtũũro-inĩ witũ. (Afil. 1:10) Kwoguo, tũcaragia mahinda o kiumia nĩguo tũkorũo na itemi wĩra-inĩ ũcio. Mũini ũtĩĩte mweke wake wa kũina na gĩkundi kĩa aini njorua kĩũĩkaine thĩ yothe, ehaaragĩria wega rĩrĩa rĩothe arathiĩ kũina na akerutanĩria gũkũria ũhoti wake wa kũina. O ũndũ ũmwe, tũrĩĩhaarĩgĩria mbere ya gũthiĩ ũtungata nĩguo ‘tũheanage ũhoro-ũrĩa-wa-ma na mũheanĩre ũrĩa mũrũngarũ’ na tũkerutanĩria kwagĩria ‘mũrutanĩre’ witũ.—2 Tim. 2:15; 4:2.
5. Nĩ a makenagĩra ũtungata witũ?
5 Ndũkareke mawoni matarĩ mega ma andũ aingĩ makũũrage ngoro. Ririkana atĩ nĩ kũrĩ andũ aingĩ thĩinĩ wa gĩcigo giitũ makenaga twamacerera. O na kũrĩ ũguo, tũticaragia kwendeka nĩ andũ. Ũndũ ũrĩa wa bata nĩ ũrĩa Jehova aiguaga, na nĩ akenagĩra mũno kĩyo giitũ kĩnene.—Isa. 52:7.
[Ciũria cia Wĩruti]