Kenagĩra Wĩra Waku Mũritũ
1. Nĩ kĩĩ kĩngĩtũma kĩyo gitũ ũtungata-inĩ kĩnyihe?
1 Mũndũ ombirũo ‘akenagĩre wĩra wake ũrĩa anogagĩra.’ (Koh. 2:24, New Kikuyu Bible) O na kũrĩ ũguo-rĩ, rĩrĩa twaga moimĩrĩro mega ũtungata-inĩ witũ, gũkua ngoro no gũtũme twage gĩkeno na kũnyihie kĩyo gitũ. Nĩ kĩĩ kĩngĩtũteithia gũtũũria mawoni marĩa magĩrĩire?
2. Nĩkĩ tũtiagĩrĩirũo kwĩrĩgĩrĩra maũndũ manene mũno ũhoro-inĩ wĩgiĩ ũrĩa andũ maiyũkagia ũtungata witũ?
2 Ndũkerĩgĩrĩre Maũndũ Manene Mũno: Ririkana atĩ o na gũtuĩka ti andũ aingĩ maiyũkirie ndũmĩrĩri ya Jesu, hatarĩ nganja ũtungata wake nĩ wagaacĩire. (Joh. 17:4) Ngerekano-inĩ yake ya mũhuri wa mbeũ, Jesu nĩ oigire atĩ mũthia-inĩ, andũ arĩa aingĩ matingĩkaiyũkia ndũmĩrĩri ya Ũthamaki ĩrĩa aringithanirie na mbeũ. (Mat. 13:3-8, 18-22) O na kũrĩ ũguo, kĩyo gitũ kĩhingagia maũndũ maingĩ.
3. ‘Tũngĩciara maciaro’ atĩa o na tũngĩaga moimĩrĩro mega wĩra-inĩ witũ wa kũhunjia?
3 Ũrĩa Tũciaraga Maciaro Maingĩ: Kũringana na ngerekano ĩyo ya Jesu, andũ arĩa metĩkagĩra ndũmĩrĩri nĩ ‘maciaraga maciaro.’ (Mat. 13:23) Rĩrĩa ngano yamera na yaneneha, ti tũmĩmera tũnini twa ngano iciaraga, ĩndĩ iciaraga mbeũ ingĩ. Kwoguo maciaro marĩa Akristiano arĩa magĩaga na moimĩrĩro mega maciaraga to arutwo erũ, ĩndĩ nĩ mbeũ nyingĩ cia Ũthamaki iria tũhandaga—rĩrĩ tũrahunjia igũrũ rĩgiĩ Ũthamaki. Ũndũ ũcio nĩ ũtũrehagĩra ‘gĩkeno’ kĩrĩa gĩtũmaga tũiganĩre, o na andũ mangĩaga kũiyũkia ndũmĩrĩri itũ. Nĩ tũgĩaga na itemi harĩ gũtheria rĩĩtwa rĩa Jehova. (Isa. 43:10-12; Mat. 6:9) Nĩ tũkenagĩra mweke wa gũkorũo tũrĩ arutithania wĩra hamwe na Ngai. (1 Kor. 3:9) Na ‘maciaro macio moimĩte tũnua-inĩ’ nĩ makenagia Jehova.—Ahib. 13:15, 16.
4. Nĩ ũndũ ũrĩkũ ũngiumana na ũtungata witũ o na tũtekũmenya?
4 Makĩria ma ũguo, wĩra witũ mũritũ no ũkorũo na moimĩrĩro tũtarahota kuona. No kũhoteke atĩ andũ amwe arĩa maathikĩrĩirie Jesu akĩhunjia maacokire gũtuĩka arũmĩrĩri ake thutha wa ũtungata wake gũkũ thĩ. No taguo, mbeũ ya Ũthamaki ĩrĩa tũhandaga ĩngĩkũra ngoro-inĩ ya mũndũ kwa ihinda, no aingĩre ũthathaiya-inĩ wa ma o na tũtekũmenya. Ma nĩ atĩ, ũtungata witũ nĩ ũhingagia maũndũ maingĩ mega. Nĩ ũndũ ũcio, rekei ‘tũciarage maciaro maingĩ’ nĩguo tũkonanagia atĩ tũrĩ arũtwo a Jesu.—Joh. 15:8.