“Endagai Ariũ Othe a Ithe Witũ”
Ciugo cia kĩongo kĩu iria itongoretio nĩ roho ciaandĩkirũo hakuhĩ mĩaka ngiri igĩrĩ mĩhĩtũku. (1 Pet. 2:17) Ĩndĩ mahinda-inĩ maya nĩrĩo tũrabatara gũcihũthĩra gũkĩra hĩndĩ ĩngĩ o yothe! Tũngĩhota atĩa kwenda ariũ a Ithe witũ othe thĩinĩ wa thĩ? Na tũrĩ thĩinĩ wa thĩ ĩno ĩtarĩ na wendo, tũngĩtigĩrĩra atĩa atĩ wendo witũ ndũkũhwererekera? (Mat. 24:12) Geria gũcaria macokio ma ciũria ici ũkĩrorera video, Ũrũmwe wa Ariũ Othe a Ithe Witũ.
(1)Twaingĩrire rĩ thĩinĩ wa ũrũmwe wa Gĩkristiano? (2) Nĩ maũndũ marĩkũ matatũ twĩkaga mahaanaine thĩinĩ wa ũrũmwe wa ariũ a Ithe witũ thĩ yothe? (3) Ariũ a Ithe witũ maronania atĩa kĩyo kĩao gĩa kũhunjia (a) werũ-inĩ wa Alaska, (b) icukĩro-inĩ cia Rũraya cia meri, na (c) mĩtitũ-inĩ mĩnene ya Peru? (4) Nĩkĩ tũtiagĩrĩirũo o na hanini kũhũthia wĩra witũ wa kũhunjia? (5) Heana ngerekano cia ũrĩa Aira a Jehova maanomanĩrĩria na magateithania (a) thutha wa gĩthingithia, (b) thutha wa kĩhuhũkanio, na (c) hĩndĩ ya mbaara cia kĩĩndũrĩrĩ? (6) Nĩ na njĩra irĩkũ ithuothe tũngĩonania rũri rwitũ rũrĩa rũnene rwa ũrũmwe witũ wa Gĩkristiano? (Joh. 13:35) (7) Gũkoragwo na ũguni ũrĩkũ nĩ ũndũ wa kũrutithania wĩra hamwe tũgĩaka Nyũmba citũ cia Ũthamaki? (8) Ariũ a Ithe witũ thĩinĩ wa Rũraya ya Irathĩro na Russia maahotire atĩa gũikara hakuhĩ na Jehova rĩrĩa wĩra witũ wagirĩtio? (9) Aira aingĩ a Jehova mekĩraga kĩyo kĩrĩkũ kĩa mwanya nĩguo makorũo irũrũngano-inĩ, na nĩkĩ? (10) Video ĩno yagwĩkĩra hinya atĩa (a) gũthathaiya Jehova mĩcemanio-inĩ ya Gĩkristiano hamwe na aarĩ na ariũ a Ithe witũ, (b) gũteithia arĩa angĩ hĩndĩ ya thĩna, na (c) kũhunjia na wĩhokeku hĩndĩ o yothe na o ũrĩa wothe ũngĩhota? (11) Nĩ na njĩra ĩrĩkũ na nĩ rĩ tũngĩhũthĩra video ĩno ũtungata-inĩ?
Gĩtũmi gitũ kĩnene gĩa gũkorũo thĩinĩ wa ũrũmwe witũ wa Gĩkristiano nĩ wendo witũ harĩ Jehova. Nĩ ũndũ ũcio nĩ twendete kwĩruta na kũruta arĩa angĩ ũhoro wake. Na nĩ twendete andũ arĩa Jehova endete. Rĩrĩa twamateithia hĩndĩ ya mathĩna, tũtiĩrĩgagĩrĩra Ngai atũcokerie ngatho. Ithenya rĩa ũguo, tũcokagĩria Ngai ngatho tondũ tuonaga ũrũmwe witũ wa Gĩkristiano ũrĩ kĩheo kĩa goro kuuma kũrĩ we. O ũrĩa matukũ ma kũrigĩrĩria ma thĩ ĩno ĩtarĩ na wendo marakuhĩrĩria gũthira-rĩ, rekei tũthiĩ na mbere kwenda ariũ othe a Ithe witũ!