Ũrũmwe wa Aarĩ na Ariũ a Ithe Witũ

KWA ihinda rĩa mĩaka 1,500, Jehova Ngai aarũmbũyanagia na Aisiraeli marĩ andũ metanĩtio na rĩĩtwa rĩake. Thutha ũcio, Jehova nĩ “aambĩrĩirie kwerekeria meciria make kũrĩ ndũrĩrĩ nĩguo egĩĩre na andũ kuuma kũrĩ cio metanĩtio na rĩĩtwa rĩake.” (Atũm. 15:14) Andũ arĩa mangĩetanirio na rĩĩtwa rĩa Jehova mangĩatuĩkire aira ake, na makorũo na ciĩko na mwĩcirĩrie ũmwe gũtekũmakania kũrĩa moimĩte. Wĩra ũrĩa Jesu aaheire arũmĩrĩri ake nĩguo ũngĩatũmire andũ arĩa metanĩtio na rĩĩtwa rĩa Ngai magĩe na ũrũmwe. Aameerire ũũ: “Nĩ ũndũ ũcio-rĩ, thiĩi mũgatue andũ arutwo kuuma ndũrĩrĩ-inĩ ciothe, mũkĩmabatithagia thĩinĩ wa rĩĩtwa rĩa Ithe witũ, na rĩa Mũriũ, na rĩa roho mũtheru, mũkĩmarutaga kũrũmia maũndũ marĩa mothe ndĩmwathĩte.”​—Mat. 28:19, 20.

² Nĩ ũndũ wa kwĩyamũrĩra Jehova na kũbatithio, nĩ ũtuĩkĩte mũrutwo wa Jesu Kristo. Ũrĩ thĩinĩ wa famĩlĩ ya Gĩkristiano ĩrĩ na ũrũmwe ya thĩ yothe o na gũtuĩka nĩ ya andũ moimĩte thĩinĩ wa mabũrũri matiganĩte, ndũrĩrĩ itiganĩte, na marĩ na ũhoti ũtaiganaine wa kĩĩmbeca. (Thab. 133:1) Nĩ ũndũ ũcio, nĩ wendete Akristiano arĩa angĩ thĩinĩ wa kĩũngano na nĩ ũmatĩĩte. No kũhoteke mbere ĩyo ndũngĩendire amwe ao nĩ ũndũ wa gũkorũo moimĩte bũrũri ũngĩ kana rũrĩrĩ rũngĩ kana nĩ ũndũ wa gũkorũo matarĩ na gĩthomo ta gĩaku. No rĩu, mũkoragwo na wendo mũrũmu mũno gatagatĩ-inĩ kanyu gũkĩra ũkuruhanu ũngĩ o wothe, ũkorũo ũrĩ wa andũ a famĩlĩ ĩmwe, a ndini ĩmwe, o na kana arata.​—Mar. 10:29, 30; Kol. 3:14; 1 Pet. 1:22.

GŨCENJIA MWĨCIRĨRIE

³ Angĩkorũo harĩ mũndũ ũritũhagĩrũo nĩ kweheria rũmena rwa gĩĩkabira, gĩũteti, kana rũmena rũngĩ o ruothe rũrikĩrĩte, no ecirie ũhoro wa Akristiano Ayahudi arĩa meerutanĩirie gũtooria rũmena rũrĩa ndini ya Kĩyahudi yarĩ naruo kwerekera andũ a ndũrĩrĩ iria ingĩ ciothe. Jehova nĩ aahaarĩirie Petero wega mbere ya kũmũtũma kũrĩ Korinelio, Mũroma ũrĩa warĩ mũnene wa thigari.​—Atũmwo, mũrango wa 10.

⁴ Petero nĩ oonirio kĩoneki akĩĩrũo athĩnje na arĩe nyamũ imwe iria Ayahudi moonaga itarĩ theru. Rĩrĩa aaregire kũrĩa, mũgambo woimire igũrũ ũkĩmwĩra: “Tiga kuuga atĩ indo iria Ngai atheretie irĩ na thahu.” (Atũm. 10:15) Jehova aabatarire kũhũthĩra njĩra ĩyo nĩguo ahaarĩrie meciria ma Petero nĩ ũndũ wa wĩra ũrĩa aarĩ hakuhĩ kũheo wa gũceerera mũndũ wa rũrĩrĩ rũngĩ. Petero nĩ aathĩkĩire uuge wa Jehova, na akĩra arĩa moonganĩte kũu ũũ: “Nĩ mũĩ wega atĩ Mũyahudi ndagĩrĩirũo kũnyitanĩra kana gũkuhĩrĩria mũndũ wa rũrĩrĩ rũngĩ, o na kũrĩ ũguo Ngai nĩ anyonetie atĩ ndiagĩrĩirũo kuuga atĩ mũndũ o na ũmwe arĩ na thahu kana atĩ ti mũtheru. Na nĩkĩo hĩndĩ ĩrĩa ndĩratũmanĩirũo, ndoka itegũkararia.” (Atũm. 10:28, 29) Thutha ũcio, Petero nĩ eeyoneire we mwene ũira wa atĩ Jehova nĩ eetĩkĩrĩte Korinelio na famĩlĩ yake.

⁵ Saulu wa Tariso, ũrĩa warĩ Mũfarisai mũthomu mũno, aabatarire kwĩnyihia nĩguo ahote kũnyitanĩra na andũ arĩa ateendete mbere ĩyo. O na nĩ aathĩkagĩra ũtongoria kuuma kũrĩ o. (Atũm. 4:13; Gal. 1:13-20; Afil. 3:4-11) No tũhũũre mbica ũrĩa andũ ta Serigio Paulo, Dionisio, Damari, Onesimo, na angĩ maabatarire gũcenjia mwĩcirĩrie wao rĩrĩa meetĩkĩrire ũhoro ũrĩa mwega na magĩtuĩka arũmĩrĩri a Jesu Kristo.​—Atũm. 13:6-12; 17:22, 33, 34; Filem. 8-20.

GŨTŨŨRIA ŨRŨMWE WITŨ WA THĨ YOTHE

⁶ Hatarĩ nganja, wendo wa aarĩ na ariũ a Ithe witũ thĩinĩ wa kĩũngano nĩ wagũteithirie gũkuhĩrĩria Jehova na ithondeka rĩake. Nĩ weyoneire ũrĩa makoragwo na wendo, ngumo ĩrĩa ĩmenyithanagia arũmĩrĩri a ma a Jesu Kristo, o ta ũrĩa Jesu oonanirie rĩrĩa ooigire: “Ndĩramũhe rĩathani rĩerũ, atĩ mwendanage; o ta ũrĩa ndĩmwendete inyuĩ, o na inyuĩ endanagai inyuĩ ene. Nĩ ũndũ ũcio andũ othe nĩ marĩmenyaga atĩ mũrĩ arutwo akwa​—mwakorũo na wendo gatagatĩ-inĩ kanyu.” (Joh. 13:34, 35) Ningĩ nĩ wendire Jehova na ithondeka rĩake makĩria rĩrĩa wamenyire atĩ wendo ũrĩa ũkoragwo kĩũngano-inĩ, nĩ kĩonereria kĩa wendo ũrĩa ũkoragwo na aarĩ na ariũ a Ithe witũ thĩinĩ wa thĩ yothe. Rĩu nĩ ũreyonera ũrathi wa Bibilia ũkĩhinga wĩgiĩ gũcokanĩrĩrio kwa andũ matukũ-inĩ ma mũthia, nĩguo mathathaiye Jehova marĩ na thayũ na ũrũmwe.​—Mik. 4:1-5.

⁷ Tondũ ũmũthĩ gũkoragwo na maũndũ maingĩ magayũkanagia andũ-rĩ, nũũ ũngĩeciririe atĩ no kũgĩe na ũrũmwe gatagatĩ-inĩ ka andũ moimĩte “ndũrĩrĩ-inĩ ciothe, na mĩhĩrĩga, na ikundi cia andũ, na thiomi”? (Kũg. 7:9) Ta wĩcirie ngũrani ĩrĩa ĩkoragwo ho gatagatĩ-inĩ ka andũ arĩa monagwo mathiĩte na mbere maũndũ-inĩ, na arĩa marũmagĩrĩra ũndũire wao wa tene. Kana ũthũ wa kĩĩndini ũrĩa ũkoragwo ho gatagatĩ-inĩ ka andũ a rũrĩrĩ rũmwe kana bũrũri ũmwe. Nĩ ũndũ wa kwenda gũtũũgĩria mabũrũri mao, andũ nĩ magayũkanĩte biũ gĩũteti. Ningĩ ũngĩciria ũhoro wa maũndũ maingĩ matiganĩte marĩa magayũkanagia andũ ta gũkorũo na ũhoti ũtaiganaine wa kĩĩmbeca, nĩ kĩama kĩnene kĩrĩa kĩngĩringwo tu no Ngai Mwene-Hinya-Wothe gũkorũo na andũ moimĩte ndũrĩrĩ-inĩ ciothe, thiomi, na ikundi cia andũ marĩ na ũhoti ũtiganĩte manyitithanĩtio nĩ wendo na thayũ.​—Zek. 4:6.

⁸ Ũrũmwe ta ũcio nĩ wa ma, na rĩrĩa wabatithirio na ũgĩtuĩka Mũira wa Jehova ũmwĩyamũrĩire, waingĩrire thĩinĩ wa ũrũmwe ũcio. Nĩguo ũgunĩke nĩ ũrũmwe ũcio, ũrĩ na itemi rĩa kũũtũũria. No twĩke ũguo na njĩra ya kũrũmĩrĩra ciugo ici cia Paulo iria irĩ thĩinĩ wa Agalatia 6:10: “Rĩrĩa rĩothe tũrĩ na mweke, nĩ twĩkagei andũ othe wega, na makĩria arĩa twĩtainwo nao thĩinĩ wa wĩtĩkio.” Ningĩ nĩ tũrũmagĩrĩra ũtaaro ũyũ: “Mũtikaneke ũndũ o na ũmwe na ngũĩ kana na kwĩĩkĩrĩra, ĩndĩ mũrĩ na wĩnyihia onagai arĩa angĩ marĩ a bata kũmũkĩra, mũtekũrũmbũiya o maũndũ manyu moiki, no mũkarũmbũyagia nginya maũndũ ma arĩa angĩ.” (Afil. 2:3, 4) Tweruta kuona aarĩ na ariũ a Ithe witũ ta ũrĩa Jehova amonaga, tũtekũrora ũrĩa maroneka na nja, nĩ tũrĩthiaga na mbere gũkorũo na thayũ na ũrata mwega hamwe nao.​—Ef. 4:23, 24.

KŨRŨMBŨYANIA

⁹ O ta ũrĩa mũtũmwo Paulo onanĩtie, kĩũngano gĩtikoragwo kĩgayũkanĩte, no andũ othe nĩ marũmbũyanagia. (1 Kor. 12:14-26) O na gũtuĩka nĩ tũraihanĩrĩirie na aarĩ na ariũ a Ithe witũ amwe, no tũmarũmbũyagia. Angĩkorũo amwe ao nĩ maranyarirũo, o na ithuĩ nĩ tũtangĩkaga. Amwe mangĩbatara ũteithio wa indo cia kĩĩmwĩrĩ, kana mangĩkorũo mahutĩtio nĩ icanjama, mbaara, kana haaro cia gĩĩkabira, acio angĩ nĩ macaragia njĩra cia kũmateithia kĩĩroho na kĩĩmwĩrĩ.​—2 Kor. 1:8-11.

¹⁰ Ithuothe nĩ twagĩrĩirũo kũhoyagĩra aarĩ na ariũ a Ithe witũ o mũthenya. Amwe nĩ marahatĩkwo meke ũrĩa gũtagĩrĩire. Angĩ nĩ kũĩkaine mĩnyamaro ĩrĩa maragerera. Nao angĩ gũtiũĩkaine ũrĩa marakarario nĩ arĩa marutaga wĩra nao kana andũ a famĩlĩ arĩa matarĩ Aira a Jehova. (Mat. 10:35, 36; 1 Thes. 2:14) Twĩciragia ũhoro wao tondũ ithuothe tũrĩ famĩlĩ ya thĩ yothe ya aarĩ na ariũ a Ithe ũmwe. (1 Pet. 5:9) Gatagatĩ-inĩ gaitũ nĩ kũrĩ o matungatagĩra Jehova na kĩyo makĩria, na njĩra ya gũtongoria wĩra-inĩ wa kũhunjia na ciũngano-inĩ. Ningĩ nĩ kũrĩ arĩa marũgamagĩrĩra wĩra wa thĩ yothe. Othe nĩ marabatara mahoya maitũ, na rĩrĩa tweka ũguo tuonanagia atĩ nĩ tũmendete o na tũngĩkorũo tũtarĩ na ũteithio ũngĩ tũngĩmahe.​—Ef. 1:16; 1 Thes. 1:2, 3; 5:25.

¹¹ Nĩ ũndũ wa maũndũ maingĩ moru marĩa maiyũire thĩinĩ wa thĩ matukũ-inĩ maya ma kũrigĩrĩria, no mũhaka andũ a Jehova makorũo mehaarĩirie gũteithania. Rĩmwe icanjama, ta ithingithia na mĩiyũro, nĩ itũmaga kũbatare mĩbango ya gũteithia arĩa magũmĩirũo o hamwe na kũmahe indo cia kĩĩmwĩrĩ. Akristiano a karine ya mbere nĩ maatũigĩire kĩonereria kĩega ũndũ-inĩ ũcio. Tondũ arutwo a Jesu kuuma Antiokia nĩ maaririkanaga ũtaaro ũrĩa aamahete, nĩ maatũmĩire ariũ a Ithe wao arĩa maarĩ Judea ũteithio meyendeire. (Atũm. 11:27-30; 20:35) Mũtũmwo Paulo nĩ aabangire ũrĩa ũteithio ũngĩaheanirũo nĩguo maũndũ mothe mekĩke na kĩhaarĩro kĩega. (2 Kor. 9:1-15) Mahinda-inĩ maya, aarĩ na ariũ a Ithe witũ mangĩgũmĩrũo nĩ ũndũ na mabatare ũteithio wa indo cia kĩĩmwĩrĩ, ithondeka o hamwe na Akristiano arĩa angĩ nĩ moyaga ikinya o na ihenya na makamateithia.

TWAMŨRĨTWO NĨGUO TWĨKAGE WENDI WA JEHOVA

¹² Aarĩ na ariũ a Ithe witũ thĩinĩ wa thĩ yothe mabangĩtwo marĩ ithondeka rĩrĩ na ũrũmwe nĩguo mekage wendi wa Jehova. Ihinda-inĩ rĩrĩ, wendi wake nĩ ũhoro ũrĩa mwega wa Ũthamaki ũhunjio thĩinĩ wa thĩ yothe nĩguo ũtuĩke ũira kũrĩ ndũrĩrĩ ciothe. (Mat. 24:14) Wendi wa Jehova nĩ atĩ rĩrĩa tũraruta wĩra ũcio tũkorũo na mĩtugo ĩraringana na ithimi ciake cia ũthingu. (1 Pet. 1:14-16) Twagĩrĩirũo gũkorũo twĩhaarĩirie kwĩnyihanagĩria o mũndũ na ũrĩa ũngĩ na gũtwarithia na mbere wĩra wa kũhunjia. (Ef. 5:21) Gũkĩra hĩndĩ ĩngĩ o yothe, rĩrĩ nĩ ihinda rĩa kũiga Ũthamaki wa Ngai mbere ũtũũro-inĩ witũ, no ti rĩa mũndũ gwĩcarĩria maũndũ make mwene. (Mat. 6:33) Kũririkanaga ũndũ ũcio rĩrĩa tũrarutithania wĩra hamwe nĩ ũndũ wa ũhoro ũrĩa mwega, nĩ kũrĩtũmaga tũkorũo na gĩkeno na tũiganĩre mahinda-inĩ maya, na nĩ gũgaatũma tũgĩe na irathimo cia tene na tene.

¹³ Tũrĩ Aira a Jehova, tũkoragwo tũrĩ andũ a mwanya, twamũranĩtio na andũ arĩa angĩ na tũgatherio, na tũtungatagĩra Ngai witũ tũrĩ na kĩyo. (Tit. 2:14) Ũthathaiya witũ harĩ Jehova nĩguo ũtũmaga tũkorũo tũrĩ ngũrani. Tũrutithanagia wĩra hamwe na aarĩ na ariũ a Ithe witũ thĩinĩ wa thĩ yothe, tũkaria rũthiomi rũmwe rwa ũhoro ũrĩa wa ma, na tũgatũũra kũringana na ũhoro ũcio wa ma. Ũndũ ũcio nĩ warathĩtwo nĩ Jehova kũgerera mũnabii Zefania, rĩrĩa ooigire ũũ: “Nĩ ngaagarũra rũthiomi rwa ikundi cia andũ rũtuĩke rũthiomi rũtheru, nĩgetha ikundi icio ciothe ikayagĩre rĩĩtwa rĩa Jehova, imũtungatagĩre irĩ na ũrũmwe.”​—Zef. 3:9.

¹⁴ Jehova nĩ aacokire akĩhũthĩra Zefania gũtaarĩria ũrũmwe wa aarĩ na ariũ a Ithe witũ ũrĩa tuonaga ũmũthĩ thĩinĩ wa thĩ yothe, rĩrĩa aarathire ũũ: “Andũ a Isiraeli arĩa magaatigara matigeeka maũndũ matarĩ ma ũthingu; matikaaria ũndũ wa maheeni, kana rũrĩmĩ rwa maheeni ruoneke tũnua-inĩ twao; nĩ makaarĩaga na magakoma, na gũtirĩ mũndũ ũgaatũma maigue guoya.” (Zef. 3:13) Nĩ tũhotaga kũrutithania wĩra tũrĩ na ũrũmwe nĩ ũndũ wa kũgĩa na ũtaũku wa Kiugo kĩa Jehova kĩa ũhoro wa ma, na kũgarũra meciria maitũ na ũtũũro witũ itwarane na ithimi ciake. Ningĩ nĩ tũhingagia maũndũ marĩa monekaga ta matangĩhoteka maitho-inĩ ma andũ. Hatarĩ nganja, tũrĩ andũ a mwanya, andũ a Ngai, arĩa mamũgoocithagia thĩinĩ wa thĩ yothe.​—Mik. 2:12.