Ithandũkũ rĩa Kĩũria

◼ Nĩ ũtaaro ũrĩkũ wa Bibilia ũngĩhũthĩka harĩ kũhũthĩra thimũ mĩcemanio-inĩ ya Gĩkristiano na ũtungata-inĩ?

‘Ũndũ o Wothe ũrĩ na Ihinda Rĩaguo.’ (Koh. 3:1): Andũ nĩmahotaga gũtũma ndũmĩrĩri o na kana kwaranĩria na thimũ ihinda o rĩothe mangĩenda. O na kũrĩ ũguo, nĩ kũrĩ mahinda mamwe Akristiano matendaga kũgiywo nĩ thimũ ciao. Kwa ngerekano, mĩcemanio itũ ĩkoragwo ĩrĩ ihinda ria gũthathaiya Jehova, kũheo ũtaaro wa kĩĩroho, na gũkenera kũũmĩrĩria mũndũ na ũrĩa ũngĩ. (Gũcok. 31:12; Thab. 22:22; Rom. 1:11, 12) Hihi no tũhorie thimũ rĩrĩa twakinya mĩcemanio-inĩ na tũrore ndũmĩrĩri thutha-inĩ? Angĩkorũo nĩ ũrona ta ũngĩamũkĩra ndũmĩrĩri hiũ na kwoguo tũbatare kwaga kũhoria thimũ, twagĩrĩirũo nĩ gũtigĩrĩra atĩ itikũgia arĩa angĩ.

‘Maũndũ Mothe Nĩmekagwo nĩ Ũndũ wa Ũhoro-Ũrĩa-Mwega.’ (1 Kor. 9:23): Rĩmwe na rĩmwe, no tũbatare kũhũthĩra thimũ tũrĩ ũtungata-inĩ. Kwa ngerekano, mũrũ wa Ithe witũ ũrĩa ũratongoria no amĩhũthĩre kũmenya harĩa arĩa angĩ marĩ. Ahunjia rĩmwe na rĩmwe nĩ mahũthagĩra thimũ kũhũũrĩra arĩa merutaga nao Bibilia mbere ya mamaceereire, makĩria angĩkorũo mũndũ ũcio merutaga nake aikaraga haraihu. Angĩkorũo nĩ tũgũkuua thimũ, twagĩrĩirũo kũmenyerera itigatũgie rĩrĩa tũraria na mwene nyũmba. (2 Kor. 6:3) Rĩrĩa twetereire ahunjia arĩa angĩ, ithenya rĩa kũhũũrĩra mũrata kana kũmwandĩkĩra ndũmĩrĩri, na githĩ ti wega kũiga meciria maitũ ũtungata-inĩ na harĩ arĩa tũrarutithania wĩra nao?

Rũmbũyagia Arĩa Angĩ. (1 Kor. 10:24; Afil. 2:4): Ti wega kũhũthia mũtaratara wa gũkinya ihinda rĩrĩa rĩagĩrĩire mũcemanio-inĩ wa kũhunjia atĩ tondũ no ũhũũrĩre mũndũ kana ũmwandĩkĩre ndũmĩrĩri nĩguo ũmenye kũrĩa kũrahunjio. Rĩrĩa twakinya tũcereirũo, no mũhaka ahunjia magaywo rĩngĩ. Hatarĩ nganja, rĩmwe na rĩmwe maũndũ mangĩ ma o mũhaka no matũme tũcererũo. O na kũrĩ ũguo, rĩrĩa twamenyera gũkinyaga ihinda rĩrĩa rĩagĩrĩire, tuonanagia nĩ tũrarũmbũiya mũtaratara ũrĩa Jehova aigĩte, mũrũ wa Ithe witũ ũrĩa ũratongoria, na ahunjia arĩa angĩ.